Swiv Lexanp Bann Profet—Abakouk
1. Kifer nou kapav met nou dan plas profet Abakouk?
1 Amezir ki nou pe viv dan sa lemond kot lemal pe ogmante la, kitfwa nou ena mem santiman ki Abakouk, ki ti demann Zeova: “Kifer to fer mwa trouv tou seki move? Ek kifer to toler bann dimounn dominer?” (Aba. 1:3; 2 Tim. 3:1, 13) Kan nou medit lor mesaz Abakouk ek lor so lexanp, sa kapav ed nou amezir ki nou pe atann zour zizman Zeova.—2 Pier 3:7.
2. Kouma nou kapav montre ki nou pe viv par lafwa?
2 Viv par Lafwa: Olie ki li ti akable par seki ti pe pase, Abakouk ti res lor so gard ek ti res aktif lor plan spiritiel. (Aba. 2:1) Zeova ti rasir Abakouk ki So parol ti pou realize dan ler ki Li’nn fixe ek ki “enn dimounn drwat pou viv par so lafwa.” (Aba. 2:2-4) Antan ki Kretien, kouma nou bizin reazir lefe ki nou pe viv dan lepok lafin? Olie ki nou rod kone kan lafin pou vini, seki pli inportan se ki nou sir li pou vini. Lafwa pou pous nou pou res lor nou gard ek pou fer nou minister vinn nou priorite.—Ebre 10:38, 39.
3. Kifer nou bizin gard nou lazwa dan nou servis pou Zeova?
3 Dan Lazwa Akoz Zeova: Kan Gog ki sorti Magog pou atak pep Zeova, nou lafwa pou pas par bann leprev. (Eze. 38:2, 10-12) Bann lager amenn boukou problem, mem pou bann ki gagn viktwar. Kitfwa manze kapav manke, boukou kapav perdi zot bann dibien, ek nivo lavi kapav vinn bien ba. Kouma nou pou reazir kan nou pou gagn bann leprev? Abakouk ti atann pou gagn bann leprev, alor li ti bien deside pou gard so lazwa dan so servis pou Zeova. (Aba. 3:16-19) “Lazwa Zeova” pou ed nou osi pou fer fas ar bann leprev ki nou pou gagne.—Ne. 8:10; Ebre 12:2.
4. Ki lazwa nou kapav gagne asterla mem ek dan lavenir?
4 Bann ki Zeova pou sape kan pou ena so zour zizman pou kontign gagn konsey lor fason ki zot bizin viv pou fer Bondie plezir. (Aba. 2:14) Bann ki pou resisite osi pou aprann konn Zeova. Depi asterla mem, anou servi tou lokazion pou koz lor Zeova ek lor so bann travay extraordiner!—Ps. 34:1; 71:17.