Sapit Dis
Enn Rwayom “Ki Zame Pa Pu Ranverse”
1. Ki kitsoz ki kler kan nu get bann levennman ki finn arive dan lemond pandan tutlong listwar bann dimunn?
BANN levennman ki pe arive tulezur dan lemond montre byin ki bann dimunn pa finn truv boner kan zot finn rezet reyn siprem Zeova ek kan zot finn rod guverne par zotmem. Pena okenn sistem guvernman imin ki finn fer limanite konn bann byinfe, san ki li fer favoritis. Mem si bann zom finn byin avanse dan zot konesans lor lasyans, zot pa finn kapav konbat maladi uswa eliminn lamor, pa mem pu enn sel dimunn. Dominasyon bann zom pa finn kapav eliminn lager, vyolans, krim, koripsyon, uswa lamizer. Bann guvernman dominer pe kontiyn fer presyon lor bann dimunn dan plizir peyi. (Eklezyast 8:9) Teknolozi, dezir pu gayn plis, ek linyorans tusala ansam pe polye later, delo ek ler. Parski bann ofisye guvernman pa kontrol byin zot lekonomi, buku dimunn gayn difikilte pu truv bann nesesite lavi. Sa bann milye lane kot dimunn pe reyne la montre klerman ki “pu zom ki lor later, so semin pa pu li. Enn zom ki pe marse pa gayn drwa mem diriz so pa.”—Zeremi 10:23.
2. Ki sel solisyon pu bann problem limanite?
2 Ki solisyon ena? Rwayom Bondye! Sa mem ki Zezi ti anseyn so bann disip pu priye: “Ki to rwayom vini. Ki to volonte fer lor later parey kuma dan lesyel.” (Matye 6:9, 10) Dan 2 Pyer 3:13, Rwayom Bondye reprezante par “bann nuvo lesyel,” ki pu bizin reyn lor “nuvo later,” setadir, enn sosyete dimunn ki drwat. Rwayom Bondye dan lesyel li telman inportan ki Zezi ti fer sa vinn lide santral so predikasyon. (Matye 4:17) Li finn montre ki plas sa Rwayom la bizin okipe dan nu lavi, kan li ti dir: “Donk, kontiyn rod rwayom ek so lazistis avan tu.”—Matye 6:33.
3. Kifer eski zordi bizin pa tarde pu aprann lor Rwayom Bondye?
3 Li byin inportan ki nu aprann lor Rwayom Bondye zordi parski byinto sa Rwayom la pu azir ek dan enn fason dirab li pu sanz reyn ki ena lor later. Danyel 2:44 anonse: “Dan bann zur sa bann lerwa la [bann guvernman ki pe reyne zordi], Bondye lesyel pu etabli enn rwayom [dan lesyel] ki zame pa pu ranverse. Ek pa pu permet enn lot lepep gayn sa rwayom la [zame bann dimunn pa pu guvern later ankor]. Li pu kraz tu sa bann lezot rwayom [ki egziste zordi] la ek li pu fini zot net, ek Limem pu res la pu tuletan.” Wi, bann dernye zur pu al fini kan Rwayom Bondye pu detrir net sa move sistem ki egziste la. Lerla, personn pa pu truv nanyin pu redir an rapor avek reyn sa Rwayom la lor later. Vremem, nu bizin ena rekonesans ki pa res buku letan avan ki Rwayom Bondye donn nu sa sulazman la!
