Sapit 16

Kuma Eski U Kapav Vinn Pros ar Bondye

1. Ki bann resanblans byin kler ena dan buku relizyon?

ENN turis ki ti pe vizit enn peyi Oryantal ti etone kan li ti truv bann servis relizye dan enn tanp Budis. Malgre ki pa ti ena zimaz Mari uswa Kris, buku sa bann seremoni relizye la ti parey kuma bann seremoni ki fer dan legliz kot li dan so peyi. Par egzanp, li finn remarke ki bann dimunn ti pe fer saple ek zot ti pe resit bann lapriyer. Lezot dimunn usi finn truv bann resanblans kumsa. Ki li bann peyi dan Les, uswa bann peyi dan Lwes, bann dimunn ena mem fason pu zot vinn pros ar Bondye uswa ar bann kitsoz ki zot adore.

2. Kuma finn dekrir lapriyer, ek kifer buku dimunn priye?

² Buku sey vinn pros ar Bondye par lapriyer. Dapre enn ansiklopedi, lapriyer li “enn kominikasyon ant zom ek seki sakre uswa sin—Bondye, bann bondye, lemond lespri, uswa bann lafors ki pa natirel.” (The New Encyclopædia Britannica) Me, ena priye Bondye zis pu ki zot kapav gayn kitsoz an retur. Par egzanp, enn fwa, enn misye finn demann enn Temwin Zeova: “Si u priye pu mwa, eski mo bann problem fami, travay ek lasante pu regle?” Dapre lord, dimunn la ti panse ki vremem sa ti pu arive, me buku priye ek zot truv zot problem tuzur la mem. Alor, nu kapav demande, ‘Pu ki rezon nu bizin vinn pros ar Bondye?’

KIFER ESKI NU BIZIN VINN PROS AR BONDYE

3. Kisannla nu bizin priye, ek kifer?

³ Lapriyer pa enn seremoni relizye ki pena sans, ni li zis enn mwayin pu gayn kitsoz. Nu priye Bondye sirtu pu ki nu relasyon avek Li vinn byin pros. Alor, nu bizin priye Bondye Zeova. David ki ti ekrir bann psom, finn dir: “Zeova pre ar tu bann ki invok Li.” (Psom 145:18) Zeova invit nu pu devlop enn relasyon dan lape avek Li. (Izai 1:18) Bann ki aksepte sa linvitasyon la dakor avek seki enn ekrivin psom ti dir: “Apros ar Bondye li bon pu mwa.” Kifer? Parski bann ki vinn pros ar Bondye Zeova pu zwir vre boner ek lape lespri.—Psom 73:28.

4, 5. (a) Kifer eski li inportan priye Bondye? (b) Ki kalite relasyon nu kapav devlope ar Bondye atraver lapriyer?

⁴ Kifer eski nu bizin priye Bondye pu demann Li led, si Li ‘kone ki nu bizin, avan mem ki nu demann Li’? (Matye 6:8; Psom 139:4) Nu lapriyer montre ki nu ena lafwa an Bondye, ek nu konsider Li kuma Lasurs “tu don ki bon ek ki parfe.” (Zak 1:17; Ebre 11:6) Zeova pran plezir pu ekut nu bann lapriyer. (Proverb 15:8) Li kontan pu ekut nu bann parol ki donn Li laglwar ek ki montre ki nu apresye Li, parey kuma enn papa kontan pu tann so zanfan dir li bann parol sinser ki ranpli ar rekonesans. (Psom 119:108) Kot ena enn bon relasyon ant papa ek zanfan, ena usi enn kominikasyon ki fer leker kontan. Si enn zanfan santi ki so papa kontan li, li pu anvi koz avek li. Pu nu relasyon avek Bondye usi, li parey. Si vremem nu apresye seki nu pe aprann lor Zeova ek lamur ki Li finn montre pu nu, nu pu ena enn gran dezir pu koz ar Li dan lapriyer.—1 Zan 4:16-18.

