‘L’heure Jugement’ Bondié Finn Arrivé
RÉVÉLATION, dernier livre dans la Bible, faire nou comprend ki enn ange pé envolé au millieu le ciel, et li éna “enn bonne nouvelle éternelle pou annoncé couma l’évangile.” Avec enn la-voix fort, li pé dire: “Gagne la crainte pou Bondié, et donne Li la gloire, parski l’heure so jugement finn arrivé.” (Révélation 14:6, 7) Oui, kan sa ‘l’heure’-la arrivé, Bondié pou prononce ek faire so jugement. Sa-mem ki pou marque la fin bann “dernier jours,” l’époque kot zordi nou pé vive.—2 Timothée 3:1.
Pou bann dimoune ki pé pratique la justice, li enn bon nouvelle ki ‘l’heure jugement’ Bondié finn arrivé. Parski pou zot, sa pou signifie soulagement. Bondié pou soulage so bann serviteurs ki’nn bien souffert dans sa lé-monde ki rempli ar violence ek la haine-la.
Zordi, avant ki Bondié complète so jugement lor sa lé-monde méchant-la, la Bible conseille nou: “Gagne la crainte pou Bondié et donne Li la gloire.” Eski c’est sa ki ou pé faire? Sa implique plus ki simplement dire: “Mo croire dans Bondié.” (Matthieu 7:21-23; Jacques 2:19, 20) La crainte pou Bondié bizin faire nou développe enn grand respect pou Li. Sa bizin faire nou rejette tou séki mauvais. (Proverbes 8:13) Sa bizin aide nou pou content séki bon et haïr séki mauvais. (Amos 5:14, 15) Si nou honore Bondié, nou pou écoute Li avec enn grand respect. Jamais nou pou trop occupé pou lire so Parole, la Bible, régulièrement. Nou pou faire Li confiance—touletan et avec tou nou léker. (Psaume 62:8; Proverbes 3:5, 6) Bann ki vrémem honore Bondié, reconnaite Li couma le Souverain l’Univers, parski Limem ki’nn crée le ciel ek la terre. Zot soumette ar Li, conscient ki Li éna tou droit lor zot la-vie. Si nou senti ki nou bizin prend sa bann kitsoz-la plus compte, anou agir sans tardé.
Sa ‘l’heure jugement Bondié’ ki enn ange finn annoncé-la, appelle aussi “jour Jéhovah.” Jérusalem ti konn enn “jour” coumsa en 607 A.N.L. parski so bann habitants ti ignore bann avertissements ki Jéhovah ti donne zot à travers so bann prophètes. Parski zot ti renvoye jour Jéhovah dans zot l’esprit, zot ti mette zot la-vie plus en danger encore. Jéhovah ti averti zot: “Li pré, et li pé vinn bien vite.” (Tsephania 1:14) Babylone aussi ti konn enn l’autre “jour Jéhovah” en 539 A.N.L. (Isaïe 13:1, 6) Bann Babyloniens ti tellement éna confiance dans zot bann fortifications ek zot bann bondié, ki zot pa ti prend compte bann avertissements ki Jéhovah ti pé donné par moyen so bann prophètes. Mais dans enn seul la-nuit, Babylone finn tombe dans la main bann Mèdes ek bann Perses.
Ki pé atann nou zordi? Enn l’autre pli grand “jour Jéhovah.” (2 Pierre 3:11-14) Bondié finn fini prononce so jugement lor “Babylone la Grande.” D’après Révélation 14:8, enn ange dans le ciel pé dire: “Babylone la Grande finn tombé.” Sa finn fini arrivé. Li népli kapav empêche bann adorateurs Jéhovah adore zot Bondié. So corruption ek so participation dans la guerre, finn dévoilé partout. Asterlà, so destruction final bien pré. À cause sa, la Bible lance tou dimoune sa avertissement-la: “Sorti ladan . . . si zot pa envie participe dans so bann péchés et si zot pa envie gagne enn part dans so bann malheurs. Parski so bann péchés finn tellement accumulé ki coumadire zot finn touche le ciel, et Bondié finn rappelle bann actions injuste ki li’nn fer.”—Révélation 18:4, 5.
Babylone la Grande, ki li été? C’est tou bann religions dans le monde ki éna bann ressemblances avec ancien Babylone. (Révélation chapitres 17, 18) Note, par exemple, certain points commun:
• Bann prêtres dans ancien Babylone ti bien mêlé dans bann zaffaires politique. Beaucoup religions pareil zordi.
• Dans ancien Babylone, c’est souvent bann prêtres ki ti incite la nation pou faire la guerre. Pareillement zordi, la religion finn toujours premier pou béni bann soldats kan zot al la-guerre.
