Sapit Trwa

Trap Parol Bondye Byin For

1. (a) Kuma eski dan lepase Izrael finn fer lexperyans ki parol Bondye li laverite? (b) Kifer eski sa bizin interes nu?

“ZOT konn byin avek tu zot leker ek tu zot nam ki okenn parol parmi bann bon parol ki Zeova zot Bondye finn dir pa finn res san lefe. Tu finn vinn vre pu zot.” (Zozye 23:14-16) Ala bann parol ki Zozye ti dir bann ansyin dan Izrael apre ki zot ti’nn rant dan Later ki Bondye ti promet zot. Wi, Bondye ti’nn realiz so bann promes. Sa levennman la—ansam avek bann lezot levennman ki Labib rakonte—finn prezerve pu ki “nu ena lespwar.”—Romin 15:4.

2. (a) Dan ki fason nu kapav dir ki Labib “finn inspire par Bondye”? (b) Pwiski nu kone ki Bondye finn fer ekrir Labib, ki responsabilite nu ena?

² Mem ki finn servi 40 dimunn pu ekrir Labib, avredir Zeova Limem ki finn fer ekrir sa. Eski sa vedir ki vremem Bondye finn gid bann dimunn pu ekrir tu seki ena dan sa liv la? Wi. Li finn fer sa par mwayin so lespri sin ki byin for, so lafors aktif. Akoz sa, lapot Pol finn dir: “Tu lekritir finn inspire par Bondye . . . pu ki zom Bondye kapav byin kalifye, byin ekipe pu tu bon travay.” Partu, bann dimunn ki sir ki Bondye finn fer ekrir Labib, pe ekut so konsey ek zot pe viv an akor avek seki Labib anseyne.—2 Timote 3:16, 17; 1 Tesalonisyin 2:13.

Ed Lezot pu Apresye Li

3. Ki meyer fason pu ed buku bann ki pa sir ki Labib Li Parol Bondye?

³ Buku dimunn avek ki nu koze pa dakor ar nu ki Labib li Parol Bondye. Kuma eski nu kapav ed zot? Suvan, zis uver Labib ek montre bann dimunn la seki ena ladan, sa mem meyer fason. “Parol Bondye vivan ek li ena puvwar; li pli fite ki enn lepe ki fite de kote . . . ek li kapav dekuver bann panse ek bann lintansyon leker.” (Ebre 4:12) “Parol Bondye” pa zis enn liv listwar ki pena okenn valer pu nu zordi; li vivan! Pena bare, bann promes Labib pe al realize. Linflyans ki mesaz Labib kapav ena lor vre lintansyon leker enn dimunn li pli for ki ninport ki kitsoz ki nu kapav dir personelman pu ankuraz sa dimunn la.

4. Ki bann lexplikasyon lor laverite ki ena dan Labib finn sanz latitid sertin dimunn lor Labib, ek kifer?

⁴ Buku finn desid egzaminn Labib an profonder kan zot finn truv non Bondye ladan. Lezot finn desid etidye Labib letan finn montre zot seki li dir lor sans nu lavi, kifer Bondye permet sufrans, sinifikasyon bann levennman ki nu pe truve zordi, uswa lespwar lavi pu tuletan lor enn later ki pu vinn enn paradi. Dan sertin peyi, bann move lespri fatig bann dimunn akoz bann pratik relizye ki zot fer. Me, kan zot finn aprann atraver Labib kisannla ki responsab sa ek kuma zot kapav libere, zot lintere pu Labib finn ogmante. Kifer eski sa bann pwin la inpresyonn bann dimunn sinser? Parski lor sa bann zafer inportan la, zis Labib ki kapav donn nu bann ranseynman sir.—Psom 119:130.

5. (a) Pu ki bann rezon kitfwa bann dimunn dir ki zot pa krwar dan Labib? (b) Kuma eski nu kapav ed sa bann dimunn la?

