Leson 14

Couma bann Témoins de Jéhovah zot organisé

Kan eski l’histoire moderne bann Témoins de Jéhovah finn commencé? (1)

Couma reunion bann Témoins de Jéhovah deroulé? (2)

Couma zot paye zot bann depense? (3)

Kisannla ki prend la tête dan bann congregation? (4)

Ki bann grand rassemblement ena chaque l’année? (5)

Ki travail faire dan zot bureau central ek dan bann filiale? (6)

1. L’histoire modern bann Témoins de Jéhovah finn commencé enn tipé apré 1870. Dan commencement, zot ti appel bann Étudiants de la Bible. Mais en 1931, zot finn prend nom Témoins de Jéhovah, enn nom ki sorti dan la Bible. (Isaïe 43:10) Avant, zot ti enn ti group. Mais zordi, ena plusieurs million ki pé preché dan plus ki 230 pays.

2. La plupart congregation bann Témoins de Jéhovah faire zot reunion trois fois par semaine. Ou invité pou assisté sa bann reunion-la. (Hébreux 10: 24, 25) Tou l’enseignement ki donné dan reunion, basé lor la Bible. Bann reunion-la commencé ek fini par enn la-priere. Dan preské tou reunion, bann Témoins de Jéhovah chante aussi bann “cantik” avek tou zot leker. (Éphésiens 5:18, 19) L’entrée gratuit ek pa passe okenn la-quete dan sa bann reunion-la.—Matthieu 10:8.

3. La plupart congregation faire zot reunion dan enn la Salle du Royaume. C’est enn batiment simple ki finn construire par bann Témoins ki travail couma volontaire. Ou pa pou trouve okenn zimage, okenn la-croix, ni okenn kitsoz pareil coumsa dan la Salle du Royaume. Tou bann depense payé par bann donation volontaire. Ena enn boite contribution dan la salle pou tou dimoune ki envie faire enn donation.—2 Corinthiens 9:7.

4. Dan chaque congregation ena bann ancien ou-soit bann surveillant. Zot-mem ki prend la tête pou enseigné dan congregation. (1 Timothée 3:1-7; 5:17) Zot gagne l’aide avek bann assistant ministeriel. (1 Timothée 3:8-10, 12, 13) Sa bann zom-la zot pa pli superieur ki bann lezot membre dan congregation. (2 Corinthiens 1:24) Zot pena okenn titre special. (Matthieu 23:8-10) Zot pa habille-zot dan enn fason special ek zot pa gagne okenn la-paye pou travail ki zot faire. Bann ancien content pou occupe bann besoin spirituel la congregation, ek zot faire li volontairement. Zot kapav encourage lezot ek donne bann conseil kan ena problem.—Jacques 5:14-16; 1 Pierre 5:2, 3.

5. Bann Témoins de Jéhovah faire aussi bann grand reunion ou-soit bann l’assemblée chaque l’année. Dan sa bann l’occasion-la, plusieurs congregation joinde ensam pou suive enn program special lor l’enseignement la Bible. Dan chaque l’assemblée, enn partie program reservé pou bapteme bann nouveau disciple.—Matthieu 3:13-17; 28:19, 20.

6. Bureau central bann Témoins de Jéhovah pou le monde entier trouve dan New York. La-bas ena enn group ancien ki ena beaucoup l’experience. Appel zot Collège central. Zot dirige tou bann congregation dan le monde entier. Bann Témoins ena aussi bann filiale dan plus ki 100 pays. Dan sa bann bureau-la, bann volontaire imprime bann publication ek envoye zot dan lezot l’endroit, ek zot aussi organise travail predication. Kifer ou pa organise-ou pou al visite filiale ki pli pré avek ou?