Leson 12

Respecté la vie ek di-sang

Couma nou bizin considere la vie? (1) l’avortement? (1)

Couma bann chrétien montré ki zot prend precaution avek la vie? (2)

Eski nou gagne droit touye bann zanimo? (3)

Cite certain pratik ki pa montré respé pou la vie. (4)

Ki la loi Bondié lor di-sang? (5)

Eski sa la-loi-la applik aussi kan docteur mette di-sang avek enn dimoune? (6)

1. Jéhovah Li-mem la Source la vie. Tou bann kitsoz vivant ena la vie grace a Bondié. (Psaume 36:9) Pou Bondié la vie li sacré. Mem la vie enn ti-baba ki encore dan ventre so mama ena beaucoup valeur pou Jéhovah. Touye par expré enn ti-baba ki pé developpé dan ventre so mama bien mauvais devant lizié Bondié.—Exode 21:22, 23; Psaume 127:3.

2. Bann vrai chrétien koné ki zot bizin prend precaution avek la vie. Zot veillé ki dan zot l’auto ek zot lakaz pena okenn danger. (Deutéronome 22:8) Bann serviteur Bondié pa prend bann risk inutile zis pou gagne inpé plaisir ou-soit sensation. A cause sa-mem, zot pa participe dan bann sport violent ki blesse lezot dimoune par expré. Zot pa prend part dan bann divertissement ki encourage la violence.—Psaume 11:5; Jean 13:35.

3. Pou nou Createur, la vie enn zanimo aussi li sacré. Enn chrétien kapav touye bann zanimo pou mangé ek pou faire linge, ou-soit pou protege li kont maladie ek danger. (Genèse 3:21; 9:3; Exode 21:28) Mais li pa bon maltraite bann zanimo ou-soit touye zot zis pou sport ou-soit zis par plaisir.—Proverbes 12:10.

4. Bann chrétien pa fumé, pa mache feuille betel ek pa drogué. Sa bann l’habitude-la pa bon parski (1) zot faire nou vinn esclave, (2) zot faire nou lekor di-tort, ek (3) zot malprop. (Romains 6:19; 12:1; 2 Corinthiens 7:1) Li kapav bien difficile pou arrete sa bann l’habitude-la. Mais nou bizin arrete faire tousala si nou oulé faire Jéhovah plaisir.

5. Di-sang aussi sacré devant lizié Bondié. Bondié dire ki nâme, ou-soit la vie, li dan di-sang. Alors, li pa bon mange di-sang. Li pa bon aussi mange la viande enn zanimo si so di-sang pa finn bien versé. Si enn zanimo finn tranglé, ou-soit finn mort dan enn la-trappe, fodé pa mange li. Si li’nn gagne enn coup-de-fleche ou-soit enn coup-de-balle, bizin verse so di-sang dé-suite, lerla kapav mange li.—Genèse 9:3, 4; Lévitique 17:13,14; Actes 15:28, 29.

6. Eski nou gagne droit accepté ki docteur mette di-sang dan nou lekor? Pa blié ki Jéhovah dire nou pa prend di-sang. Sa vedir ki nou bizin pa mette di-sang dan nou lekor dan n’importe ki fason, ki li di-sang enn lot dimoune ou-soit ki li nou prop di-sang ki ti finn ramassé avant. (Actes 21:25) Alors, bann vrai chrétien pa pou accepté ki docteur mette di-sang avek zot. Zot pou accepté bann lezot traitement, par exemple zot pou laisse docteur mette dan zot lekor bann solution ki pena di-sang. Zot envie vive, mais zot pa pou desobeir bann la-loi Bondié pou essaye sape zot la-vie.—Matthieu 16:25.

[Zimage, page 25]

Pou faire Bondié plaisir, fodé pa nou accepté ki docteur mette di-sang ar nou, fodé pa nou ena bann mauvais l’habitude ek fodé pa nou prend bann risk inutile