⁵ Nu bizin apros Bondye, sa Kikenn ki Pli Ot la, avek buku respe, me li pa neseser ki nu tro trakase ki bann mo egzak nu pu dir Li. (Ebre 4:16) Nu kapav koz ar Zeova tuletan. Ek li vremem enn privilez pu kapav ‘uver nu leker’ ar Bondye dan lapriyer! (Psom 62:8) Si nu apresye Zeova, sa pu permet nu devlop enn relasyon salere avek Li, parey kuma fidel Abraam ki ti kamarad Bondye. (Zak 2:23) Me, pu nu priye Suverin Senyer liniver, nu bizin fer sertin kitsoz ki Li demande pu vinn pros ar Li.

KI BONDYE DEMANDE PU NU VINN PROS AR LI

6, 7. Malgre ki Bondye pa demann larzan pu Li ekut nu lapriyer, ki kitsoz kan mem Li demann nu kan nu priye?

⁶ Eski bizin larzan pu vinn pros ar Bondye? Buku dimunn pey bann pret pu fer lapriyer pu zot. Ena mem panse ki zot bizin fer bann gran donasyon, pu ki Bondye ekut zot lapriyer. Me, Parol Bondye pa dir ki nu bizin donn larzan pu apros ar Zeova dan lapriyer. Nu pa bizin pey okenn pri pu profit bann laranzman spirityel ki Bondye fer, ek bann benediksyon ki nu gayne grasa nu relasyon avek Li dan lapriyer.—Izai 55:1, 2.

⁷ Ki Bondye demande, alor? Li neseser ki nu ena enn bon latitid dan nu leker. (2 Kronik 6:29, 30; Proverb 15:11) Nu bizin ena lafwa dan nu leker ki Zeova Li enn “Kikenn ki tann lapriyer” ek “ki rekonpans bann ki fer zefor pu rod Li.” (Psom 65:2; Ebre 11:6) Nu bizin usi ena imilite dan nu leker. (2 Lerwa 22:19; Psom 51:17) Dan enn so bann legzanp, Zezi ti koz lor enn zom ki ramas larzan tax ek enn Farizyin. Alor ki sa zom la ti abes li, Farizyin la ti vantar. Bondye finn truv zom la pli drwat ki Farizyin la parski li ti ena imilite ek enn leker pre pu sumet. (Lik 18:10-14) Kan nu apros ar Bondye dan lapriyer, nu bizin rapel ki “Zeova deteste enn kikenn ki fyer dan so leker.”—Proverb 16:5.

8. Si nu anvi ki Bondye reponn nu bann lapriyer, avek ki kitsoz sal nu bizin debaras nu?

⁸ Si n’ule ki Bondye ekut nu bann lapriyer, nu bizin netway nu ek aret fer pese. Kan disip Zak ti ankuraz lezot pu vinn pros ar Bondye, li ti azute: “Netway zot lamin, zot ki fer pese, ek fer zot leker vinn prop, zot bann ki pa kapav deside.” (Zak 4:8) Mem bann ki fer bann move aksyon kapav devlop enn relasyon dan lape avek Zeova, si zot repanti ek zot sanz zot lavi. (Proverb 28:13) Nu pa kapav atann ki Zeova ekut nu, si nu fer sanblan netway nu lor plan spirityel. Parol Bondye dir: “Lizye Zeova lor bann ki drwat, ek so zorey ekut zot bann siplikasyon; me figir Zeova kont bann ki fer bann move kitsoz.”—1 Pyer 3:12.

