Akoz Lager dan Ikrenn, Pe Plis Mank Manze dan Lemond

Le 19 Me 2022, plis ki 75 gran fonksioner inn dir Conseil de sécurité des Nations Unis ki “akoz pandemi COVID-19 ek sanzman klimatik, ena enn gro problem manze dan lemond antie. Me sa pe telman anpire akoz lager dan Ikrenn, ki ena enn risk lafaminn dan sertin landrwa.” Inpe apre sa, magazinn The Economist ti dir “ki dan lemond ena deza boukou problem, me akoz lager pou ena pli boukou dimounn ki pa pou ena manze.” Labib ti predir ki ti pou ena bann problem manze dan nou lepok. Selman, li’nn osi dir nou kouma nou kapav fer fas ar sa sitiasion-la.

Seki Labib ti predir lor bann problem manze

• Zezi ti dir: “Nasion pou lev kont nasion, rwayom kont rwayom, e pou ena lafaminn.”​—Matie 24:7, NTKM.

• Dan Labib, liv Revelasion koz lor kat kavalie. Enn parmi sa bann kavalie-la reprezant lager. Kavalie ki vinn apre li, reprezant lafaminn, setadir enn lepok kot pou mank manze ek kot manze pou mari ser. Labib dir: “Mo trouv enn seval nwar; dimoun ki ti mont li la ena enn balans dan so lame. Mo tann koumadir enn lavwa . . . li ti dir, ‘Enn mezir dible pou enn denie [setadir lapey enn zourne] e trwa mezir lorz pou enn denie.’”​—Revelasion 6:5, 6, NTKM.

Bann profesi Labib lor lafaminn pe realize dan nou lepok, setadir lepok ki Labib apel bann “dernie tan.” (2 Timote 3:1, NTKM) Pou aprann plis lor bann “dernie tan” ek lor sa kat kavalie ki mansione dan liv Revelasion la, get video Lemond Finn Sanze Depi 1914 ek lir lartik “Kat Kavalie Apokalips​—Ki Zot Reprezante?”

Kouma Labib kapav ed nou?

• Dan Labib, ena bann konsey bien pratik ki kapav ed nou pou fer fas ar bann difikilte, kouma par exanp kan pri manze vinn pli ser ouswa kan mank manze. Get sertin lexanp dan lartik « Comment vivre avec moins. »

• Labib donn osi enn lespwar ki bann kitsoz pou ameliore. Li promet enn lepok kot bann “karo ek vale [pou] donn manze ankantite” ek kot tou dimounn pou ena enn kantite manze. (Psom 72:16, PKM) Pou aprann plis lor lespwar ki Labib done pou lavenir ek kifer nou kapav fer li konfians, get lartik « Une espérance réelle pour des jours meilleurs. »