⁵ Me asterla, si bann dimunn dir nu ki zot pa krwar dan Labib? Eski sa vedir ki nu bizin aret nu konversasyon la mem? Non, pa si nu truve ki zot dispoze pu rezone. Kitfwa, zot panse ki Labib li liv ki Lakretyinte servi. Lakretyinte byin renome pu so latitid ipokrit; li mele avek politik ek li tuletan pe rod kas. Alor, kitfwa akoz sa move repitasyon la ki buku dimunn rezet Labib. Kifer eski nu pa demann sa bann dimunn la si akoz sa rezon la mem ki zot pa aksepte Labib? Zot kapav montre lintere si zot aprann ki Labib kondann fason azir Lakretyinte ek li montre byin diferans ki ena ant bann vre Kretyin ek Lakretyinte.—Mika 3:11, 12; Matye 15:7-9; Zak 4:4.

6. (a) Ki konvink u personelman ki Labib li Parol Bondye? (b) Ki bann lezot rezonnman kapav servi pu ed bann dimunn rekonet ki vremem Bondye finn fer ekrir Labib?

⁶ Nu kapav ed sertin si nu egzaminn direkteman avek zot bann prev ki Bondye finn fer ekrir Labib. Ki prev montre u klerman ki Bondye Zeova ki finn fer ekrir Labib? Eski parski Labib limem li dir sa? Uswa, eski parski so bann profesi ki anons lavenir dan tu so bann detay montre ki enn lafors sirnatirel ki lasurs sa bann profesi la? (2 Pyer 1:20, 21) Eski akoz so larmoni, mem si li finn ekrir par 40 zom pandan enn peryod 1,600 an? Eski parski li egzak avek lasyans konpare avek bann lezot liv sa lepok la? Eski parski so bann ekrivin onet? Uswa eski parski li finn prezerve malgre finn fer bann zefor plin avek mesanste pu detrir li? Si enn parmi sa bann rezon la finn konvink u, li pu kapav ed lezot dimunn usi.a

Nu Lektir Labib

7, 8. (a) Ki nu bizin pe fer avek Labib? (b) Ki nu bizin anplis nu lektir Labib personel? (c) Kuma eski u finn konpran personelman bann lintansyon Zeova?

⁷ Apart ed lezot pu krwar dan Labib, numem, nu bizin pran letan pu lir li regilyerman. Eski u pe fer sa? Parmi tu bann liv ki finn inprime, Labib mem pli inportan. Byinsir, sa pa vedir ki si nu lir Labib par numem, nu pa pu bizin nanyin apart sa. Dayer, Labib dekuraz nu res dan nu kwin. Fode pa nu panse ki nu pu konpran tu par numem, par nu bann resers personel. Pu vinn bann Kretyin ekilibre, nu bizin ena enn letid personel, me usi asiste bann reynion regilyerman avek lepep Bondye.—Proverb 18:1; Ebre 10:24, 25.

⁸ Konsernan sa, Labib sit legzanp enn ofisye Etyopyin ki ti pe lir profesi Izai. Lerla, enn anz finn gid Filip, enn predikater labonn nuvel, ver ofislye la. Filip demann li: “Eski u pe konpran vremem seki u pe lir?” Avek limilite, Etyopyin la finn reponn: “Kuma eski mo pu konpran si personn pa gid mwa?” Alor, li finn demann Filip pu explik sa pasaz Lekritir la. Filip pa ti enn kikenn ki ti pe lir Labib dan so kwin, ni li ti donn so lopinyon personel. Li ti byin pros ar lorganizasyon vizib Bondye. Akoz sa, li ti kapav transmet sa Etyopyin la linstriksyon ki Zeova ti pe done atraver sa lorganizasyon la. (Akt 6:5, 6; 8:5, 26-35) Zordi usi li parey, personn pa kapav konpran byin bann lintansyon Zeova par limem. Nu tu, nu bizin led ki Zeova done atraver so lorganizasyon vizib.

9. Ki program lektir Labib nu tu kapav profite?

⁹ Pu ed nu pu konpran Labib, lorganizasyon Zeova furni nu bon-bon piblikasyon ki baze lor Labib. An plis dan tu bann kongregasyon Temwin Zeova dan lemond antye, tulesemenn ena enn program lektir Labib ki form parti dan Lekol Minister Teokratik. Si nu egzaminn bann Lekritir Sakre personelman, nu kapav tir buku profi. (Psom 1:1-3; 19:7, 8) Fer enn zefor spesyal pu lir Labib regilyerman. Mem si u pa konpran tu kitsoz kuma bizin, u pu gayn kan mem enn konesans zeneral lor Labib ki pu servi u apre. Par egzanp, si u lir zis kat uswa sink paz par zur, u pu kapav lir Labib net dan enn an.