4. An rapor avek Rwayom, ki finn arive dan lesyel an 1914 ek kifer eski sa li inportan pu nu?
4 An 1914, Zezi ti vinn lerwa ek li ti gayn permisyon pu al “guverne omilye [so] bann lennmi.” (Psom 110:1, 2) Sa lane la mem ki “bann dernye zur” sa sistem ki egziste zordi la ti kumanse. (2 Timote 3:1-5, 13) An mem tan, bann levennman ki Danyel ti truve dan enn vizyon ki ti pu realize apre, ti’nn arive dan lesyel. “Ansyin Bann Zur,” Bondye Zeova, ti’nn konfye Garson enn zom, Zezi Kris, “dominasyon, dinite ek rwayom, pu ki bann pep ek nasyon ek lang, zot tu servi li.” Danyel ti ekrir sa vizyon la: “So dominasyon li enn dominasyon ki pu dire pu tuletan ek ki pa pu fini, ek so rwayom, enn rwayom ki zame pu ranverse.” (Danyel 7:13, 14) Par mwayin so Rwayom ki dan lesyel ek ki dan lamin Zezi Kris, Bondye pu kapav permet bann ki kontan lazistis zwir enn kantite bon kitsoz ki Li ti prevwar kan Li ti met nu bann premye paran dan Paradi.
5. Ki detay konsernan Rwayom interes nu buku, ek kifer?
5 Eski li u dezir pu viv fidelman anba reyn Rwayom Bondye? Si wi, sirman u pu byin interese ar fason ki sa guvernman dan lesyel la li organize ek li fonksyone. U pu anvi kone ki li pe fer zordi, ki li pu fer dan lavenir, ek ki li demann u. Amezir ki u egzaminn sa Rwayom la pli pre, u rekonesans pu li bizin ogmant ankor plis. Si u aksepte so reyn, u pu pli byin ekipe pu fer lezot konn bann kitsoz extraordiner ki Rwayom Bondye pu fer pu bann dimunn ki obeir.—Psom 48:12, 13.
Bann Dirizan Rwayom Bondye
6. (a) Suverennte kisannla pe manifeste atraver Rwayom Mesi, ek kuma Labib montre sa? (b) Ki lefe seki nu aprann lor Rwayom bizin ena lor nu?
6 Enn parmi bann premye kitsoz ki sa legzamin la fer nu dekuver, seki sa Rwayom Mesi la li enn fason pu Bondye montre so prop reyn siprem. Zeova mem ki finn donn so Garson “dominasyon, dinite ek rwayom.” Apre ki Garson Bondye ti’nn gayn puvwar pu reyne kuma Lerwa, zisteman bann lavwa dan lesyel ti dir: “Rwayom lemond finn vinn rwayom nu Senyer [Bondye Zeova] ek rwayom Mesi, ek Li [Zeova] pu reyne kuma lerwa pu tuletan.” (Revelasyon 11:15) Ala kifer tu seki nu obzerve lor sa Rwayom la ek tu seki Rwayom la realize, kapav fer nu vinn pli pros ar Zeova Limem. Seki nu aprann bizin fer nu devlop enn dezir pu sumet ar so reyn siprem pu tuletan.
7. Pwiski Zezi Kris li Dirizan Adzwin Zeova, kifer eski sa bizin sirtu interes nu?
7 Remarke usi ki Zeova finn met Zezi Kris lor tronn kuma so Dirizan Adzwin. Pwiski Zezi ti Zuvriye Kalifye ki Bondye ti servi pu fer later ek bann dimunn, li konn nu bann bezwin pli byin ki nu. Pa fini, depi kumansman listwar imin, li finn montre ki li ‘pli atase ar bann imin.’ (Proverb 8:30, 31; Kolosyin 1:15-17) So lamur pu bann dimunn telman gran ki li finn vinn personelman lor later ek li finn donn so lavi an ranson pu nu. (Zan 3:16) Dan sa fason la, li finn donn nu enn mwayin pu nu kapav libere ar pese ek lamor ek gayn privilez pu viv pu tuletan.—Matye 20:28.
8. (a) Kontrerman ar reyn bann dimunn, kifer eski guvernman Bondye pu kontiyn egziste? (b) Ki rapor ena ant “esklav fidel ek avize” ek sa guvernman dan lesyel la?
