Zistwar 5

Enn Lavi Difisil Koumanse

ANDEOR zardin Éden, Adam ek Ève ti gagn boukou problem. Zot ti bizin travay dir pou gagn zot ti bouse manze. Otour zot, ti ena bann pie pikan, pa bann zoli pie frwi. Ala seki ti arive kan Adam ek Ève ti dezobeir Bondie ek ti perdi so lamitie.

Me seki pli pir ladan se ki tigit par tigit zot finn koumans mor. Sirman to rapel ki Bondie ti defann zot manz frwi ki lor enn pie dan zardin. Si zot ti fer sa zot ti pou mor. Samem ki’nn arive: Zour ki zot ti manz sa frwi-la, sa zour lamem tigit par tigit zot inn koumans vinn vie, ek finalman zot inn mor. Zot finn fer enn gran erer kan zot pa’nn ekout Bondie!

Adam ek Ève ti gagn bann zanfan apre ki Bondie ti met zot deor dan zardin Éden. Savedir ki bann zanfan-la osi ti pou vinn vie ek ti pou mor.

Si Adam ek Ève ti’nn obeir Jéhovah, zot ek zot bann zanfan ti pou ere. Zot tou ti pou kapav viv pou touletan lor later. Personn pa ti pou vinn vie, ni tom malad ni mor.

Bondie anvi ki bann dimounn viv ere pou touletan, ek Li promet ki enn zour sa pou arive. Lerla, later antie pou vinn enn paradi, ek tou bann dimounn pou ena enn bon lasante. Tou dimounn pou ena enn bon lamitie ant zotmem ek avek Bondie.

Me Ève li, li ti nepli kamarad Bondie, ek sa finn amenn bann konsekans. Li ti gagn boukou douler kan li ti gagn zanfan. Li ti konn boukou sagrin dan so lavi parski li ti dezobeir Jéhovah.

Adam ek Ève ti gagn boukou garson ek boukou tifi. Zot ti apel zot premie garson Caïn, ek deziem-la Abel. Ki’nn ariv zot? Eski to kone?

Genèse 3:16-23; 4:1, 2; Révélation 21:3, 4.