Condition ki bizin rempli pou prend bapteme
1. (a) Kifer Philippe pa ti tardé pou baptise sa fonctionnaire Éthiopien-la? (b) Ki bann question nou pou examiné asterla?
1 “Ki empeche moi prend bapteme?” Sa Éthiopien ki ti pose sa question-la ti enn kikenn ki ti ena la foi. Li ti enn prosélyte ki ti deja pé servi Jéhovah. Kan li’nn comprend role bien important ki Jésus ti ena dan projet Bondié ek kifer li important ki li vinn enn so bann disciple, li pa’nn hesité pou prend bapteme. (Actes 8:26-39) C’est vrai ki voué nou la vie pou servi Jéhovah ek prend bapteme, c’est pa bann kitsoz banal, ki nou faire sans reflechi. Mais l’exemple sa Éthiopien-la montré ki parfois, certain inn prend bapteme alors ki zot ti’nn fek konn la verité lor Parole Bondié. C’est pou sa ki li bon ki nou examine sa bann question-la: Ki preparation enn kikenn bizin faire avant ki li prend bapteme? Eski l’age li important? Ki quantité progré li bizin faire avant? Ek surtout, kifer Jéhovah demann so bann serviteur pou prend bapteme?
2, 3. (a) Couma dan le passé, bann serviteur Bondié ti montré ki zot ti content Jéhovah pareil couma Li ti content zot? (b) Couma nou kapav vinn bien proche avek Bondié apré nou bapteme?
2 Nou faire enn promesse pou marche avek Bondié: Apré ki Jéhovah ti delivré bann Israélite dan l’Égypte, Li ti disposé pou accepté zot couma so “di-bien special,” pou content zot, pou protege zot, ek pou faire zot vinn “enn nation saint.” Mais, pou zot gagne sa bann benediction-la, bann Israélite ti bizin montré dan enn fason bien clair ki zot ti content Jéhovah pareil couma Li, Li ti content zot. Zot ti faire sa kan zot ti accepté pou faire “tou seki Jéhovah inn dire,” ek Li ti faire enn l’alliance avek zot. (Ex. 19:4-9) Dan premier siecle, Jésus ti donne l’ordre pou faire bann disciple parmi bann dimoune dan tou nation. Seki ti accepté l’enseignement Jésus, ti prend bapteme. Pou ena enn bon relation avek Bondié, nou bizin ena la foi en Jésus Christ ek apré prend bapteme.—Mat. 28:19, 20; Actes 2:38, 41.
3 Sa bann recit-la montré nou ki Jéhovah beni bann ki promette pou servi Li ek ki garde sa promesse-la. Pou nou bann chretien, voué nou la vie ar Jéhovah ek prend bapteme, c’est bann kitsoz bien important ki nou bizin faire pou gagne so benediction. Nou bien decidé pou obeir so bann la loi, ek pou rod so direction. (Ps. 48:14) Kan nou faire sa, c’est coumadir Jéhovah pé trappe nou la main, ek faire nou marche dan chemin kot nou bizin marché.—Ps. 73:23; Is. 30:21; 41:10, 13.
4. Kifer promesse pou servi Jéhovah ek prend bapteme, li bizin enn decision personnel?
4 Ki bizin pousse nou prend bapteme? C’est l’amour ki nou ena pou Jéhovah ek enn grand desir pou servi Li. Fodé pa ki enn kikenn prend bapteme zis parski finn dire li ki sa faire longtemps ki li pé etudié, ou-soit parski so bann camarade pé prend bapteme. Bien sur, bann parent ek bann lezot chretien mur kapav encourage enn kikenn pou reflechi lor bapteme. Jour la Pentecôte, l’apotre Pierre ti encourage bann ki ti pé ecoute li, pou “prend bapteme.” (Actes 2:38) Selman, voué nou la vie, setadir faire enn promesse pou servi Jéhovah, c’est enn kitsoz personnel, ek personne pa kapav faire sa dan nou place. C’est nou tousel ki bizin prend sa decision-la.—Ps. 40:8.
