Leson 4
Kisannla Satan le Diable?
Satan le Diable—Kot li sorti? (1, 2)
Couma eski Satan embete bann dimoune? (3-7)
Kifer ou bizin tini ferme kont Satan? (7)
1. “Diable” vedir enn kikenn ki koz menti lor enn lot dimoune pou faire li di-tort. “Satan” vedir enn l’ennemi ou-soit enn kikenn ki kont enn lot. Ala bann titre ki pli grand l’ennemi Bondié finn gagné. Avant, li ti enn ange parfait dan le ciel ensam avek Bondié. Mais apré, li finn commence rod grandeur ek li finn envie ki bann dimoune servi li, alors ki Bondié tousel ki merite sa.—Matthieu 4:8-10.
2. Sa ange Satan-la, ti servi enn serpent pou koz avek Ève. Li finn koz menti avek Ève, ek li’nn reussi faire li desobeir Bondié. Satan finn attak seki nou appel “souveraineté” Bondié, setadir so position couma Pli Grand. Satan finn dire ki soi-disant Bondié pa dirige bien ek ki Li pa dirige dan l’interet So bann serviteur. Li finn aussi dire ki soi-disant okenn dimoune pa pou reste fidel ar Bondié. Letan li finn faire sa, li finn faire li-mem vinn l’ennemi Bondié. Ala, kifer li finn gagne sa nom Satan le Diable-la.—Genèse 3:1-5; Job 1:8-11; Révélation 12:9.
3. Satan essaye tou qualité trik pou pousse bann dimoune adore li. (2 Corinthiens 11:3, 14) Fausse religion li enn trik ki li servi pou embete zot. Kan enn religion enseigne bann fausse kitsoz lor Bondié, en realité li pé faire Satan plaisir. (Jean 8:44) Bann dimoune ki dan fausse religion kapav croire ki zot sincere ek ki zot pé prié vrai Bondié. Mais ler guetté, zot pé faire volonté Satan ki ‘bondié sa lé-monde-la.’—2 Corinthiens 4:4.
4. Spiritisme ou-soit contact avek mauvais l’esprit, li enn lot trik ki Satan servi pou control bann dimoune. Certain dimoune appel bann l’esprit pou protege zot, pou konn l’avenir, pou faire bann mirak ou-soit pou faire lezot di-tort. Satan, li-mem sa mauvais la-force ki derriere sa bann pratik-la. Pou faire Bondié plaisir, fodé pa nou gagne okenn contact avek bann mauvais l’esprit.—Deutéronome 18:10-12; Actes 19:18, 19.
5. Pou embete bann dimoune encore, Satan pousse zot pou develop enn grand fierté pou zot race ek pou adore bann l’organisation politik. Alors, ena ki pensé ki zot nation ou-soit zot race pli superieur ki lezot. Mais li pa vrai. (Actes 10:34, 35) Certain pé compte lor bann l’organisation politik pou reglé problem bann dimoune. Kan zot faire sa, zot rejette Royaume Bondié, ki li tousel kapav reglé nou bann problem.—Daniel 2:44.
6. Satan aussi embete bann dimoune kan li mette bann mauvais desir dan zot leker. Jéhovah dire nou rejette bann mauvais pratik parski Li koné ki sa bann pratik-la pou faire nou di-tort. (Galates 6:7, 8) Certain kapav invite ou pou participe avek zot dan sa bann mauvais pratik-la. Mais pa blié ki en realité, c’est Satan ki envie ou faire sa bann kitsoz-la.—1 Corinthiens 6:9, 10; 15:33.
7. Satan kapav servi persecution ou-soit pression pou faire ou quitte Jéhovah. Mem certain parmi bann dimoune ki ou content kapav en colere parski ou pé etudié la Bible. Lezot kapav bouffonne ou. Mais, kisannla ki finn donne ou la vie? Satan envie faire ou peur pou ki ou arrete aprann konn Jéhovah. Mais pa laisse Satan gagné! (Matthieu 10:34-39; 1 Pierre 5:8, 9) Kan ou tini ferme kont Satan, ou faire Jéhovah content ek ou montré ki ou soutenir So droit pou gouverné.—Proverbes 27:11.
[Zimage, page 9]
Fausse religion, contact avek bann mauvais l’esprit, ek nationalisme, tousala embete bann dimoune
[Zimage, page 9]
Pou ki ou kapav tini ferme kont Satan, ou bizin contigne aprann konn Jéhovah