8 Rwayom Bondye pa enn guvernman ki pu sanze demin-apredemin, non li enn guvernman dirab. Nu sir ki li pu kontiyn egziste pwiski Zeova Limem Li pa mor zame. (Abakuk 1:12) Kontrerman ar bann lerwa imin, Zezi Kris, sa kikenn ki Bondye finn fer vinn lerwa la, li imortel. (Romin 6:9; 1 Timote 6:15, 16) Avek Zezi Kris, ena 144,000 lezot asosye, bann fidel serviter Bondye ki sorti dan tu “tribi, lang, pep ek nasyon.” Zot usi zot gayn lavi imortel. (Revelasyon 5:9, 10; 14:1-4; 1 Korintyin 15:42-44, 53) Lamazorite parmi zot deza dan lesyel, ek leres ki ankor lor later form “esklav fidel ek avize” ki dan nu lepok pe kontiyn fer bann zintere Rwayom avanse lor later.—Matye 24:45-47.
9, 10. (a) Ki bann linflyans ki pe gat bann dimunn ek pe diviz zot, Rwayom Bondye pu anleve? (b) Si nu pale vinn bann lennmi Rwayom Bondye, ki bann pyez nu bizin evite?
9 Asterla dan ankor enn tigit letan mem, dan ler ki Zeova finn fixe, so larme pu rant an aksyon pu netway later. Zot pu detrir pu tuletan bann dimunn ki finn fer zot prop swa pu refiz rekonet reyn siprem Bondye ek ki mank respe pu bann laranzman ki Li finn fer avek lamur atraver Zezi Kris. (2 Tesalonisyin 1:6-9) Sa mem zur Zeova, sa zur ki nu finn atann depi lontan kot Li pu zistifye so drwa antan ki Suverin Liniver. “Gete! Zur Zeova pe vini, feros avek enn gran koler, . . . pu eliminn tu bann dimunn ki fer pese dan peyi la.” (Izai 13:9) “Sa zur la li enn zur gran koler, enn zur maler ek laper, enn zur siklonn ek enn zur kot partu pu ravaze, enn zur kot pu fer nwar ek byin som, enn zur nyaz ek enn zur gro marenwar.”—Sefanya 1:15.
10 Tu bann fos relizyon ek bann guvernman imin ek zot bann larme ki sa move dirizan lemond invizib la pe kontrole, tusala pu detrir pu tuletan. Tu bann ki, par zot lavi egois, malonet ek imoral, pe asosye zot avek sa lemond la, pu detrir. Satan ek so bann demon pu perdi kontak avek bann abitan later, ek zot pu al ferme dan enn tru sinbolik pu milan. Lerla, Rwayom Bondye pu ena enn kontrol total lor tu seki pe fer lor later. Sa pu vremem enn sulazman pu tu bann ki kontan lazistis!—Revelasyon 18:21, 24; 19:11-16, 19-21; 20:1, 2.
Bann Lobzektif Rwayom—Kuma Zot Pu Realize
11. (a) Kuma eski Rwayom Mesi pu realiz proze Zeova pu later? (b) Kan Rwayom Bondye pu guverne, ki li pu amene pu bann dimunn ki pu viv lor later sa lepok la?
11 Rwayom Mesi pu realiz dan enn fason konple proze ki Bondye ti ena pu later dan kumansman. (Zenez 1:28; 2:8, 9, 15) Ziska zordi, limanite pa finn reysi sutenir sa proze la. Me, “bann abitan sa nuvo later ki pe vini la” pu sumet ar Zezi Kris. Tu bann ki pu sape kan Bondye pu amenn zizman lor sa vye sistem la pu travay ansam lamin dan lamin anba direksyon Lerwa Zezi Kris ek zot pu kontan pu fer ninport ki kitsoz li demann zot, pu ki later antye vinn enn paradi. (Ebre 2:5-9) Tu dimunn lor later pu zwir travay so lamin ek zot pu profit byin labondans ki pu ena lor later.—Psom 72:1, 7, 8, 16-19; Izai 65:21, 22.
12. Kan Rwayom Bondye pu guverne, kuma eski bann dimunn pu gayn enn lespri ek enn lekor parfe?
12 Kan Bondye ti kre Adan ek Ev, zot ti parfe, ek Bondye ti ule ki later ranpli ar zot bann desandan ek ki zot tu ena enn lespri ek enn lekor parfe. Kan Rwayom Bondye pu guverne, sa proze la pu vinn enn realite extraordiner. Pu ki sa arive, bann lefe pese pu bizin anleve ek lerla Zezi Kris pa pu zis ranpli rol Lerwa, me usi rol Gran Pret. Avek pasyans, li pu ed bann dimunn ki obeir li, pu profit valer sakrifis so lavi parfe ki kuver zot pese.
