Leson 8

Enn la-vie famille ki faire Bondié plaisir

Ki role enn mari dan la famille? (1)

Couma enn mari bizin traite so femme? (2)

Ki bann responsabilité enn papa ena? (3)

Ki role enn madame dan la famille? (4)

Ki Bondié demann bann parent ek bann zenfant? (5)

Ki la Bible dire lor separation ek divorce? (6, 7)

1. La Bible dire ki enn mari li chef dan so famille. (1 Corinthiens 11:3) Enn mari bizin ena enn sel femme. Zot bizin marié civil.—1 Timothée 3:2; Tite 3:1.

2. Enn mari bizin content so femme pareil couma li content li-mem. Li bizin traite li pareil couma Jésus ti traite so bann disciple. (Éphésiens 5:25, 28, 29) Fodé jamais li batte so femme ou-soit maltraite li dan n’importe ki fason. Au contraire, li bizin respecté li ek donne li l’honneur.—Colossiens 3:19; 1 Pierre 3:7.

3. Enn papa bizin travail dur pou prend soin so famille. Li bizin donne so femme ek so bann zenfant mangé, linge ek enn lakaz pou resté. Enn papa bizin aussi prend compte bien-etre spirituel so famille. (1 Timothée 5:8) Li-mem ki bizin prend la tête pou aide so famille aprann konn Bondié ek So bann projet.—Deutéronome 6:4-9; Éphésiens 6:4.

4. Enn madame bizin enn bon l’aide pou so mari. (Genèse 2:18) Li bizin aide so mari pou forme zot bann zenfant ek pou donne zot enn bon l’education. (Proverbes 1:8) Jéhovah dire ki enn madame bizin prend so famille soin avek beaucoup l’amour. (Proverbes 31:10, 15, 26, 27; Tite 2:4, 5) Li bizin ena enn grand respé pou so mari.—Éphésiens 5:22, 23, 33.

5. Bondié dire ki bann zenfant bizin obeir zot parent. (Éphésiens 6:1-3) Li attann ki bann parent donne zot zenfant enn direction ek corrige zot. Pou prend zot zenfant soin lor plan spirituel ek affectif, bann parent bizin passe lé-temps avek zot ek etudié la Bible ensam avek zot. (Deutéronome 11:18, 19; Proverbes 22:6, 15) Kan bann parent discipline zot zenfant, fodé jamais ki zot trop dur ou-soit trop severe.—Colossiens 3:21.

6. Kan mari ek femme gagne problem dan zot menage, zot bizin essaye mette bann conseil la Bible en pratik. D’ailleurs, la Bible encourage nou pou montré l’amour ek pou pardonné. (Colossiens 3:12-14) Dapré Parole Bondié, separation pa enn solution pou reglé bann ti problem. Mais seulement, enn femme kapav decide pou quitte so mari si (1) mari-la persisté pou refuse prend soin so famille lor plan materiel, (2) li tellement violent ki li mette la santé ek la vie so femme en danger, ou-soit (3) li tellement opposé ki li vinn impossible pou so femme contigne servi Jéhovah.—1 Corinthiens 7:12, 13.

7. Mari ek femme bizin reste fidel envers zot camarade. Enn dimoune ki commette l’adultere faire peché kont Bondié ek kont so conjoint. (Hébreux 13:4) Dapré la Bible, seulement kan finn ena relation sexuel en dehors mariage ki enn dimoune en droit divorcé ek remarié. (Matthieu 19:6-9; Romains 7:2, 3) Jéhovah pa content kan dimoune divorcé ek remarié sans okenn raison biblik.—Malaki 2:14-16.

[Zimage, page 16,17]

Enn bon papa donne so famille seki li bizin pou vive ek li prend compte so bien-etre spirituel

[Zimage, page 17]

Bondié attann ki bann parent donne zot zenfant enn direction ek corrige zot