9. Atraver kisannla nu bizin apros ar Zeova, ek kifer?

⁹ Labib dir: “Pena enn zom drwat lor later ki fer tuletan seki bon ek ki pa fer pese.” (Eklezyast 7:20) Alor, u kapav demande: ‘Be, kuma eski nu kapav vinn pros ar Bondye Zeova?’ Labib reponn: “Si enn kikenn arive komet enn pese, nu ena enn avoka kot Papa, Zezi Kris, enn [kikenn ki] drwat.” (1 Zan 2:1) Mem ki nu inparfe, nu kapav apros ar Bondye avek fransiz atraver Zezi Kris, ki finn mor kuma enn ranson pu nu. (Matye 20:28) Zis atraver Zezi ki nu kapav vinn pros ar Bondye Zeova. (Zan 14:6) Fode pa ki nu panse ki tuletan sakrifis ranson Zezi pu kuver nu bann pese, mem si nu kontiyn fer pese volonterman. (Ebre 10:26) Mem si nu pe lite pu pa fer seki move, li arive defwa nu fer erer, alor nu kapav repanti ek demann Bondye pardon. Kan nu apros ar Li avek imilite, Li pu ekut nu.—Lik 11:4.

BANN LOKAZYON PU KOZ AR BONDYE

10. An seki konsern lapriyer, kuma eski nu kapav swiv legzanp Zezi, ek ki bann lokazyon nu ena pu fer bann lapriyer personel?

¹⁰ Pu Zezi Kris, so relasyon avek Zeova ti ena buku valer. Akoz sa, li ti truv letan pu koz ar so Papa personelman dan lapriyer. (Mark 1:35; Lik 22:40-46) Nu pu fer byin si nu swiv legzanp Zezi ek nu priye Bondye regilyerman. (Romin 12:12) Li bon pu kumans nu lazurne par enn lapriyer, ek avan nu al dormi, nu kapav remersi Zeova pu nu lazurne. Pandan lazurne, fer u enn devwar pu apros ar Bondye “dan tu lokazyon.” (Efezyin 6:18) Nu kapav mem priye dusma-dusma dan nu leker, parski nu kone ki Zeova kapav tann nu. Si nu koz ar Bondye personelman, nu relasyon avek Li pu vinn pli solid. Ek si nu priye Zeova tulezur, sa pu fer nu vinn ankor pli pros ar Li.

11. (a) Kifer eski bann fami bizin priye ansam? (b) Kan u dir “Amenn” kan lapriyer fini, ki sa vedir?

¹¹ Zeova ekut usi bann lapriyer ki reprezant enn grup dimunn. (1 Lerwa 8:22-53) Nu kapav apros Bondye an fami, kot sef fami pran latet pu priye. Sa fortifye relasyon familyal, ek kan bann zenn zanfan tann zot bann paran priye Bondye avek imilite, Zeova vinn reel pu zot. Ki nu fer kan enn kikenn pe reprezant enn grup dan lapriyer, kuma par egzanp dan enn reynion Temwin Zeova? Si nu dan lasistans, nu bizin ekut byin pu ki kan lapriyer fini, nu kapav dir avek tu nu leker, “Amenn,” seki vedir “Ki li realize.”—1 Korintyin 14:16.

BANN LAPRIYER KI ZEOVA TANDE

12. (a) Kifer eski Bondye pa reponn sertin lapriyer? (b) Kifer eski fode pa nu demann zis pu nu bann bezwin personel kan nu priye?

¹² Ena kapav panse ki Bondye pa reponn zot bann lapriyer mem ki zot priye Li atraver Kris. Me, lapot Zan finn dir: “Ninport ki kitsoz nu demande an akor avek volonte [Bondye], Li tann nu.” (1 Zan 5:14) Donk, nu bizin demann bann kitsoz ki an akor avek volonte Bondye. Pwiski Li interese ar nu byinet spirityel, nu kapav mansyonn dan nu lapriyer ninport ki kitsoz ki konsern nu kondisyon spirityel. Nu bizin vey byin ki nu pa demann zis pu nu bann bezwin fizik. Par egzanp, nu kapav demann sazes ek kuraz pu fer fas ar enn maladi, me fode pa ki bann traka pu nu lasante tuf nu bann bezwin spirityel. (Psom 41:1-3) Enn ser Kretyin rekonet ki li ti pe tro trakas so lasante; li finn demann Zeova led pu ki li ena enn lopinyon rezonab lor so maladi. Ebyin lerla, li finn kumans pran mwins traka pu so lasante, ek li finn santi ki li finn gayn “lafors ki depas lafors normal.” (2 Korintyin 4:7) So dezir pu donn lezot led spirityel finn ogmante, ek li finn vinn enn proklamater Rwayom aplintan.