• Influencé par bann l’enseignements ek pratiques ki ti éna dans Babylone, le peuple ti tombe bien bas dans l’immoralité. Zordi, kan bann chefs religieux ignore bann principes la Bible lor la moralité, souvent nou tann bann cas l’immoralité parmi bann prêtres ek membres l’église. Li intéressant pou noté aussi ki la Révélation décrire Babylone la Grande couma enn prostituée, parski li pé prostitué li avec le monde ek so bann systèmes politique.
• La Bible dire aussi ki Babylone la Grande vive “dans enn luxe dévergondé.” Dans ancien Babylone, la religion ti propriétaire beaucoup terrains, et bann prêtres ti réputé pou zot bann pratiques commercial. Azordi, Babylone la Grande aussi possède enn quantité temples ek l’église, mais pa zis sa, li éna aussi enn grand quantité business ek emplacements commercial. So bann l’enseignement ek so bann fêtes rapporte li beaucoup l’argent, et sa enrichi aussi bann commerçants.
• Bann Babyloniens ti adore bann zimages, zot ti pratique la magie ek sorcellerie. C’est séki nou trouvé zordi aussi. À l’époque, bann Babyloniens ti croire ki kan enn dimoune mort, li quitte so ancien la-vie pou vive enn l’autre qualité la-vie. Babylone ti rempli ar temples ek l’église dédié à so bann bondié. Mais, bann Babyloniens ti kont bann adorateurs Jéhovah. Sa bann mem croyances ek pratiques-la identifié Babylone la Grande zordi.
Dans le passé, Jéhovah ti servi bann puissances politique pou puni bann ki ti contigne méprise Li ek so volonté. Par exemple, Samarie ti détruire par bann Assyriens en 740 A.N.L. Jérusalem ti détruire par bann Babyloniens en 607 A.N.L. et par bann Romains en 70 N.L. Babylone li, li ti tombe dans la main bann Mèdes ek bann Perses en 539 A.N.L. Pou nou l’époque, la Bible prédire ki bann gouvernements politique, comparé ar enn bête sauvage, pou attaque “la prostituée.” Zot pou tire so linge lor li, c’est-à-dire, zot pou montré séki li été vrémem. Zot pou détruire li complètement.—Révélation 17:16.
Eski vrémem bann gouvernements pou faire enn kitsoz pareil? La Bible dire ki ‘Bondié pou mette sa dans zot léker.’ (Révélation 17:17) Sa pou arrivé enn seul coup sans ki personne atann; li pou enn surprise, enn choc!
Ki ou bizin faire? Demann oumem: ‘Eski mo encore toujours attaché ar enn religion ki’nn contaminé avec bann l’enseignements ek pratiques Babylone la Grande?’ Mem si ou pa dans okenn sa bann religions-la, ou kapav demann oumem: ‘Eski mo’nn laisse l’attitude Babylone la Grande influence moi?’ Ki qualité l’attitude sa? C’est enn l’attitude ki tolère l’immoralité, matérialisme, l’amour pou bann plaisirs au lieu pou Bondié, et ki méprise Parole Bondié (mem dans bann ti kitsoz). Réfléchi bien lor réponse sa bann questions-la.
Pou nou gagne faveur Jéhovah, li bien important ki nou montré par nou bann actions, ek bann désirs ki éna dans nou léker, ki vrémem nou pa faire parti dans Babylone la Grande. Péna okenn raison pou nou perdi le temps! La Bible averti nou ki la fin pou vinn enn coup en-traite, li dire: “Enn seul coup, pou jette Babylone, sa grand la-ville-la, et jamais encore pa pou retrouve li.”—Révélation 18:21.
Mais pa fini! Kan l’heure jugement Jéhovah pou arrivé, Li pou juge aussi tou bann systèmes politique, zot bann dirigeants, ek tou bann ki pé rejette so Royaume dirigé par Jésus Christ. (Révélation 13:1, 2; 19:19-21) Vision prophétique dans Daniel 2:20-45 décrire bann puissances politique depuis ancien Babylone ziska nou l’époque, couma enn grand zimage ki’nn faire avec l’or, l’argent, cuivre, férail, ek l’argile. Concernant nou l’époque, sa prophétie-la annoncé: “Bondié ki dans le ciel pou mette en place enn royaume ki jamais pa pou renversé.” La Bible expliqué séki sa Royaume-la pou faire kan ‘l’heure jugement Bondié’ pou’nn arrivé. Li dire: “[Li] pou craze tou sa bann lézot royaumes-la [royaumes humain] et li pou détruire zot complètement. Lerla, limem pou reste là pou enn période le temps indéfini.”—Daniel 2:44.
La Bible averti bann vrai adorateurs Bondié kont danger ki éna kan nou content “bann kitsoz ki dans le monde,” c’est-à-dire amène enn la-vie ki le monde encouragé, mais ki déplaire Bondié. (1 Jean 2:15-17) Eski ou bann décisions ek ou bann actions montré ki ou entièrement en faveur Royaume Bondié? Eski vrémem ou pé mette le Royaume en premier dans ou la-vie?—Matthieu 6:33; Jean 17:16, 17.
