LAVI PE VINN PLI SER—KOUMA POU FER FAS?
Montre Ou Zenere
Si ou pe lite pou zwenn le-de-bout akoz lavi pe vinn ser, ou kapav panse ki li pou difisil pou montre ou zenere. Me selman, ou pou trouve ki kan ou zenere, sa pou ed ou pou fer fas ar bann problem larzan. Ou kapav fer lekonomi ek anmemtan montre ou zenere.
KIFER SA LI INPORTAN?
Kan nou donn lezot, mem dan bann ti kitsoz, sa rann nou ere ek nou santi nou bien. Sertin dokter dir ki kan nou done, sa kapav bon pou nou lasante fizik ek mantal. Par exanp, sa kapav diminie nou langwas, nou stres, nou tansion ek mem nou bann douler. Sa kapav fer nou osi dormi pli bien.
Kan nou ed lezot, ki li enn ti-kas ouswa dan enn lot fason, plitar si nou bizin led, li pou pli fasil pou nou aksepte sa led-la. Howard, ki res Langleter, dir: “Kan mwa ek mo madam nou rod bann fason pou montre nou zenere ek pou ed lezot, nou santi ki nou pa enn fardo kan se nou tour pou resevwar led.” Se vre, bann dimounn ki vremem zenere, zot pa atann nanye an-retour. Me seki zot kapav gagne, se bann vre kamarad ki kontan pou ed zot dan ler ki bizin.
SEKI OU KAPAV FER
Partaz seki ou ena. Mem si ou pena boukou pou done, ou kapav touzour partaz avek lezot, mem si se zis enn sinp ti-repa. Duncan ek so fami, ki res Ouganda, zot bien pov, me kanmem sa zot bien zenere. Duncan dir: “Dan Dimans, mwa ek mo madam nou invit enn kikenn lakaz pou pran enn ti-repa. Nou kontan pou pas letan avek lezot.”
Selman kan ou partaz ar lezot, ou bizin rezonab. Ou pa anvi ki ou fami mank seki zot bizin ek soufer parski ou’nn telman partaz avek lezot.—Zob 17:5.
Esey sa: Invit enn kikenn pou pran enn ti-repa ouswa pou bwar enn ti-kitsoz. Si ou ena bann kitsoz ki ou nepli servi, kifer ou pa donn sa ou bann kamarad ouswa ou bann vwazin? Sa kapav servi zot ek ed zot.
Donn dan bann lezot fason. Sertin parmi bann pli zoli kado, se bann kado ki pena pri. Par exanp, nou kapav donn lezot nou letan ek nou latansion kan nou fer bann kitsoz ki pou ed zot. Mem bann parol zanti kapav enn kado! Alor, dir lezot komie ou apresie zot ek ou kontan zot.
Esey sa: Ed lezot avek zot louvraz lakaz, bann reparasion ki ena pou fer dan zot lakaz, ouswa fer bann ti komision pou zot. Ekrir ou kamarad enn zoli ti kart ouswa avoy li enn ti mesaz, mem si se zis pou dir li ki ou pe pans li.
Kan ou rod bann lokazion pou montre ou zenere, ou pou pli ere.