ESKI NOU PLANET POU KAPAV SIRVIV?

NOU DELO

LAVI lor later ti pou inposib si pa ti ena delo, sirtou delo ki nou bwar. Delo li mazorite konpozan dan lekor tou bann kreatir ki vivan. Bann larivier, bann lak, bann marekaz ek bann delo lasours, zot la pou bann dimounn ek bann zanimo kapav bwar, ek osi pou aroz nou bann plantasion ek pou bokou lezot kitsoz ankor.

Seki Pe Afekte Nou Delo

Mazorite nou planet li kouver ar delo. Me selman, World Meteorological Organization dir ki se “zis 0.5% delo lor later ki nou kapav servi pou viv.” Mem si li kapav paret tigit, sa kantite delo la sipoze ase pou ki ena lavi lor later. Me azordi akoz dimounn pe bizin plis delo, ek osi akoz polision ek sanzman klima, pa pe kapav servi enn bon parti nou delo kouma bizin pou nou viv. Bann exper predir ki dan 30 an, sink milyar dimounn kitfwa pa pou ena ase delo pou kapav viv.

Nou Planet Inn Kree dan enn Fason pou Sirviv

Nou planet finn kree dan enn fason pou ki touletan ena ase delo pou viv. Bann kreatir vivan dan lamer, later ek mem lalimier soley fer zot par pou pirifie nou delo. Anou get de-trwa prev ki montre ki nou planet inn kree dan enn fason pou sirviv.

Ena bann prev ki montre ki seki ena dan later kapav ede pou tir bann kitsoz ki polie delo. Dan bann marekaz, ena sertin plant ki kapav tir nitrozenn, fosfor, ek bann pestisid.
Bann siantifik inn reisi konpran kouma delo res prop dan lanatir. Kan delo larivier pe desann, bann sibstans toxik diminie ek lerla bann bakteri ki ena dan delo fonn sa bann sibstans la.
Dan zis de-trwa zour, bann palourd ek bann moul zot kapav tir sertin sibstans danzere ki ena dan delo, ek kitfwa zot kapav mem pirifie delo pli bien ki bann lizinn ki fer bann tretman delo pou bwar.
Nou planet ena enn sistem ki resikle delo; apel sa sistem idrolozik ouswa water cycle (sik delo). Sa sik-la anpes delo al an deor nou latmosfer.

ESKI OU TI KONE?

Later—Enn Filt Natirel pou Delo

Kan delo desann dan later, ena bann prev ki montre ki later ena kapasite pou retir bann metal, bann sibstans toxik, bann debri natirel ek bann lezot salte. Kan delo la ariv net anba dan souterin, li revinn prop ek kapav bwar li.

Enn Filt Ki Retir Bann Salte

Disab ek bann ti ros zot kouma enn paste ki blok sertin salte.

Enn Filt Ki Blok Bann Sibstans Toxik

Bann mikrob ki res dan later kapav blok bann sibstans ki toxik pou bann imin. Sertin bakteri kapav mem fer bann delwil toxik vinn carbon dioxide ek delo.

Enn Filt Ki Retir Bann Sibstans Simik

Sertin kalite later ena kapasite pou piez bann sibstans toxik akoz zot ena enn ti sarz elektrik. Par exanp, si enn later ena enn sarz elektrik ki negatif, li kapav tir sertin sibstans toxik ki ena enn sarz elektrik ki pozitif, dan delo-la.

Seki Bann Dimounn Pe Fer

Zimaz: 1. Enn misie pe repar enn perdision delwil anba so loto. Li servi enn resipian pou rekiper delwil-la. 2. Enn misie pe kit bann resipian vid ki ti ena bann prodwi simik ladan, dan enn sant resiklaz. — Kan nou repar bann perdision delwil ek kan nou zet bann prodwi toxik kouma bizin, nou ede pou gard nou bann lasours delo prop

Bann exper rekomann bann dimounn pou fer zot maximum pou prezerv delo. Pou diminie kontaminasion delo, zot konsey pou repar tou bann perdision delwil dan nou bann transpor ek pa zet bann medsinn ki pa servi dan twalet ouswa pa zet bann prodwi toxik dan drin.

Bann inzenier inn trouv enn metod extraordiner ek modern pou pran delo lamer pou tir disel ki ena ladan. Zot lobzektif se pou ogmant delo dou pou kapav servi.

Me tousala li pa ase. Parski mem sa sistem pou tir disel dan delo lamer la, li kout tro ser ek li pran tro boukou lenerzi pou ki realiz zot partou. An 2021, dan enn rapor ki koz lor kouma pou protez nou delo, Nations Unies ti dir: “Dan lemond antie, bann zefor ki nou pe fer aster-la konsernan delo pou bizin double.”

Ki Lespwar Nou Ena—Seki Labib Dir

“Bondie . . . fer bann gout delo mont lao; zot vinn lavaper ek apre zot vinn lapli; lerla, lapli tonbe depi bann niaz; li tom lor tou dimounn.”—Zob 36:26-28.

Bondie inn kree bann sik natirel pou protez delo lor later.—Ekleziast 1:7.

Reflesi lor la: Si nou Kreater inn fer later dan enn fason ki li pirifie delo par limem, eski ou pa panse ki Li anvi ek Li kapav repar bann dega ki bann dimounn inn fer ar nou delo? Get lartik “Bondie Promet ki Nou Planet Pou Sirviv,” lor paz 15.