Lettre College Central

Cher compagnon Témoins de Jéhovah,

L’apotre Paul ti saisi chaque l’occasion pou exprime so l’amour ek so reconnaissance pou so bann compagnon. Li ti ecrire bann chretien Rome: “Mo remercié mo Bondié pou zot tou, par moyen Jésus Christ, parski dan le monde entier, tou dimoune pé koz lor zot la-foi.” (Rom. 1:8) Oui, dan tou l’Empire romain, bann dimoune ti konn bann chretien dan premier siecle pou zot la-foi solide ek zot zele pou predication. (1 Thess. 1:8) Sa pa etonne nou ki Paul ti ena enn grand l’affection coumsa pou so bann frere!

Pareil couma Paul, nou remercié Jéhovah chaque fois ki nou pense zot. Nou content zot tou beaucoup! Ek zot kapav sur ki Jéhovah content sakenn parmi zot. Certain parmi zot pé faire face ar enn grand l’opposition, mais zot contigné preché kan-mem. Sa zele ek sa courage ki zot ena-la surement faire leker Jéhovah bien content!—Prov. 27:11.

Kan ou pou lire ek medite lor lartik “ Actes des Témoins de Jéhovah de nos jours ” ki ena dan l’Annuaire 2008 ki bien interessant ek ki fortifié nou la-foi-la, ou pou trouve beaucoup preuve ki nou Seigneur Jésus Christ pé “sorti couma enn vainker ek pou complete so victoire.” Ou pou trouvé aussi ki okenn zarme ki pou formé kont bann disciple Christ, pa pou reussi.—Rév. 6:2; Is. 54:17.

L’apotre Paul ti ecrire bann chretien dan Philippes: “Mo remercié mo Bondié . . . a cause seki zot inn faire pou la bonne nouvelle.” (Phil. 1:3-5) Nou, bann membre College central nou ena mem sentiment pou zot. Pendant l’année service 2007, finn ena 6,691,790 proclamateur ki finn passe 1,431,761,554 l’heure-temps pou preche la bonne nouvelle dan 236 pays lor la terre. C’est vrai-mem enn grand zeffort ki zot pé faire pou contigne partage la bonne nouvelle! Pense sa centaine millier dimoune ki finn touché par zeffort ki nou tou nou finn faire ensam, ek tousala donne Bondié louange!

Dan enn lot l’occasion, Paul ti montré ki li ti mette-li dan place so bann frere. Li ti ecrire bann Thessalonicien: “Nou touletan rappel . . . zot l’endurance grace a zot l’esperance dan nou Seigneur Jésus Christ devant nou Bondié ek Papa.” (1 Thess. 1:2, 3) Oui, dan la vie, probleme pa manké, mais li bien important ki nou enduré. Ar ki bann probleme ou pé bizin faire face personnellement? Eski enn maladie grave pé limite seki ou kapav faire dan service Jéhovah? Eski ou conjoint ki ou’nn content pendant longtemps finn tombe dan la main nou pli grand l’ennemi, shéol? (Prov. 30:15, 16) Eski ou pé rodé, mais ou pa pé reussi trouve enn conjoint ki content Jéhovah pareil couma ou, ek malgré sa avek fidelité ou pé reste attaché ar sa conseil la Bible ki dire marié zis dan le Seigneur? (1 Cor. 7:39) Eski ou pé faire zeffort pou grandi ou bann zenfant malgré ki ena bann probleme economik bien difficile? Dan n’importe ki situation ki ou été, si ou garde bann l’interet Royaume Bondié en premier, ou kapav sur ki Jéhovah pa pou “blié seki [ou’nn] faire ek l’amour ki [ou] finn montré pou so nom.” S’il vous plait, frere ek soeur, pa “renoncé pou faire seki bien”!—Héb. 6:10; Gal. 6:9.

Ki kitsoz ki pou aide ou pou enduré? Pareil couma pou bann Thessalonicien, c’est “l’esperance dan nou Seigneur Jésus Christ.” L’apotre Paul ti ena raison pou compare “l’esperance pou gagne delivrance” avek enn helmet ki solide ek ki kapav protege enn chretien kont bann fason pensé negatif ek kont bann doute ki pa’lé allé.—1 Thess. 5:8.

Oui, kan ou enduré avek la joie, ou pé reponn l’accusation Satan lor question concernant souveraineté universel. Satan pretann ki bann serviteur Bondié zot egoïste par nature ek ki mem si kitfois zot envie servi Bondié pou enn moment, si bann l’epreuve augmenté ou-soit si sa systeme-la contigne existé encore pli longtemps ki seki zot ti attann, zot pou ralenti dan zot l’adoration. Ou ena privilege pou montré ki le Diable li vrai-mem enn grand menteur! Chaque jour ki passé pé faire ou vinn pli pré avek bann benediction ki ou pé esperé.

Pareil couma Paul ti saisi bann l’occasion pou felicite so bann frere pou grand la foi ki zot ena, pou zot bon participation dan predication, ek pou zot l’endurance, nou aussi nou content pou saisi sa l’occasion-la pou felicite ou ek assure ou ki nou content ou. Contigne ou bon travail!

Nou esperé ki sa nouveau l’année-la pou rempli avek beaucoup benediction spirituel. Nou envoye zot tou nou l’affection,

Zot bann frere,

College central bann Témoins de Jéhovah