5, 6. (a) Kifer bapteme bann tibaba, pa en accord avek la Bible? (b) Ki progré lor plan spirituel bann jeune bizin faire avant zot prend bapteme?
5 Enn bon preparation avant bapteme: Eski bann zenfant kapav prend decision pou voué zot la vie ek prend bapteme? La Bible pa dire ki l’age bizin prend bapteme. Mais, li clair ki bann tibaba pa kapav vinn bann disciple, ena la foi ek voué zot ar Jéhovah. (Actes 8:12) August Neander, enn historien, ti faire sa commentaire-la lor bann chretien premier siecle: “Au commencement, c’est zis bann adulte ki ti gagne droit prend bapteme, parski pou bann dimoune, bapteme ek la foi ti deux kitsoz ki ti bien lié.”
6 Certain zenfant, mem si zot encore bien jeune, arrivé comprend bann l’enseignement principal lor Bondié ek lor so bann projet. Mais pou certain sa prend plus le temps. Pou ki enn jeune prend bapteme, li bizin rempli mem condition ki bann adulte. Setadir, li bizin ena enn relation personnel avek Jéhovah, enn connaissance exact lor bann verité fondamental ki ena dan la Bible, ek li bizin aussi bien comprend seki sa vedir voué so la vie ar Jéhovah.
7. Ki enn kikenn bizin faire avant li voué so la vie ar Jéhovah ek li prend bapteme?
7 Jésus ti donne so bann disciple l’ordre pou enseigne bann nouveau tou so bann commandement. (Mat. 28:20) Alors premierement, bann nouveau bizin gagne enn connaissance exact lor la verité. Lerla, sa pou permette zot developpe la foi en Jéhovah ek dan so Parole. (Rom. 10:17; 1 Tim. 2:4; Héb. 11:6) Kan la verité touche leker enn dimoune, sa pousse li pou repenti, ek pou abandonne la vie ki li ti pé amené avant. (Actes 3:19) Finalement, sa dimoune-la arrive enn point kot li envie voué so la vie ar Jéhovah ek prend bapteme, pareil couma Jésus ti faire.
8. Kifer li important ki nou preche regulierement avant nou bapteme?
8 Enn pas important ki enn dimoune bizin faire avant li prend bapteme, c’est preche la bonne nouvelle. Sa-mem travail principal ki Jéhovah inn donne so bann serviteur pou faire pendant lepok dernier jour. (Mat. 24:14) Bann proclamateur ki pankor prend bapteme kapav gagne la joie pou koz lor zot croyance ar lezot dimoune, coumsa zot prend l’habitude pou preché regulierement ek avek zele, enn kitsoz ki zot pou bizin contigne faire apré zot bapteme.—Rom. 10:9, 10, 14, 15.
9. Ki kapav empeche certain pou prend bapteme?
9 Eski ena enn kitsoz ki empeche ou pou prend bapteme?: Kitfois certain jeune hesité pou prend bapteme parski zot pa’lé accepté responsabilité ki ena derriere sa. Zot rann-zot compte ki zot pou bizin faire bann grand changement dan zot la vie pou vive en accord avek bann principe Jéhovah. Ou-soit, li possible ki zot peur ki apré zot bapteme, zot trouve sa difficile pou vive en accord avek seki Bondié demandé. Certain kapav mem pensé: “Mo peur pangar enn jour mo faire enn peché ek mo exclu.”
