LAVI PE VINN PLI SER—KOUMA POU FER FAS?

Aksepte Sitiasion-La

Nou kapav pa remarke ki bann pri pe ogmante tigit-tigit si anmemtan nou lapey osi pe ogmante. Me kan bann pri monte ek ki nou lapey res parey, sa kapav fer nou trakase ek strese, sirtou si nou ena enn fami pou pran swin.

Nou pa kapav anpes bann pri ogmante. Me kan nou aksepte sitiasion-la kouma li ete, noumem nou pou gagnan.

KIFER SA LI INPORTAN?

Bann dimounn ki aksepte ki zot pena kontrol lor bann pri ki pe monte, trouv sa pli fasil pou . . .

res kalm. Kan nou res kalm, nou reflesi pli bien ek nou pran bann pli bon desizion.
aret bann move labitid. Par exanp, li pa pou bon si nou pa pey nou bann bil, ouswa nou depans kas lor bann kitsoz ki nou pa bizin.
evit bann diskision ar bann manb nou fami akoz kas.
rod bann lezot solision, kouma par exanp diminie nou bann depans ek gete ki bann kitsoz nou vremem bizin.

SEKI OU KAPAV FER

Ou bizin pre pou adapte ou. Kan bann pri monte enn sel kout, li bon ki nou diminie nou bann depans. Ena dimounn esey gard enn nivo lavi ki zot mwayin pa permet zot ena ek lerla, se koumadir zot pe naz kont kouran. Ek akoz sa, zot fini zot net. Li normal ki ou anvi pran swin ou fami ek donn zot seki zot bizin! Me rapel sa: Ou fami bizin ou lamour, ou letan ek ou latansion plis ki ninport ki kitsoz.

“Eski traka ki to pran ar to lavi, pou fer li vinn pli long?”—Lik 12:25, Nouvo Testaman dan Kreol Morisien.

“Fode zame zot gagn traka pou landemin, parski landemin ena so bann prop traka. Sak zour ena so bann prop problem.”—Matie 6:34.

Kan enn dimounn esey gard enn lavi lix alor ki so mwayin pa permet li fer sa, se koumadir li pe naz kont-kouran dan gro delo