Sak zour, bann dimounn fer boukou zefor pou gagn seki zot bizin. Anplis, bann problem ki ena dan sa lemond-la kapav fer sa vinn pli difisil ankor. Kifer?
Souvan kan ena bann problem dan enn landrwa ouswa dan enn pei, lavi vinn bien ser, par exanp, pri bann lakaz ek manze, zot ogmante.
Akoz bann problem ki ena dan lemond, bann dimounn kapav perdi zot travay ouswa zot bizin travay pli boukou pou gagn tigit kas.
Bann katastrof natirel detrir lakaz bann dimounn, zot biznes, ouswa bann lezot kitsoz ki zot ena. Ek akoz sa, boukou vinn mizer.
Seki Ou Bizin Kone
Si ou zer bien ou kas, sa pou ed ou pou fer fas ar bann problem ki kapav arive.
Li inportan ki ou rapel ki ou kas, ou bann lekonomi, ek bann kitsoz ki ou ena, zot tanporer ek zot kapav perdi valer.
Ena bann kitsoz ki larzan pa kapav aste, kouma par exanp linite dan lafami ek lazwa.
Seki Ou Kapav Fer
Labib dir: “Si nou ena manze pou nouri nou ek linz pou abiye, li ase.”—1 Timote 6:8.
Sa bann parol-la montre nou ki nou bizin kontrol nou bann lanvi ek ki nou bizin satisfe kan nou gagn seki nou bizin sak zour. Ek li bien inportan ki nou fer sa sirtou kan nou nepli gagn mem kantite kas ki avan.
Enn kitsoz ki kapav ed ou, se kan ou sinplifie ou lavi. Si ou fason viv depas seki ou mwayin kapav permet ou, ou pou gagn bann problem kas.