10. Dan lepok Jésus, ki ti empeche certain dimoune pou vinn so bann disciple?
10 Dan lepok Jésus, certain pa ti vinn so bann disciple parski zot bann l’interet personnel ek zot bann lien familial ti ena plus l’importance pou zot. Enn fois enn scribe ti dire Jésus ki li ti pou suive li partout kot li allé. Mais Jésus ti dire ki bien souvent li mem pa ti ena enn place pou dormi. Kan Jésus ti demann enn lot missié pou vinn so disciple, mais sa missié-la ti dire ki li bizin “enterre” so papa avant. Surement ki sa missié-la ti prefere reste kot li, attann ki so papa mort ek enterre li, au lieu ki li suive Jésus. Finalement, enn troisieme missié ti dire Jésus ki avant li suive li, li ti bizin al dire so bann famille enn “aurevoir.” Dapré Jésus, bann dimoune ki touletan renvoye zot decision pou plitar, zot coumadir bann dimoune ki pé ‘guette bann kitsoz ki zot inn laisse derriere zot.’ Alors, li possible ki bann ki envie agir coumsa, pou touletan reussi trouve bann pretexte pou pa prend zot responsabilité en tant ki chretien.—Luc 9:57-62.
11. (a) Couma eski Pierre, André, Jacques ek Jean ti reagir kan Jésus ti invite zot pou al la-peche bann zom? (b) Kifer fodé pa nou hesité pou accepté joug Jésus?
11 L’exemple Pierre, André, Jacques ek Jean bien different. Kan Jésus ti invite zot pou suive li ek pou al la-peche bann zom, la Bible dire: “Desuite, zot ti laisse zot filet, ek zot ti suive li.” (Mat. 4:19-22) Parski zot finn prend sa decision-la sans hesité, zot finn kapav faire l’experience seki Jésus ti dire zot plitar: “Prend mo joug lor zot ek aprann ar moi, parski mo ena enn caractere doux, ek enn leker humble, ek zot pou gagne soulagement pou zot nâme. Parski mo joug, li doux ek mo charge, li leger.” (Mat. 11:29, 30) Li vrai ki bapteme c’est enn grand responsabilité, mais Jésus donne nou l’assurance ki c’est enn responsabilité ki pou faire nou di-bien, ki nou kapav sarié, ek ki pou donne nou enn grand soulagement.
12. Couma l’exemple Moïse ek Jérémie montré nou ki nou bizin compte lor soutien Bondié?
12 Kitfois nou kapav pensé ki sa li enn trop grand responsabilité, ek sa li enn sentiment ki normal. Nou rappel ki Moïse ek Jérémie aussi ti ena mem sentiment kan Jéhovah ti donne zot enn certain responsabilité. (Ex. 3:11; Jér. 1:6) Couma eski Bondié ti rassure-zot? Li ti dire Moïse: “Mo pou avek toi.” Ek Li ti promette Jérémie: “Mo avek toi pou delivré toi.” (Ex. 3:12; Jér. 1:8) Nou aussi nou kapav ena confiance ki Jéhovah pou avek nou. Kitfois nou pensé ki nou pa pou kapav vive en accord avek voeu ki nou’nn faire avek Jéhovah. Mais nou l’amour pou Jéhovah ek confiance ki nou ena en Li kapav aide nou surmonte sa bann doute-la. L’apotre Jean ti ecrire: “Kan nou ena l’amour, nou pa peur, mais l’amour parfait jette la peur dehors.” (1 Jean 4:18) Enn ti garson kapav peur pou marche tousel, mais kan li trappe la main so papa ek marche ensam avek li, li pa peur. Li pareil pou nou aussi. Jéhovah promette nou ki si nou faire Li confiance avek tou nou leker, Li pou ‘faire nou chemin vinn droite,’ pendant ki nou pé marche ensam avek Li.—Prov. 3:5, 6.
13. Kifer bizin plonge enn kikenn ki prend bapteme net dan de l’eau?
13 Enn l’evenement ki nou bizin respecté: En general avant bapteme, enn frere faire enn discours basé lor la Bible ki explik signification bapteme. A la fin so discours, frere-la invite bann candidat bapteme pou reponn deux question pou faire declaration publik zot la foi. (Rom. 10:10) Apré sa, enn frere plonge bann candidat bapteme dan de l’eau, pou suive l’exemple ki Jésus inn laissé. La Bible dire ki apré so bapteme, Jésus ti sorti “dan de l’eau.” (Mat. 3:16; Marc 1:10) Sa vedir ki Jean Baptiste ti’nn plonge Jésus net dan de l’eau. Kan plonge enn kikenn net dan de l’eau, sa represente grand changement ki li faire dan so la vie. Par rapport ar so la vie ki li ti pé amené avant c’est coumadir sa dimoune-la inn mort ek li ré-commence enn nouveau la vie pou servi Bondié.