13. Ki bann byinfe lor plan fizik bann dimunn pu gayne kan Rwayom Bondye pu guverne?
13 Kan Rwayom Bondye pu guverne, bann abitan later pu konn bann byinfe extraordiner lor plan fizik. “Sa lepok la, lizye bann aveg pu uver, ek zorey bann surd pu debuse. Sa lepok la sa kikenn ki paralize la li pu sote parey kuma serf, ek lalang bann seki pa konn koze pu kriye dan lazwa.” (Izai 35:5, 6) Nu lapo ki finn ramas-ramase akoz vyeyes uswa maladi pu vinn pli fre ki lapo enn zanfan ek bann maladi ki pa kapav geri pu ranplase par enn bon lasante. “Ki so laser (lapo) vinn pli fre ki seki li ti ena dan so zenes; ki li return dan bann zur kot li ti ena so lafors zenes.” (Zob 33:25) Sa zur la pu arive kot personn pa pu ena okenn rezon pu dir, “Mo malad.” Kifer? Parski bann dimunn ki ena lakrint pu Bondye pu libere ar pwa pese ek so bann lefe ki fer dimunn buku sufer. (Izai 33:24; Lik 13:11-13) Wi, Bondye “pu suy tu larm dan zot lizye, ek pa pu ena lamor; pu nepli ena dey, kriye ek duler. Bann kitsoz avan finn disparet.”—Revelasyon 21:4.
14. Ki vedir vremem vinn parfe?
14 Me vinn parfe pa vedir zis gayn enn lekor ek enn lespri parfe, li vedir plis ki sa. Li vedir usi reflet pli byin bann kalite Zeova, etandone ki nu finn kre ‘dan resanblans Bondye, parey kuma Li ete.’ (Zenez 1:26) Pu ariv ziska la, pu bizin ena enn gran program ledikasyon. Dan lemond nuvo, ‘pu ena lazistis.’ Alor, kuma Izai ti anonse, “bann abitan later pu aprann lazistis lor sa later ki donn so rapor la.” (2 Pyer 3:13; Izai 26:9) Lazistis amenn lape—parmi bann dimunn tu ras, parmi bann ki byin pros, dan fami, ek sirtu avek Bondye Limem. (Psom 85:10-13; Izai 32:17) Bann ki kontan lazistis pu aprann dusma-dusma seki volonte Bondye vedir pu zot. Amezir ki lamur pu Zeova pran rasinn dan fon zot leker, zot pu swiv so bann prinsip ek so bann fason fer dan tu bann domenn zot lavi. Zot pu kapav dir parey kuma Zezi: ‘Mo fer tuletan bann kitsoz ki fer mo Papa plezir.’ (Zan 8:29) Lavi pu vremem bon kan tu dimunn pu fer bann kitsoz ki fer Bondye plezir!
Deza Nu Pe Truve Seki Rwayom Bondye Pe Fer
15. Servi sa bann kestyon ki ena dan sa paragraf la pu atir latansyon lor bann kitsoz ki Rwayom Bondye pe fer ek pu montre seki nu, nu bizin pe fer depi asterla mem.
15 Bann dimunn pe truv byin bann kitsoz inpresyonan ki Rwayom Bondye pe fer ek usi bann kitsoz ki bann ki sumet ar sa Rwayom la pe fer. Sa bann kestyon ek verse Labib ki ena anba la pu rapel u detrwa sa bann kitsoz la, ek usi bann kitsoz ki tu bann ki sumet ar Rwayom Bondye kapav fer ek bizin pe fer depi asterla mem.