10. (a) Kan eski u lir Labib? (b) Kisannla ki kapav partisip dan u lektir Labib, ek kifer eski li inportan ki u fer li regilyerman?

¹⁰ Kan eski u kapav lir Labib? Si u rezerv 10-15 minit par zur, u pu tir buku profi. Sinon, omwin fixe bann moman regilye sak semenn pu fer li, ek respekte sa bann moman la. Si u marye, u ek u konzwin kapav lir Labib for ansam. Si u ena bann zanfan ki kapav lir, fer sakenn so tur lir for. Lir Labib bizin vinn enn labitid tutlong nu lavi, parey kuma labitid pu manze. U konn byin ki kan enn dimunn pa manz byin, so lasante gate. Li parey pu nu lasante spirityel. Wi, nu pu gayn lavi pu tuletan si nu nuri nu regilyerman “avek tu parol ki sorti dan labus Zeova.”—Matye 4:4.

Nu Lobzektif

11. Ki lobzektif nu bizin ena kan nu lir Labib?

¹¹ Avek ki lobzektif nu bizin lir Labib? Fode pa nu lir zis pu kuver enn sertenn kantite paz. Nu lir avek lintansyon pu konn Bondye pli byin pu ki nu plis kontan Li ek nu ador Li enn fason ki Li aksepte. (Zan 5:39-42) Nu bizin ena mem latitid ki sa ekrivin psom la, ki ti dir: “Fer mwa konn to bann semin, O Zeova; anseyn mwa to bann santye.”—Psom 25:4.

12. (a) Kifer eski li inportan ki nu gayn enn “konesans egzak,” ek kan nu pe lir, ki zefor nu bizin fer pu gayn sa konesans la? (b) Sit kat pwin ki nu kapav analize pu tir profi kan nu lir Labib. (Servi lankadre paz 30.) (c) Reponn bann kestyon ki ena dan sa paragraf la pu fer resorti sa bann pwin la. Rod bann verse ki finn zis site dan braket.

¹² Amezir ki nu gayn bann lanseynman Zeova, nu bizin ena dezir pu gayn enn “konesans egzak.” San sa, kuma eski nu pu kapav aplik Parol Bondye byin dan nu lavi uswa explik li byin ar lezot? (Kolosyin 3:10; 2 Timote 2:15) Pu gayn enn konesans egzak, nu bizin lir avek buku latansyon, ek si sa parti ki nu lir la li pa fasil pu konpran, kitfwa nu bizin lir li plizir fwa ziska ki nu konpran. Nu pu tir profi si nu pran letan usi pu medit lor seki nu pe lir, ek nu reflesi lor diferan fason ki sa kapav aplike. Dan paz 30, nu truv kat pwin inportan ki nu kapav analize kan nu medite. Nu kapav tir profi kan nu egzaminn bann porsyon Labib ek kan nu servi enn uswa plizir sa bann pwin la. U pu truve kuma u kapav fer sa kan u pu reponn bann kestyon ki truv dan bann paz ki vini apre.

(1) Suvan, porsyon Labib ki u pe lir kapav aprann u ki kalite personn Zeova ete. Par egzanp, dan Psom 139:13, 14, nu aprann ki enn tibaba ki ankor dan vant so mama ena buku valer pu Bondye. “To finn kasyet mwa dan vant mo mama. Mo pu donn twa laglwar parski dan enn manyer inpresyonan ek extraordiner to finn fer mwa. To bann travay extraordiner, ek mo nam byin konn sa.” Wi, tu seki Zeova finn kre li extraordiner! Fason ki Bondye finn fer bann dimunn montre so gran lamur ki Li ena pu nu.

Dapre seki finn ekrir dan Zan 14:9, 10, kan nu lir kuma Zezi finn tret lezot, nu truve vremem kuma Zeova Li, Li ti pu azir. Asterla, avek sa panse la dan nu lespri, ki konklizyon eski nu kapav tire lor Zeova kan nu lir bann levennman ki rakonte dan Lik 5:12, 13 ek Lik 7:11-15?

