Suive l’Exemple Bann Prophete—Yoël
1. Kan nou preché, couma nou kapav imite l’humilité Yoël?
1 Kisannla prophete Yoël ti été? Li zis dire ki li ti “garson Pethouël.” (Yoël 1:1) Sa prophete humble-la ti mette l’accent lor message Jéhovah plutot ki lor so role couma enn messager. Li pareil, dan nou ministere, plutot ki nou rod gagne l’honneur ou-soit envie ki lezot remark seki nou faire, nou pou attire l’attention lor Jéhovah ek la Bible. (1 Cor. 9:16; 2 Cor. 3:5) En plis, message ki nou preché donne nou courage. Azordi, ki bann l’aspect dan prophetie Yoël kapav faire nou ena enn grand zele ek donne nou l’espoir?
2. Parski jour Jéhovah bien pré, ki sa bizin pousse nou pou faire?
2 “Jour Jéhovah Bien Pré.” (Yoël 1:15): Mem si sa faire plusieurs siecle depuis ki Yoël inn ecrire sa bann parole-la, nou pé vive dan lepok zot realisation final. Bann condition mondial ki pé vinn pli pire, l’indiferans ek moquerie bann dimoune dan nou territoire montré dan enn fason clair ki bann dernier jour sa mauvais le monde-la inn arrivé. (2 Tim. 3:1-5; 2 Pierre 3:3, 4) Kan nou reflechi couma lafin bien pré, nou ena tou bann raison pou mette nou ministere en premier dan nou lavi.—2 Pierre 3:11, 12.
3. Kifer nou bizin donne nou ministere plis l’importance, a mesure ki grand tribulation pé kosté?
3 “Jéhovah Pou Vinn enn Refuge pou So Peuple.” (Yoël 3:16): Kan sa verset-la dire ki “le ciel ek later pou tremblé,” en realité, sa concerne jugement ki Jéhovah pou amené pendant grand tribulation. Sa reconforte nou pou koné ki Jéhovah pou delivré so bann serviteur ki fidele pendant sa moment-la. (Rév. 7:9, 14) A mesure ki nou preché ek nou trouvé couma Jéhovah soutenir nou ek fortifié nou, sa aide nou pou cultive la foi ek l’endurance. Sa bann qualité-la pou aide nou pendant grand tribulation ki pé vini.
4. Kifer nou kapav heureux ek guette lavenir avek confiance?
4 Mem si pou certain, message ki ena dan livre Yoël pa donne l’espoir, mais pou peuple Bondié sa message-la donne l’espoir ki pou ena enn delivrans. (Yoël 2:32) Alors, anou guette lavenir avek confiance ek preche avek zele bon nouvelle lor Royaume Bondié a mesure ki nou suive conseil ki ena dan Yoël 2:23 ki dire: “Ki zot heureux ek trouve la joie dan Jéhovah zot Bondié.”