Leson 11
Bann croyance ek bann coutume ki pa faire Bondié plaisir
Ki qualité croyance ek coutume ki pa bon? (1)
Eski bann chrétien bizin croire ki Bondié, Li enn trinité? (2)
Kifer bann vrai chrétien pa fête Noël, Pâques, ou-soit bann l’anniversaire naissance? (3, 4)
Eski bann dimoune mort kapav faire dimoune vivant di-tort? (5)
Eski Jésus finn mort lor enn la-croix? (6)
Eski li vrai-mem important pou faire Bondié plaisir? (7)
1. Pa tou croyance ek tou coutume ki pa bon. Mais, Bondié pa accepté bann croyance ek coutume ki sorti dan fausse religion, ou-soit ki kont bann l’enseignement la-Bible.—Matthieu 15:6.
2. Trinité: Eski Jéhovah Li enn trinité—seki vedir enn Bondié ki divisé en trois personne? Non! Jéhovah, le Père, “Li tousel vrai Bondié.” (Jean 17:3; Marc 12:29) Jésus li so Garson premier-né ek li soumette ar Bondié. (1 Corinthiens 11:3) Alors, Papa-la pli grand ki so Garson. (Jean 14:28) L’esprit saint li pa enn dimoune, li plutot la force ki Bondié servi kan Li faire kitsoz.—Genèse 1:2; Actes 2:18.
3. Noël ek Pâques: Jésus pa finn né le 25 décembre. Li finn né vers le 1er octobre, enn lepok l’année kan bann berger ti kapav laisse zot bann zanimo dehors dan la nuit. (Luc 2:8-12) Jamais Jésus finn donne bann chrétien l’ordre pou fête so naissance. Au contraire, li ti dire so bann disciple commemore so la-mort, setadir rappel sa. (Luc 22:19, 20) Noël ek so bann coutume sorti dan bann fausse religion longtemps. Bann coutume Pâques aussi pareil, couma dizef ek lapin. Pareil couma bann premier chrétien, zordi bann vrai chrétien pa fête Noël ek Pâques.
4. Bann l’anniversaire naissance: La Bible mentionne zis deux l’anniversaire naissance ek zot ti fêté par bann dimoune ki pa ti prié Jéhovah. (Genèse 40:20-22; Marc 6:21, 22, 24-27) Bann premier chrétien pa ti fête l’anniversaire naissance. Coutume fête l’anniversaire naissance sorti dan bann fausse religion longtemps. Bann vrai chrétien donne cadeau ek organise bann ti fête dan lezot moment pendant l’année.
5. La crainte pou dimoune mort: Bann dimoune mort pa kapav faire nanyin ni zot ressenti kitsoz. Nou pa kapav aide zot, ek zot pa kapav faire nou di-tort. (Psaume 146:4; Ecclésiaste 9:5, 10) Nâme li pa immortel; li pa vive apré la mort. (Ézékiel 18:4) Mais, parfois bann mauvais ange, ki appel demon, faire zot passe pou l’esprit bann dimoune mort. Tou bann coutume ki ena enn rapport avek la crainte bann mort, ou-soit ki prié bann mort, zot pa bon.—Isaïe 8:19.
6. La croix: Jésus pa finn mort lor enn la-croix. Li finn mort lor enn poteau. Dan beaucoup la-Bible, mot ki finn traduire par “la croix,” sorti dan enn mot grec ki vedir enn sel boute di-bois. La croix sorti dan bann fausse religion longtemps. Bann premier chrétien pa ti prié la croix ni zot ti servi sa. Alors, eski ou pensé li bon ki nou servi enn la-croix pou prié Bondié?—Deutéronome 7:26; 1 Corinthiens 10:14.
7. Li kapav bien difficile pou quitte sa bann croyance-la ek sa bann coutume-la. Kitfois, bann famille ek ou bann camarade pou essaye convaink ou pou pa change ou religion. Mais faire Bondié plaisir pli important ki faire bann dimoune plaisir.—Proverbes 29:25; Matthieu 10:36, 37.
[Zimage, page 22]
Bondié Li pa enn trinité
[Zimage, page 23]
Noël ek Pâques sorti dan bann fausse religion longtemps
[Zimage, page 23]
Nou pena okenn raison pou prié bann dimoune mort ou-soit pou peur zot