Sekirite Bann Fam​—⁠Ki Labib Dir Lor la?

“Kan mo ti ankor zanfan, mo frer ti abiz lor mwa toulezour fizikman ek osi par so bann parol. Kan mo ti marye, mo belmer ti kontign maltret mwa. Li ek mo boper ti tret mwa kouma zot esklav. Mo ti bizin lit kont bann panse pou swisid mwa.”—Madhu,a Lenn.

L’organisation Mondiale de la Santé dir ki, “violans kont bann fam se enn kitsoz ki tous lemond antie”. Li dir ki enn fam lor trwa inn deza viktim violans fizik ouswa sexiel dan enn moman zot lavi.

Si sa inn deza ariv ou, kitfwa ou viv avek laper ki lezot abiz lor ou fizikman, sexielman ouswa an parol ninport kotsa ou ale. Akoz bann violans ek move tretman kont bann fam, kitfwa ou ena linpresion ki laplipar dimounn panse ki ‘Fam pena valer.’ Me eski bann fam ena valer pou Bondie?

Kouma Bondie konsider bann fam?

Verse: “Li [Bondie] ti kree zot zom ek fam.”—Zenez 1:27.

Sinifikasion: Bondie ti kree bann zom ek bann fam. Pou li, bann zom ek bann fam toule-de merit respe. Anplis, li atann ki enn mari “kontan so fam parey kouma li kontan limem,” fode pa li fer dominer ar li, servi bann parol blesan ouswa li violan avek li. (Efezien 5:33; Kolosien 3:19) Vremem, sekirite bann fam ena valer pou Bondie.

“Kan mo ti enn zanfan, enn manb mo fami ti abiz lor mwa sexielman. Kan mo ti ena 17 an, mo patron ti menas pou met mwa deor si mo pa ti gagn relasion avek li. Kan mo ti vinn enn adilt, mo misie, mo bann paran, ek mo bann vwazin ti rabes mwa. Me apre mo finn aprann lor Zeova,b nou Kreater. Li tret bann fam avek respe. Sa ti rasir mwa ki li kontan mwa ek ki mo ena valer devan so lizie.”—Maria, Arzantinn.

Kouma ou kapav geri sa bann blesir-la?

Verse: “Ena enn kamarad ki bien pli pros ki enn frer.”—Proverb 18:24.

Sinifikasion: Enn vre kamarad pou soutenir ou. Si ou panse sa kapav ed ou, partaz ou santiman avek enn kikenn ki ou kapav fer konfians.

“Pandan 20 an mo pa ti dir personn ki mo ti agrese sexielman. Sa ti rann mwa malere, mo ti angwase, ek deprime. Me kan mo ti rakont seki ti ariv mwa ar enn kikenn ki ti pre pou ekout mwa, mo ti santi enn soulazman.”—Elif, Tirki.

Verse: “Zet tou zot traka lor li [Bondie], parski li gagn zot traka.”—1 Pier 5:7.

Sinifikasion: Kan ou priye, Bondie vremem ekoute.(Psom 55:22; 65:2) Parski li gagn ou traka, li kapav ed ou pou konpran ki kantite ou ena valer devan so lizie.

“Aprann konn Zeova finn ed mwa pou geri sa bann blesir bien profon ki mo ti ena la. Aster mo kapav konfie mwa ar Bondie dan lapriyer. Li kouma enn kamarad ki vremem konpran mo bann santiman.”—Ana, Beliz.

Eski enn zour Bondie pou aret bann move tretman kont bann fam?

Verse: “Zeova . . . pou fer lazistis anver bann orfelin ek bann ki kraze, Pou ki bann zom mortel nepli fer zot per.”—Psom 10:17, 18.

Sinifikasion: Bondie pou eliminn tou linzistis, parmi ena kriote ek violans anver bann fam.

“Sa finn azir kouma enn pansman lor mo bann blesir kan mo ti aprann ki Zeova biento pou aret tou bann move tretman ki pe fer kont bann madam ek bann zenn tifi. Sa ti donn mwa enn lape lespri.”—Roberta, Mexik.

Pou aprann plis kouma Labib kapav donn enn lespwar, kifer ou kapav fer konfians so bann promes, ek kouma bann Temwin Zeova kapav ed ou atraver Labib zordi, demann enn vizit sa kikenn ki’nn donn ou sa lartik-la.