Swiv Lexanp Bann Profet—Amos
1. Kifer lexanp Amos kapav ankouraz nou?
1 Eski ou’nn deza santi ki ou pa kalifie pou pres bon nouvel parski ou pena ase ledikasion ouswa parski ou sorti dan enn fami modes? Si wi, lexanp Amos kapav ankouraz ou. Li ti enn elver mouton ek dan sertin sezon li ti travay kouma labourer. Kan mem sa, Jéhovah ti donn li enn mesaz inportan pou anonse. (Amos 1:1; 7:14, 15) Azordi osi parey, Jéhovah servi bann ki inb ek modes. (1 Cor. 1:27-29) Ki lezot leson nou kapav aprann ar profet Amos konsernan nou minister?
2. Kifer nou kapav res ferm mem si nou gagn persekision dan nou minister?
2 Res Ferm Mem si Nou Gagn Persekision: Amatsia ti enn pret ki ti ador vo ek ki ti res dan rwayom dis-tribi dan lenor Israel. Kan li ti tann Amos profetize, se koumadir li ti reponn li dan sa fason-la: ‘Al to lakaz! Les nou trankil! Nou ena nou prop relizion!’ (Amos 7:12, 13) Kan Amatsia ti al demann Lerwa Yarobam pou anpes Amos profetize, li ti deform bann parol sa profet-la. (Amos 7:7-11) Me sa pa ti fer Amos per. Azordi, sertin pret rod led bann politisien pou persekit bann serviter Jéhovah. Me Jéhovah rasir nou ki okenn zarm ki bann dimounn forme kont nou pa pou reisi.—Is. 54:17.
3. Ki de laspe ena dan mesaz ki nou anonse zordi?
3 Anons Zizman Bondie ek Bann Benediksion pou Lavenir: Mem si Amos ti profetiz enn zizman kont rwayom dis-tribi Israël, li ti terminn liv Labib ki port so nom par bann promes Jéhovah. Jéhovah ti dir ki Li pou rekonstrir bann lavil ek donn boukou benediksion. (Amos 9:13-15) Nou osi nou koz lor “zour zizman” Bondie ki pe vini, me sa li zis enn laspe dan “bon nouvel lor rwayom” ki nou bizin anonse. (2 Pierre 3:7; Mat. 24:14) Kan Har-Maguédôn vini ek kan Jéhovah pou detrir bann move dimounn, sa pou prepar later pou ki li vinn enn paradi.—Ps. 37:34.
4. Ki lasirans nou ena ki nou kapav fer volonte Jéhovah?
4 Kan nou pres mesaz Rwayom Bondie dan enn lemond kot boukou dimounn opoze ar nou, pena dout ki sa teste nou determinasion pou viv an-akor avek ve ki nou’nn fer Jéhovah ek nou determinasion pou fer so volonte. (Jean 15:19) Me selman, nou sir ki Jéhovah pou kontign kalifie nou pou fer so volonte, parey kouma li ti fer avek Amos.—2 Cor. 3:5.