Lete 2023: Pe Fer Pli So ki Abitie Fer—Ki Labib Dir lor La?

Partou dan lemond bann dimounn pe gagn pli so ki avan, ek pe gagn lezot katastrof ki lie avek sa saler-la. Anou get sertin remark konsernan sa sitiasion-la:

“Sa fer 174 an ki’nn koumans pran not bann tanperatir ki fer partou dan lemond, ek mwa Zin sa lane-la samem mwa Zin ki pli so ki nou’nn gagne.”—Agence américaine d’observation océanique et atmosphérique [NOAA], département du Commerce, 13 Ziliet 2023.
“Pe fer pli so dan Litali, Lespagn, Lafrans, Lalmagn, ek Pologn ek pe atann ki tanperatir pou mont ziska 48°C lor bann lil Sisil ek Sardegn, kitfwa sa pou bann tanperatir pli so ki zame inn gagne dan Lerop.”—Agence spatiale européenne, 13 Ziliet 2023.
“Amezir ki tanperatir later pe monte, nou kapav atann pou gagn bann pli gro lapli pli souvan, ek akoz sa, nou pou gagn bann pli gro inondasion.”—Stefan Uhlenbrook, directeur de l’hydrologie, de l’eau et de la cryosphère à l’Organisation météorologique mondiale, 17 Ziliet 2023.

Eski ou trakase kan ou tann sa bann nouvel-la? Anou get seki Labib dir lor sa size inportan la.

Eski Labib ti predir ki ti pou ena bann sanzman klimatik koumsa?

Wi. Dan lemond pe fer bien pli so ek pe gagn bann lezot sanzman klimatik, ek sa an-akor avek seki Labib ti predir konsernan nou lepok. Par exanp, Zezi ti predir ki nou pou trouv “bann kitsoz ki fer bien per,” ouswa “bann gran sign terifian.” (Lik 21:11; Nouvo Testaman Dan Kreol Morisien, NTKM) Parski pe fer pli so dan lemond, boukou dimounn per ki avek letan bann dimounn detrir later.

Eski li pou vinn inposib pou viv lor later?

Non. Bondie finn kree later pou ki bann dimounn viv lor la pou touletan; Li pa pou les zot detrir later. (Psom 115:16, Psom an Kreol Morisien, PKM; Ekleziast 1:4) Avredir, Li’nn promet ki Li “pou detrir bann ki pe detrir later.”—Revelasion 11:18.

Labib promet ki Bondie kapav protez later kont bann katastrof natirel, ek Li pou fer li.

“[Bondie] ti kalme laraz siklonn e bann vag ti koumans kalme.” (Psom 107:29, PKM) Bondie ena pouvwar pou kontrol bann lafors lanatir. Akoz bann problem klimatik, ena boukou problem lanvironnman ek sa pe fer bann dimounn soufer. Me Bondie ena pouvwar pou regle tou sa bann problem-la.
“To montre to lamour pou later e to aroz li. To nouri later, to fer li vinn fertil.” (Psom 65:9, PKM) Bondie pou fer an-sort ki later vinn enn paradi.

Labib promet ki Bondie pou repar later. Pou aprann plis lor la, lir lartik « Qui sauvera la terre ? »