Dan ki Kitsoz Bann Temwin Zeova Krwar?

“Nu panse ki li bon ki nu tann twa dir seki to panse, parski vremem konsernan sa sekt la, nu kone ki partu zot pe koz kont li.” (Akt 28:22) Sa bann sef komite Romin dan premye syek la finn les enn bon legzanp. Zot ti anvi gayn bann temwanyaz depi lasurs la mem, olye ki zot ekut bann kritik an deor.

Zordi usi parey, suvan buku koz kont bann Temwin Zeova, ek nu pu fer enn erer si nu rod konn laverite lor zot atraver bann lasurs ki pa sir. Akoz sa, nu byin kontan pu explik u detrwa nu bann krwayans prinsipal.

Labib, Zezi Kris, ek Bondye

Nu aksepte ki “tu lekritir [finn ekrir] par direksyon Bondye ek li profitab.” (2 Timote 3:16) Ek mem si ena dir ki swadizan nu pa bann vre Kretyin, sa li pa vre. Nu dakor net avek temwanyaz ki lapot Pyer finn done lor Zezi Kris: “Pena enn lot non anba lesyel ki finn done parmi bann zom pu ki nu bizin sape.”—Akt 4:12.

Me, pwiski Zezi finn dir ki li “Garson Bondye” ek ki so “Papa ki finn avoy li,” bann Temwin Zeova krwar ki Bondye pli gran ki Zezi. (Zan 10:36; 6:57) Zezi li mem ti rekonet: “[Mo] Papa pli gran ki mwa.” (Zan 14:28; 8:28) Alor, nu pa krwar dan lanseynman Trinite ki dir ki Zezi egal avek so Papa. Olye sa, nu krwar ki Bondye finn kre li ek ki li pli titpti ki Bondye.—Kolosyin 1:15; 1 Korintyin 11:3.

An Kreol non Bondye li Zeova. Labib dir: “Ki zot kone ki to tusel, to non ZEOVA, to Pli Ot lor later.” (Psom 83:19, Crampon 1905) An akor avek sa bann parol la, Zezi finn montre ki kantite non Bondye li inportan; li finn montre so bann disip kuma bizin priye: “Nu Papa ki dan lesyel, ki to non vinn sin.” Ek li mem li ti priye Bondye: “Mo finn fer konn to non devan bann zom ki to finn donn mwa.”— Matye 6:9; Zan 17:6.

Bann Temwin Zeova krwar ki zot bizin fer lezot konn non Bondye ek konn so bann proze parey kuma Zezi ti fer. Donk, nu finn pran non Temwin Zeova parski nu fer parey kuma Zezi, ki apel “Temwin fidel.” (Revelasyon 1:5; 3:14) Zisteman, Izai 43:10 dir lor lepep ki reprezant Bondye: “‘Zot mo bann temwin,’ sa mem ki Zeova pe dir, ‘mem mo serviter ki mo finn swazire.’”

Rwayom Bondye

Zezi ti anseyn so bann disip pu priye, “Ki to Rwayom vini,” ek li ti fer sa Rwayom la vinn tem prinsipal so minister. (Matye 6:10; Lik 4:43) Bann Temwin Zeova krwar ki sa Rwayom la li enn vre guvernman dan lesyel ki pu diriz later ek ki Zezi Kris li Lerwa ki finn swazire dan sa Rwayom la. Labib dir: “Sa guvernman la pu lor so zepol. So guvernman ek lape pa pu fini zame.”—Izai 9:6, 7, King James Version.

Pa Zezi Kris tusel ki pu lerwa dan guvernman Bondye. Li pu ena buku dirizan ki pu reyne ansam avek li dan lesyel. Lapot Pol finn ekrir: “Si nu kontiyn siporte, nu usi, nu pu reyne ansam kuma bann lerwa.” (2 Timote 2:12) Labib presize ki sa bann dimunn ki pu resisite la pu reyne avek Zezi Kris dan lesyel. An tu zot “san karant-kat mil, ki finn aste depi lor later.”—Revelasyon 14:1, 3.

Li normal ki tu guvernman bizin ena enn lepep. Bann Temwin Zeova krwar ki apart bann seki pu al dirize dan lesyel, ena bann milyon lezot dimunn ki pu gayn lavi pu tuletan. Lerla, later pu vinn enn zoli paradi, ek li pu ranpli avek tu bann ki merite viv anba reyn Rwayom Bondye. Zot tu pu sumet zot ar reyn Kris ek so bann asosye. Akoz sa, bann Temwin Zeova san-pursan sir ki zame later pa pu detrir ek ki sa promes Bondye la pu realize: “Bann dimunn drwat pu gayn later, ek zot pu res pu tuletan lor la.”— Psom 37:29; 104:5.

