Tolerans—Ki Labib Dir lor La?
“Bann dimounn bizin ena tolerans pou ki ena lape dan lemond.”—UNESCO Déclaration de principes sur la tolérance, 1995.
Selman, kan bann dimounn pena tolerans, bien souvan zot ena laenn ek zot pena respe pou zot kamarad. Kan bann dimounn ena sa bann santiman-la, zot ziz lezot, zot dir bann kitsoz ki ranpli ar laenn, ek zot vinn violan.
Bann dimounn ena diferan lopinion lor tolerans. Pou sertin, kan enn kikenn li toleran, savedir ki li bizin dakor ar tou seki lezot fer. Pou lezot, enn kikenn ki toleran li aksepte ki sakenn ena drwa pou swazir so krwayans ek so bann valer, mem si li li pa dakor ar sa bann krwayans-la ek sa bann valer-la. Sa lide-la li an-akor avek Labib.
Eski Labib kapav ed bann dimounn pou zot vremem toleran azordi?
Seki Labib dir lor tolerans
Labib ankouraz bann dimounn pou ena tolerans. Li dir: “Ki tou dimounn kone ki zot rezonab.” (Filipien 4:5) Labib ankouraz nou pou ena bonte, respe, ek konsiderasion pou lezot. Bann ki swiv sa konsey-la, mem si zot pa dakor ouswa zot pa swiv bann mem prinsip ki lezot, zot rekonet ki lezot ena drwa fer zot prop swa.
Selman, Labib montre nou ki Bondie inn etabli bann prinsip pou bann dimounn. Li dir: “Bondie inn dir twa ki kitsoz ki bon.” (Mishe 6:8) Sa bann prinsip-la kapav ed bann dimounn pou ena enn pli bon lavi.—Izai 48:17, 18.
Pou Bondie, nou pena drwa ziz lezot. Labib dir, “Ena zis enn sel ki donn lalwa ek ki Ziz . . . Ki to ete pou to ziz to prosin?” (Zak 4:12) Bondie les sakenn parmi nou fer so prop swa, ek sak dimounn responsab seki li fer.—Deteronom 30:19.
Seki Labib dir lor respe
Labib dir nou ki nou bizin “respekte tou bann imin.” (1 Pier 2:17, Nouvo Testaman an Kreol Morisien, NTKM) Alor, bann dimounn ki swiv bann prinsip ki ena dan Labib, zot tret tou dimounn avek respe, mem bann dimounn ki ena lezot krwayans ouswa bann dimounn ki viv zot lavi kouma zot anvi. (Lik 6:31) Selman, sa pa vedir ki zot pou dakor ar krwayans ouswa lopinion sa dimounn-la, ouswa ki zot pou soutenir sak desizion ki li pran. Zot pou zanti ek zot pou respekte sa dimounn-la, ek zot pou fer tou seki zot kapav pou tret li parey kouma Zezi ti pou tret li.
Par exanp, enn fwa Zezi ti zwenn ar enn madam ki ti dan enn lot relizion. Sa madam-la ti pe osi viv avek enn zom ki pa ti so mari. Mem si Zezi pa ti dakor ar relizion sa madam-la ek ar fason ki li ti pe viv so lavi, li ti montre respe kan li ti koz ar sa madam-la.—Zan 4:9, 17-24.
Parey kouma Zezi, bann Kretien prepar zot pou explik zot krwayans ar ninport kisann-la ki pou ekout zot. Selman, zot fer sa avek enn “profon respe.” (1 Pier 3:15) Labib donn bann Kretien lord pou pa inpoz zot lopinion lor lezot. Li dir ki enn disip Zezi bizin pa “lager, me li bizin zanti anver tou dimounn,” mem bann dimounn ki pena mem krwayans ki li.—2 Timote 2:24.
Seki Labib dir lor laenn
Labib dir ki nou bizin “kontign viv anpe avek tou dimounn.” (Ebre 12:14) Enn kikenn ki kontan lape, li rezet laenn. Mem si li pa pou fer nanye ki kont so bann prinsip, li pou fer bann gro zefor pou viv anpe ar lezot. (Matie 5:9) Avredir, Labib ankouraz bann Kretien pou kontan zot bann lennmi. Zot fer sa kan zot montre zot bon anver bann dimounn ki tret zot dan enn move fason.—Matie 5:44.
Li vre ki Labib dir ki Bondie “pa kontan,” ouswa “deteste” bann kitsoz ki fer bann dimounn perdi zot dignite ouswa bann kitsoz ki fer lezot ditor. (Proverb 6:16-19) Me isi, Labib servi mo “deteste” pou montre santiman ki Bondie ena anver bann move kitsoz. Selman, Labib montre osi ki Bondie pre pou pardonn ek ed bann dimounn ki anvi sanze ek ki anvi swiv So bann prinsip.—Izai 55:7.
Bann verse Labib ki koz lor tolerans ek respe
Tit 3:2: “Zot bizin rezonab, ek touletan montre douser anver tou dimounn.”
Enn kikenn ki rezonab, li reponn avek douser mem si li pa dakor ar lopinion lezot. Li fer an sort ki sakenn respekte so kamarad.
Matie 7:12: “Alor, tou seki zot anvi bann dimounn fer pou zot, zot osi zot bizin fer parey pou bann-la.”
Nou tou nou bien kontan kan lezot respekte nou ek kan zot pran kont nou lopinion ek nou santiman. Pou aprann plis lor sa prinsip bien inportan la, get lartik « Qu’est-ce que la Règle d’or ? »
Zozwe 24:15: “Swazir zotmem zordi kisann-la zot pou servi.”
Kan nou rekonet ki lezot ena drwa fer zot prop swa, nou ede pou ki ena lape.
Zistwar Bann Zapot 10:34: “Bondie pa fer preferans.”
Bondie pa get de lizie; li pa gete si nou enn zom ouswa enn fam, li pa get nou ras, nou kiltir, nou nasionalite, ouswa lanvironnman kot nou’nn grandi. Bann dimounn ki anvi fer parey kouma Bondie, zot respekte tou dimounn.
Abakuk 1:12, 13: “[Bondie] pa kapav toler lemal.”
Bondie so tolerans ena bann limit. Li pa pou les bann move dimounn kontign fer lemal. Pou aprann plis lor la, get video Kifer Bondie Permet Soufrans?
Romin 12:19: “Les Bondie montre so koler; parski finn ekrir: ‘Zeova dir, “Mwa ki pou tir vanzans; mwa ki pou regle kont.”’”a
Pou Zeova, bann dimounn pena drwa tir vanzans. Li promet nou ki li pou fer nou gagn lazistis dan moman ki li’nn fixe. Pou aprann plis lor la, lir lartik « Y aura-t-il un jour la justice dans le monde ? »
a Zeova se nom Bondie. (Psom 83:18) Get lartik “Kisannla Zeova Ete?”