13. Parey kuma finn indike dan Matye 6:9-13, pu ki bann kitsoz li bon nu priye?

¹³ Ki nu kapav dir ankor dan nu lapriyer pu ki Zeova pran plezir pu ekut nu? Zezi Kris ti anseyn so bann disip kuma pu priye. Dan lapriyer model ki nu truve dan Matye 6:9-13, li donn nu enn kantite kitsoz ki nu kapav mansyone dan lapriyer. Pu ki kitsoz avan tu nu bizin priye? An premye, nu bizin priye pu non Bondye ek so Rwayom. Nu kapav priye usi pu nu bann bezwin materyel. Li inportan usi ki nu demann pardon pu nu bann pese ek nu demann proteksyon kont Satan Dyab ek so bann tantasyon. Zezi pa ti anvi ki nu resit sa lapriyer la parker san ki nu reflesi lor seki li vedir. (Matye 6:7) Ki kalite relasyon pu ena ant enn papa ek so garson, si tuletan garson la servi mem mo pu koz ar so papa?

14. Apart demande dan lapriyer, ki lezot kalite lapriyer nu bizin fer?

¹⁴ Apart bann siplikasyon ki sorti dan nu leker ek bann kitsoz ki nu demande, nu bizin priye usi pu donn Bondye laglwar ek pu remersye Li. (Psom 34:1; 92:1; 1 Tesalonisyin 5:18) Nu kapav priye usi pu lezot. Nu montre ki nu interes ar nu bann frer ek ser spirityel ki pe sufer uswa persekite, kan nu priye pu zot, ek Zeova kontan kan nu mansyonn zot dan nu lapriyer. (Lik 22:32; Zan 17:20; 1 Tesalonisyin 5:25) Avredir, lapot Pol finn ekrir: “Pa pran okenn traka, me dan tu kitsoz, par lapriyer ek siplikasyon ansam avek remersiman, fer Bondye kone seki zot anvi demann Li; ek lape Bondye ki pli siperyer ki tu bann panse pu vey zot leker ek zot bann kapasite mantal par mwayin Kris Zezi.”—Filipyin 4:6, 7.

PERSEVERE DAN LAPRIYER

15. Ki nu bizin rapel si nu panse ki Bondye pa pe reponn nu bann lapriyer?

¹⁵ Mem ki u pe gayn konesans Bondye, u kapav panse ki parfwa Bondye pa reponn u bann lapriyer. Li posib, parski kitfwa pankor ariv ler pu Bondye reponn enn lapriyer presi. (Eklezyast 3:1-9) Zeova kapav permet enn sityasyon kontinye pandan enn sertin letan, me apre Li reponn bann lapriyer ek Li kone ki pli bon moman pu azir.—2 Korintyin 12:7-9.

16. Kifer eski nu bizin persevere dan lapriyer, ek ki lefe sa kapav ena lor nu relasyon avek Bondye?

¹⁶ Si nu persevere dan lapriyer, sa pu montre lintere sinser dan seki nu dir Bondye. (Lik 18:1-8) Par egzanp, nu kapav demann Zeova ed nu pu lit kont enn febles. Kan nu persevere dan lapriyer ek nu azir an armoni avek seki nu finn demande, nu montre ki nu sinser. Nu bizin presi ek onet kan nu demande. Li sirtu inportan ki nu fer bann lapriyer profon kan nu pe gayn enn tantasyon. (Matye 6:13) Si nu kontiyn priye ek an mem tan nu fer zefor pu kontrol nu bann tandans ki pus nu pu fer pese, nu pu truve kuma Zeova ed nu. Sa pu fortifye nu lafwa ek fortifye nu relasyon avek Li.—1 Korintyin 10:13; Filipyin 4:13.

