Dan gos: Siklonn Ian dan Florid, Letazini, Septam 2022 (Sean Rayford/Getty Images); omilie: Pe fer enn mama ek so garson al dan enn plas plis sekirite, Donetsk, Ikrenn, Ziliet 2022 (Alex Chan Tsz Yuk/SOPA Images/LightRocket via Getty Images); dan drwat: Pe teste boukou dimounn pou COVID, Beijing, Lasinn, Avril 2022 (Kevin Frayer/Getty Images)
KONTIGN VEYE!
2022: Enn Lane Bien Mouvmante—Ki Labib Dir lor La?
Pandan lane 2022, dan linformasion nou finn tann zis lager, problem ekonomik, ek bann katastrof natirel. Sa bann levennman ki pe arive la ena enn sinifikasion, ek se zis Labib ki explik nou sa.
Ki sinifikasion bann levennman ki’nn arive pandan lane 2022
Bann levennman ki finn arive pandan sa lane-la, montre ki nou pe viv seki Labib apel “bann dernie zour.” (2 Timote 3:1) Bann dernie zour finn koumanse an 1914. Remarke kouma bann levennman ki’nn fek arive, montre ki seki Labib ti predir, pe realize azordi:
“Lager.”—Matie 24:6.
“2022 Lane Kot Lerop Finn Ankor Enn Fwa Konn Bann Lefe Orib ki Lager Amene.”a
Get lartik « Invasion de l’Ukraine par la Russie » an Franse.
“Lafaminn.”—Matie 24:7.
“2022: Lane Kot Finn Ena enn Gran Lafaminn.”b
Get lartik “Akoz Lager dan Ikrenn, Pe Plis Mank Manze dan Lemond.”
“Bann lepidemi.”—Lik 21:11.
“Polio finn retourne, monkeypox pe koumans vinn enn gro problem, ek COVID-19 pe kontign afekte enn kantite dimounn. Tousala montre, ki kantite bann maladi kontazie zot danzere, ek kouma bann dimounn zot inpwisan devan sa bann maladi-la.”c
Get lartik “6 Milyon Dimounn Finn Mor Akoz COVID.”
“Bann kitsoz ki fer bien per.”—Lik 21:11.
“Bann tanperatir ki pe ogmante, lasesres, dife dan bann lafore, ek inondasion. Nou pou rapel lete 2022, kouma enn lete kot finn ena boukou sanzman klimatik. Akoz sa bann sanzman klimatik la, boukou kitsoz finn detrir, plizir milyon dimounn finn perdi zot lakaz ek plizir milyon finn mor.”d
Get lartik “Tanperatir Pe Monte dan Lemond Antie.”
“Bann dimounn pe revolte [ouswa, “kree dezord; fer bann revolision,” not.].”—Lik 21:9.
“Akoz bann problem ekonomik, finn ena boukou manifestasion pandan lane 2022, sirtou parski bann kitsoz pe kontign ogmante.”e
Get lartik “Lavi Inn Vinn Bien Ser dan Lemond Antie.”
Ki pe atann nou lane prosenn?
Personn pa kone ki pou arive an 2023. Me seki nou kone, se ki Rwayom Bondie, ouswa so gouvernman ki dan lesiel, pou amenn bann sanzman lor later. (Daniel 2:44) Sa gouvernman-la pou tir tou bann kitsoz ki pe fer bann dimounn soufer, ek pou fer sir ki volonte Bondie realize lor later.—Matie 6:9, 10.
Nou ankouraz ou pou kontign swiv konsey ki Zezi inn done, setadir pou “kontign veye,” ek gete kouma bann levennman ki pe arive dan lemond antie, pe realiz bann profesi ki ena dan Labib. (Mark 13:37) Labib kapav ed ou depi aster-la mem, ek li kapav donn ou ek ou fami enn vre lespwar pou lavenir. Si ou anvi aprann konn plis lor la, kontakte bann Temwin Zeova.
a AP News, “2022 Was Year the Horror of War Returned to Europe,” par Jill Lawless, 8 Desam 2022.
b World Food Programme, “A Global Food Crises.”
c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” par Lawrence O. Gostin, JD, 22 Septam 2022.
d Earth.Org, “What’s Behind the Record-Breaking Extreme Weather Events of Summer 2022?” par Martina Igini, 24 Oktob 2022.
e Carnegie Endowment for International Peace, “Economic Anger Dominated Global Protests in 2022,” par Thomas Carothers ek Benjamin Feldman, 8 Desam 2022.