[L’encadré page 14]
Kan la Fin Pou Vini?
“C’est dans enn l’heure ki zot pa pé atann, ki le Fils de l’homme pou vini.”—Matthieu 24:44.
“Contigne veillé, . . . parski zot pa konn ni jour-la, ni l’heure-la.”—Matthieu 25:13.
“Li pa pou en retard.”—Habaqouq 2:3.
[L’encadré page 14]
Eski Sa Pou Change Kitsoz si Ou Ti Koné kan la Fin Pou Vini?
Si ou ti sûr ki la fin pa pou vini avant 5-10 ans, eski sa pou change façon ki ou pé vive? Si ou pensé ki la fin pé tardé pou vini, eski ou’nn laisse sa sentiment-la ralenti ou dans ou service pou Jéhovah?—Hébreux 10:36-38.
Étant donné ki nou pa koné exactement kan la fin pou vini, sa donne nou l’occasion pou montré ki nou servi Bondié avec bann bon l’intentions. Bann ki konn Jéhovah, zot koné ki Li guette séki éna dans léker. Donc, zot conscient ki si zis à la dernière minute, avant la fin vini, zot montré zot zélé, sa pa pou impressionne Bondié!—Jérémie 17:10; Hébreux 4:13.
Si enn dimoune vrémem content Jéhovah, li pou donne Li la priorité dans so la-vie. Bann Chrétiens aussi travaille, pareil couma tou dimoune. Mais, zot l’objectif c’est pa pou vinn riche. Zot travail pou gagne séki zot bizin pou vive et pou partage avec lézot. (Éphésiens 4:28; 1 Timothée 6:7-12) Bien-sûr, zot aussi zot content détann zot pou casse inpé la routine. Mais, zot choisir bann détentes ki faire zot dibien, au lieu simplement imite séki lézot faire. (Marc 6:31; Romains 12:2) Pareil couma Jésus, zot prend plaisir pou faire volonté Bondié.—Psaumes 37:4; 40:8.
Bann vrai Chrétiens envie vive ek servi Jéhovah pou toujours. C’est enn grand l’espérance ki zot éna, mem si zot bizin atann certaines bénédictions, inpé pli longtemps ki séki certains ti pensé.
[L’encadré/Zimage page 15]
La Question lor Souveraineté Bondié
Pou comprend kifer Bondié pé tolère souffrances lor la terre, nou bizin comprend question lor souveraineté Bondié. Ki été souveraineté? C’est l’autorité suprême.
Parski Jéhovah Li le Créateur, Li éna droit pou règne lor la terre entier ek lor tou séki vive lor-là. Mais, la Bible expliqué ki zis après la création bann premier humains, enn kikenn ti mette en doute souveraineté Jéhovah. Satan le Diable ti prétann ki soi-disant Jéhovah ti pé prive nou bann premier parents enn kitsoz ki bon. Li’nn rode faire zot croire ki Bondié ti koz zot menti kan Li ti dire séki pou arrive zot si zot désobéir Li, et zot vive indépendant ar Li. D’après Satan, zot pou pli bien si zot dirige zotmem sans l’aide Bondié.—Genèse chapitres 2, 3.
Si Bondié ti détruire sa bann rebelles-la tout-de-suite, sa ti pou montré so puissance, mais sa pa ti pou réglé bann questions ki Satan ti soulevé. Donc, au lieu détruire zot tout-de-suite, Jéhovah finn laisse bann anges ek bann humains guette conséquences sa rébellion-la. Mem si sa finn amène souffrance, sa finn donne nou kan-mem la possibilité pou prend naissance.
En plus, malgré ki sa finn coûte Jéhovah beaucoup, Li finn offert so Garçon en sacrifice couma enn rançon pou l’humanité. Coumsa, bann ki obéir Bondié et ki exerce la foi dans sa sacrifice-la kapav libéré ar péchés ek so bann conséquences, et vive dans enn Paradis. Mem si certains arrivé mort dans sa lé-monde-la, zot kapav gagne la résurrection.
Étant donné ki Bondié finn laisse le temps passé pou réglé sa question-la, sa finn donne bann serviteurs Bondié l’occasion pou démontré zot reconnaissance envers Bondié et pou montré zot fidélité dans n’importe ki situation. Li bien important pou réglé question lor souveraineté Bondié. Ek li important pou réglé aussi question lor fidélité bann humains, ki éna enn lien directe avec question souveraineté. Kifer? Pou ki éna respect pou bann la-lois ek bann principes dans l’univers. Sans sa, jamais pou kapav éna vrai la-paix.a
[Note]
a Pou gagne plus détails lor sa bann questions-la ek zot signification, guette livre Approchez-vous de Jéhovah, publié par bann Témoins de Jéhovah.
[Zimage]
Tou bann systèmes politique sa lé-monde-la pou détruire