17. Ki profi nu kapav tire si nu pran labitid priye Bondye dan nu servis ki nu rann Li?

¹⁷ Si dan nu servis sakre pu Bondye Zeova, nu devlop labitid pu priye, nu pu realize ki nu pa pe servi Li par nu prop lafors. Zeova Li mem ki donn nu sa lafors la pu servi Li. (1 Korintyin 4:7) Si nu admet sa, nu pu ena imilite ek nu pu amelyor nu relasyon avek Bondye. (1 Pyer 5:5, 6) Wi, nu ena bann bon rezon pu persevere dan lapriyer. Nu pu konn enn lavi ere, grasa nu bann lapriyer sinser ek grasa konesans presye lor kuma nu kapav vinn pros avek nu Papa ki dan lesyel ek ki kontan nu.

DAN KOMINIKASYON AVEK ZEOVA, PA ZIS NU TUSEL KI KOZE

18. Kuma eski nu kapav ekut Bondye?

¹⁸ Si nu anvi ki Bondye ekut nu bann lapriyer, nu bizin ekut seki Li dir. (Zekarya 7:13) Li nepli avoy so bann mesaz atraver bann profet ki Li ti dirize par so lespri sin, ni Li servi bann mwayin spiritis. (Deteronom 18:10-12) Me, nu kapav ekut Bondye kan nu etidye so Parol, Labib. (Romin 15:4; 2 Timote 3:16, 17) Parey kuma nu bizin devlop gu pu bann manze ki bon pu nu lasante, Labib ankuraz nu pu “devlop enn gran dezir pu dile pir ki truv dan laparol.” U kapav devlop enn gu pu manze spirityel si u lir Parol Bondye tulezur.—1 Pyer 2:2, 3; Akt 17:11.

19. Ki profi u kapav tire si u medit lor seki u lir dan Labib?

¹⁹ Medit lor seki u lir dan Labib. (Psom 1:1-3; 77:11, 12) Sa vedir ku u bizin reflesi lor la. U kapav konpar li avek dizesyon. U kapav dizer u manze spirityel, kan u sey fer enn rapor ant seki u pe lir ek seki u deza kone. Gete kuma sa li tus u lavi, reflesi ki sa fer u dekuver lor bann kalite ki Zeova ena ek lor so bann manyer azir. Donk, atraver letid personel, u kapav manz manze spirityel ki Zeova done. Sa pu fer u vinn pli pros ar Bondye, ek sa pu ed pu regle bann problem ki u gayne tulezur.

20. Kuma eski kan nu asiste bann reynion Kretyin, sa ed nu pu vinn pros ar Bondye?

²⁰ U kapav vinn pros ar Bondye usi, si u ekut so Parol dan bann reynion Kretyin, parey kuma bann Izraelit ti ekut avek buku latansyon kan ti pe lir Lalwa Bondye an piblik. Bann anseynan sa lepok la ti pe explik Lalwa, ek donk zot ti pe ed bann ki ti pe ekute pu konpran ek pu met an pratik seki zot ti tande. Sa ti amenn enn gran lazwa. (Neemya 8:8, 12) Alor, pran labitid pu asiste bann reynion Temwin Zeova. (Ebre 10:24, 25) Sa pu ed u pu konpran ek lerla pu aplik konesans Bondye dan u lavi. Sa pu rann u ere. Fer parti dan fami Kretyin lemond antye pu ed u pu res pros ar Zeova. Ek kuma nu pu al gete, u pu kapav truv vre sekirite parmi lepep Bondye.

TESTE U KONESANS

Kifer eski u bizin vinn pros ar Bondye?

Ki Bondye demann nu pu nu vinn pros ar Li?

Ki u kapav azute dan u bann lapriyer?

Kifer eski u bizin persevere dan u lapriyer?

Kuma eski u kapav ekut Zeova zordi?

[Zimaz paz 157]