Me kuma eski Rwayom Bondye pu vini? Eski li pu vini kan tu bann lepep pu aksepte sumet zot volonterman ar sa Rwayom la? Okontrer, Labib montre ki an realite, kan Rwayom Bondye pu vini, Li pu pran kont bann zafer lor later. Li dir: “Bondye lesyel pu etabli enn rwayom ki zame pa pu rwine. Ek sa rwayom la li mem . . . pu kraz tu sa bann rwayom la ek li pu fini zot net ek, li mem pu res la pu tuletan.”—Danyel 2:44.

Kan Rwayom Bondye pu vini? Kan bann Temwin Zeova baz zot lor bann profesi Labib, zot krwar ki sa Rwayom la li deryer laport. Nu invit u pu egzaminn detrwa bann profesi ki finn anons bann evennman ki ti pu ena dan “bann dernye zur” sa move sistem la. Sa bann profesi la finn ekrir dan Matye 24:3-14; Lik 21:7-13, 25-31; 2 Timote 3:1-5.

Parski ‘nu kontan nu Bondye Zeova avek tu nu leker, tu nu nam, tu nu lespri ek tu nu lafors; ek nu kontan nu kamarad kuma nu mem,’ nu pa get nasyon, ras uswa ran sosyal. (Mark 12:30, 31) Bann dimunn remark byin lamur ki ena parmi nu bann frer Kretyin ki sorti dan tu bann nasyon. (Zan 13:35; 1 Zan 3:10-12) Alor, nu pa pran par dan bann zafer politik sa bann nasyon la. Plito, nu sey fer parey kuma bann premye disip Zezi. Konsernan sa bann disip la, Zezi ti dir: “Zot pa fer parti dan lemond, parey kuma mwa, mo pa fer parti dan lemond.” (Zan 17:16) Pu nu, res separe avek lemond vedir ki nu bizin pa ena bann move kondwit ki byin normal zordi zur, kuma koz manti, kokin, gayn relasyon sexyel avan maryaz, adilter, lavi omosexyel, mal servi disan, idolatri ek bann lezot kitsoz parey ki Labib kondane.—1 Korintyin 6:9-11; Efezyin 5:3-5; Akt 15:28, 29.

Lespwar pu lavenir

Bann Temwin Zeova krwar ki ena enn lavi pli meyer ki sa lavi ki nu pe viv zordi zur la. Nu krwar ki Zeova finn avoy Kris lor later pu vers so disan kuma enn ranson pu ki bann dimunn kapav paret drwat devan Bondye ek pu ki zot kapav gayn lavi pu tuletan dan enn nuvo sistem. Sa mem ki enn zapot Zezi ti dir: “Nu paret drwat asterla par so disan.” (Romin 5:9; Matye 20:28) Bann Temwin Zeova ena enn gran rekonesans pu Bondye ek pu So garson pu sa ranson ki rann enn lavi posib dan lavenir.

Bann Temwin Zeova san-pursan sir ki lavi pu pli bon dan lavenir, kot lerla Rwayom Bondye pu mem resisit bann dimunn mor. Wi, parey kuma Labib montre, nu krwar ki kan enn dimunn mor, li aret egziste, “sa zur la mem, so bann panse mor.” (Psom 146:3, 4; Ezekyel 18:4; Eklezyast 9:5) Pu ki bann dimunn mor reviv, fode ki Bondye gard zot dan so memwar pu Li resisit zot.—Zan 5:28, 29.

Me enn lot kote, bann Temwin Zeova sir ki, kan Rwayom Bondye pu detrir sa bann guvernman ki egziste azordi la, buku ki pe viv asterla pu kapav sape parey kuma Noe ek so fami ti sape dan Deliz. Lerla, zot pu kapav zwir lavi pu tuletan lor enn later prop. (Matye 24:36-39; 2 Pyer 3:5-7, 13) Me selman, nu krwar ki pu sape, nu bizin fer seki Zeova pe demande. Sa mem ki Labib dir: “Lemond pe pase . . . , me seki fer volonte Bondye pu res pu tuletan.”—1 Zan 2:17; Psom 37:11; Revelasyon 7:9, 13-15; 21:1-5.

Li normal ki la, nu pa pu kapav koz lor tu bann krwayans bann Temwin Zeova. Me, nu ankuraz u pu gayn plis ranseynman.

Amwin deza indike, tu bann tex Labib ki site finn tradir depi New World Translation of the Holy Scriptures.

[Blurb on page 4]

Nu finn pran non Temwin Zeova parski nu fer parey kuma Zezi