Question Ki’nn Soulevé
◼ Pendant bann reunion, couma nou tou nou kapav favorise enn l’atmosphere ki permette nou pou aprann? (Deut. 31:12)
Nou profond respé pou Jéhovah ek pou bann reunion ki Li’nn organisé, pousse nou tou pou vinn boner ek pou montré-nou pré pou laisse nou enseigné par Li. Li pli bon ki nou assize devant dan la Salle, ek nou laisse bann place derriere pou bann ki ena bann ti zenfant ou-soit pou bann ki parfois arrive en retard. Avant ki reunion commencé, nou bizin reglé nou bann l’appareil electronik dan enn fason ki sa pou derange l’assistance pendant reunion. Kan tou bann assistant ena enn comportement ki montré respé pendant toute longue reunion, pou ena moins kitsoz ki pou derange lezot.—Eccl. 5:1; Phil. 2:4.
Kan bann nouveau commence assisté reunion, enn kikenn dan congregation ki habitué avek zot kapav assize kot zot. Sa pou rann zot service surtout si ena certain zenfant ki bizin l’aide pou zot comporte-zot bien. Kitfois assisté bann reunion c’est enn kitsoz ki nouveau pou enn famille. Dan sa cas-la, zot pou bien apprecié pou assize par derriere, coumsa si zot bizin sorti pou occupe zot zenfant, zot pa pou derange l’assistance. (Prov. 22:6, 15) Fodé pa ki bann famille ki ena bann ti zenfant al assize dan enn lot l’endroit separé dan la Salle du Royaume kot bann zenfant-la pou senti-zot libre pou faire tapaz. En general, li pli bon ki bann parent sorti pou discipline ou-soit occupe zot zenfant en dehors la salle principal, ek apré zot kapav révinn dan la salle principal.
Role bann frere dan service l’accueil c’est pou garde enn l’atmosphere ki approprié pou enn l’endroit kot nou adore Jéhovah. Zot aide bann famille ek bann ki parfois vinn reunion en retard, pou zot trouve enn place. Zot faire attention pou ena tact ek pou pa derange lezot kan zot aide bann dimoune pou trouve enn bon place. Zot servi zot bon jugement kan arrive bann situation ki pa ti attann. Kan enn zenfant derange lezot, avek gentillesse, bann frere service l’accueil pou propose zot l’aide.
Tou bann assistant kapav faire zot part pou ki dan nou bann reunion ena enn l’atmosphere ki permette nou aprann lor Jéhovah ek lor so projet pou faire enn le monde kot pou ena la paix ek la justice.—Héb. 10:24, 25.