Kont ki an premye Rwayom Bondye ti pran sanksyon, ek avek ki rezilta? (Revelasyon 12:7-10, 12)
Depi ki Kris finn vinn lerwa, bann dernye manb enn grup pe rasanble. Ki sa grup la sa? (Revelasyon 14:1-3)
Dapre Matye 25:31-33, ki travay Zezi ti anonse li pu fer apre ki gran detres pu deklanse?
Avan sa ki travay pe fer zordi? Kisannla ki pe partisip dan sa travay la? (Psom 110:3; Matye 24:14; Revelasyon 14:6, 7)
Kifer eski bann lennmi politik ek relizye pa finn kapav aret travay predikasyon? (Zekarya 4:6; Akt 5:38, 39)
Ki bann sanzman finn ena dan lavi bann ki sumet ar reyn Rwayom Bondye? (Izai 2:4; 1 Korintyin 6:9-11)
Enn Rwayom pu Mil An
16. (a) Pu komye letan Zezi Kris pu reyne? (b) Ki bann kitsoz extraordiner pu arive pandan ek apre sa peryod la?
16 Apre ki Satan ek so bann demon pu al dan enn tru sinbolik, Zezi Kris ek so 144,000 zeritye asosye pu reyne kuma lerwa ek pret pu milan. (Revelasyon 20:6) Pandan sa peryod la, limanite pu vinn parfe, ek pese ek lamor ki ti’nn transmet par Adan pu disparet pu tuletan. Alafin Reyn Milan, kan Zezi pu fini ranpli so rol Lerwa ek Pret, “li pu remet rwayom la” ar so Papa, “pu ki Bondye vinn tu kitsoz pu tu.” (1 Korintyin 15:24-28) Lerla, Satan pu large pu enn tigit letan ek lerla limanite ki pu fini libere ar pese pu pas dan enn tes pu gete sipa zot sutenir reyn siprem Zeova uswa non. Apre ki sa tes final la pu fini, Zeova pu detrir Satan ek bann rebel ki pu swiv li. (Revelasyon 20:7-10) Bann ki sutenir suverennte Zeova—so drwa pu reyne—pu fini montre klerman ki zot tini ferm zot fidelite. Lerla, zot pu rant dan bann bon relasyon ki zot ti bizin ena avek Zeova, pwiski Li pu aksepte zot kuma so bann garson ek tifi ki dapre Li, merit lavi pu tuletan.—Romin 8:21.
17. (a) Ki pu ariv Rwayom Bondye kan milan pu fini? (b) Dan ki sans li vre ki Rwayom “zame pa pu ranverse”?
17 Alor lerla, rol ki Zezi ek bann 144,000 ena par rapor ar later, pu sanze. Ki travay zot pu fer apre? Labib pa dir. Me, si nu sutenir reyn siprem Zeova fidelman, nu pu sorti vivan alafin Reyn Milan ek nu pu dekuver seki Zeova finn prevwar pu zot ek usi pu so gran liniver inpresyonan. Me, reyn milan Kris pu “dire pu tuletan” ek so Rwayom “zame pu ranverse.” (Danyel 7:14) Dan ki sans? Dabor, pwiski Zeova Limem ki pu dirize, Li pa pu donn sa lotorite pu reyne la ar lezot dirizan ki pena mem lobzektif ki Li. Ek usi, Rwayom la “zame pa pu ranverse” parski tu seki li pu fer pu dir pu tuletan. (Danyel 2:44) Zezi Kris, ki ena rol Lerwa ek Pret, ansam avek so bann lerwa-pret asosye, zot pu gayn loner pu tuletan parski zot finn servi Zeova fidelman.
Kestyon Revizyon
• Kifer eski Rwayom Bondye limem sel solisyon pu bann problem limanite? Kan eski Lerwa sa Rwayom Bondye la finn kumans reyne?
• Ki kitsoz ki plis atir u avek Rwayom Bondye ek seki li pu fer?
• Ki bann kitsoz nu truv Rwayom Bondye pe fer deza, ek ki par nu ena ladan?
[Zimaz paz 92, 93]
Kan Rwayom Bondye pu guverne, tu dimunn pu aprann lazistis