14. Couma bann candidat bapteme ek l’assistance aussi, kapav montré ki zot ena respé pou sa l’occasion special-la?
14 Bapteme, c’est enn evenement serieux ek joyeux, toulé-deux. La Bible dire ki Jésus ti pé prié kan Jean ti plonge li dan la riviere Jourdain. (Luc 3:21, 22) En accord avek so l’exemple, bann candidat bapteme bizin ena enn bon comportement pendant zot bapteme. En plus, la Bible encourage nou pou habillé dan enn fason modeste dan nou la vie toulé-jour. Alors, nou bizin suive sa conseil-la encore plus, jour ki nou prend bapteme! (1 Tim. 2:9) Bann ki present zot aussi zot kapav montré zot respé pou sa l’evenement-la. Couma? Kan zot ecoute bien discours bapteme, ek kan zot reste dan zot place, sans faire tapage, pendant sa l’evenement-la.—1 Cor. 14:40.
15, 16. Ki privilege ek ki benediction nou gagné kan nou prend bapteme?
15 Bann benediction ki nou gagné kan nou prend bapteme: Enn fois ki nou finn voué nou la vie ar Jéhovah ek nou finn prend bapteme, nou forme partie dan enn famille special. D’abord, Jéhovah vinn nou Papa ek nou Camarade. Avant nou bapteme, nou ti eloigné ar Bondié; asterla, nou’nn reconcilié avek Li. (2 Cor. 5:19; Col. 1:20) Grace a sacrifice Jésus, nou finn vinn proche ar Bondié ek Bondié finn vinn proche ar nou. (Jacq. 4:8) Prophete Malaki expliké couma Jéhovah prend compte ek ecoute bann ki servi ek porte So nom, ek Li ecrire zot nom dan so livre souvenir. Bondié dire: “Zot pou vrai-mem vinn pou moi, . . . ek mo pou ena pitié pou zot, pareil couma enn dimoune ena pitié pou so garson ki pé servi li.”—Mal. 3:16-18.
16 Kan enn kikenn prend bapteme li vinn membre la famille mondial nou bann frere ek soeur. Kan l’apotre Pierre ti demann Jésus ki bann benediction So bann disciple pou gagné pou bann sacrifice ki zot inn faire, Jésus ti reponn: “N’importe kisannla ki finn quitte lakaz, frere, soeur, papa, mama, zenfant, ou-soit terrain a cause mo nom, pou gagne beaucoup plus, ek li pou gagne la vie eternel.” (Mat. 19:29) Plusieurs l’année apré, Pierre ti ecrire concernant “toute la famille nou bann frere” ki’nn commencé developpé dan le monde entier. Pierre li-mem ti gagne soutien ek benediction so bann frere, ek nou aussi nou kapav faire sa l’experience-la.—1 Pierre 2:17; 5:9.
17. Ki grand benediction nou gagné kan nou prend bapteme?
17 En plus, Jésus ti montré ki bann ki pou suive li, “pou gagne la vie eternel.” Vrai-mem, kan nou voué nou la vie ar Jéhovah ek nou prend bapteme, sa donne nou l’espoir pou “bien saisi vrai la vie”—la vie eternel dan le monde nouveau. (1 Tim. 6:19) Eski kapav ena enn pli bon fondation pou l’avenir ki sa, pou nou ek nou famille? Sa l’esperance-la pou permette nou “marche au nom Jéhovah nou Bondié pou touletan, oui pou toujours.”—Mika 4:5.