« Marchons par la foi, non par la vue »
Enn tipe avan ki bann lennmi atak ek detrir Zerizalem, lapot Pol ti ekrir ki bann Kretien, kouma bann solda Kris, ti bizin atann ki zot pou gagn bann difikilte ek ki fode pa zot get zot konfor ek zot plezir avan tou kitsoz. (2 Tim. 2:3, 4) Dan sa move lemond ki ranpli ar maler la, nou bizin ena enn lafwa solid pou ki nou kontign res konsantre lor bann kitsoz spiritiel. (2 Kor. 4:18; 5:7) Get DVD « Marchons par la foi, non par la vue. » (Al lor jw.org/fr, dan seksion PUBLICATIONS > VIDÉOS.) Remarke kouma kan zot ti tro atase avek bann kitsoz materyel, sa ti vinn enn piez ki’nn fer Naham ek Abital perdi zot lavi. Apre sa, reponn sa bann kestion-la:
(1) Dan premie siek, ki ti ete sa “kitsoz degoutan ki . . . debout dan enn plas ki sin” la, ek ki bann Kretien dan Zerizalem ti bizin fer san tarde? (Mat. 24:15, 16, NW.) (2) Kifer bann Kretien ti bizin ena lafwa pou ki zot sove depi sa lavil-la? (3) Ki bann sakrifis zot ti bizin fer pou ki zot sove? (4) Kifer Naham ek Abital ti tarde? (Mat. 24:17, 18) (5) Kouma lafwa Rashel ti repas par enn leprev kan li ti pe kit Zerizalem? (Mat. 10:34-37; Mark 10:29, 30) (6) Kouma Etann finn les enn bon lexanp lor lafwa ek konfians an Zeova? (7) Ki difikilte bann Kretien dan Pela ti gagne? (8) Kouma eski tigit-tigit lafwa Naham ek Abital ti diminie? (9) Kouma Zeova ti pran swin bann Kretien dan Pela? (Mat. 6:33; 1 Tim. 6:6-8) (10) Kouma nou kapav swiv lexanp Abraam ek Sara amezir ki lafin sa sistem-la pe koste? (Ebre 11:8-10) (11) Kouma Naham ek Abital ti met dan zot latet pou retourn Zerizalem, ek kifer zot ti dan lerer? (Lik 21:21) (12) Kan Naham ek Abital ti retourn Zerizalem, kouma lavi ti ete vremem laba? (13) Kifer nou bizin fer nou lafwa vinn pli for asterla mem—avan lafin sa sistem-la arive?—Lik 17:31, 32; 21:34-36.
Mars par lafwa vedir (1) ena konfians dan bann direksion ki Zeova done, (2) les Zeova diriz nou bann pa, ek (3) montre ki pou nou, bann kitsoz spiritiel ena plis valer ki bann kitsoz materyel. Alor, anou determine pou mars par lafwa, ek ena konfians ki “lemonn avek so bann dezir pe al fini, me bann ki fer volonte Bondie pou viv pou touzour.”—1 Zan 2:17.