(2) Gete ki rapor ena ant seki u pe lir ek tem Labib: Bondye pu zistifye so drwa ki Li ena pu reyne ek Li pu fer so non vinn sin par Rwayom ki dirize par Kris Zezi, Semans ki ti promet.

Kuma eski Ezekyel ek Danyel finn atir latansyon byin lor tem Labib? (Ezekyel 38:21-23; Danyel 2:44; 4:17; 7:9-14)

Kuma eski Labib idantifye klerman Zezi kuma Semans ki ti promet? (Galat 3:16)

Kuma eski Revelasyon dekrir pwin pli for an rapor avek tem Rwayom? (Revelasyon 11:15; 12:7-10; 17:16-18; 19:11-16; 20:1-3; 21:1-5)

(3) Demann umem kuma u kapav aplik seki u pe lir personelman. Par egzanp, apartir Egzod ziska Deteronom, nu lir kuma Izrael ti vinn rebel ek zot ti ena enn move kondwit moral. Nu aprann ki sa bann latitid la ek sa bann aksyon la finn ena bann move konsekans. Alor, sa bizin pus nu pu pa swiv move legzanp Izrael, me fer Zeova plezir. “Sa bann kitsoz la ti bann legzanp pu zot, finn ekrir sa kuma enn lavertisman pu nu, lor ki bann lafin bann sistem ki egziste finn arive.”—1 Korintyin 10:11.

Ki leson nu tire kan nu lir resi kot Kain finn tuy Abel? (Zenez 4:3-12; Ebre 11:4; 1 Zan 3:10-15; 4:20, 21)

Eski konsey ki Labib donn bann Kretyin ki ena lesperans pu al viv dan lesyel aplik usi ar bann ki ena lesperans pu viv lor later pu tuletan? (Nonm 15:16; Zan 10:16)

Mem ki nu ena enn bon repitasyon dan kongregasyon Kretyin, kifer eski nu bizin gete kuma pu aplik ankor plis bann konsey Labib ki nu deza kone? (2 Korintyin 13:5; 1 Tesalonisyin 4:1)

(4) Reflesi kuma u kapav servi seki u pe lir pu ed lezot. Tu dimunn konserne par bann problem lasante. Alor, nu kapav lir avek zot seki Zezi ti fer, kumsa nu montre zot seki li pu fer ankor plis kan li pu dirize kuma Lerwa dan Rwayom Bondye: “Bann gran laful finn koste ar li, avek zot ti ena bann dimunn bwate, andikape, aveg, ki pa konn koze, ek buku lezot malad, . . . ek li finn geri zot.”—Matye 15:30.

Kisannla nu kapav ede avek zistwar rezireksyon tifi Zayris? (Lik 8:41, 42, 49-56)

13. Ki rezilta nu pu gayne si nu kontiyn gard enn program lektir Labib ek letid avek lorganizasyon Zeova?

¹³ Kan nu egzaminn sa kat pwin ki finn mansyone lao la, nu tir vremem buku profi ar nu lektir Labib! Les nu dir li: lir Labib li enn defi. Me, nu kapav tir profi tutlong nu lavi, parski plis nu lir Labib, plis nu pu grandi pu vinn pli for lor plan spirityel. Si nu lir Labib regilyerman, sa pu rapros nu ar Zeova nu Papa ki kontan nu ek ar nu bann frer Kretyin. Li pu ed nu pu ekut sa konsey ki dir, “trap parol lavi byin for.”—Filipyin 2:16.

[Not]

Kestyon Revizyon

• Kifer eski finn ekrir Labib ek finn prezerv li ziska nu lepok?

• Kuma eski nu kapav ed lezot pu konpran ek rekonet valer Labib?

• Kifer eski nu tir profi kan nu lir personelman Labib regilyerman? Sit kat pwin ki nu kapav analize pu nu tir profi kan nu lir Labib.

[Lankadre/Zimaz paz 30]

KAN U LIR ENN PORSYON LABIB, GETE

Ki li dir u lor kalite personn ki Zeova ete

Ki rapor li ena avek tem Labib

Ki lefe li kapav ena lor u lavi

Kuma eski u kapav servi li pu ed lezot