Ki Bann Siantis Pa Kapav Dir?
Li paret ki bann siantis inn etidie preske tou bann parti liniver ki nou kone. Kanmem sa, ena bann kestion bien inportan ki zot pa kapav reponn.
Eski lasians kapav explike kouma liniver ek lavi finn koumans existe? Non. Sertin dir ki bann siantis ki finn etidie lor liniver kapav explik so lorizinn. Me selman, Marcelo Gleiser, ki enn profeser astronomi dan Dartmouth College, ek ki osi ena bann dout lor lexistans Bondie, dir: “Nou pa finn kapav explik lorizinn liniver.”
Parey, konsernan lorizinn lavi, enn lartik dan magazinn Science News dir: “Li inposib pou determine kouma lavi finn vremem koumanse lor Later. Laplipar bann ros ek fosil ki kapav montre kouma Later ti ete o-koumansman nepli existe.” Tousala montre ki lasians pankor gagn repons sa kestion-la: Kouma liniver ek lavi finn koumanse?
Me kitfwa ou pe demann oumem, ‘Si lavi pa finn aparet par limem, kisannla ki finn kree sa?’ Kitfwa ou’nn poz oumem sa bann kestion-la osi: ‘Si enn Kreater ki bien saz ek ki ena lamour existe, kifer Li permet ki bann dimounn ki Li’nn kree, soufer? Kifer Li permet ki ena otan diferan relizion? Kifer Li permet so bann serviter fer sa kantite move kitsoz la?’
Lasians pa kapav donn nou sa bann repons-la. Me sa pa vedir ki nou pa kapav gagn sa bann repons-la. Ofet, boukou dimounn finn gagn bann repons ki lozik dan Labib.
Si ou anvi kone kifer sertin siantis, ki finn pran letan pou etidie Labib, dir ki zot krwar dan enn Kreater, al lor nou sit jw.org/mfe. Rod seri video Lopinion lor Kouma Lavi Inn Koumanse.