SECTION 13
Bann bon ek bann mauvais le roi
Israël divisé en deux. Avek le temps, enn quantité le roi regne lor bann Israélite, ek la plupart parmi zot, zot infidele. Bann Babylonien detruire Jérusalem
PAREIL couma Jéhovah ti annoncé, Israël ti divisé apré ki Salomon ti abandonne vrai l’adoration. Rehabam, so garson ki ti prend so place, ti enn kikenn ki bien dur. A cause sa, dix tribu Israël ti revolté ek zot ti forme royaume le nord Israël. Deux tribu ti reste fidele ar le roi ki ti descendant le roi David dan Jérusalem, ek zot ti forme royaume Juda dan le sud.
Toulé-deux royaume pa ti stable ek zot ti ena beaucoup probleme surtout parski zot ti ena bann le roi ki pa ti ena la foi ek ki pa ti obeir Jéhovah. Royaume le nord Israël ti gagne encore plus probleme ki Juda, parski bann le roi ki ti regné la-bas, ti encourage fausse religion depuis commencement-mem. Malgré bann mirak ki bann prophete couma Éliya ek Élisha ti faire—zot ti mem ressuscite bann dimoune mort—Israël ti contigne so mauvais chemin. Finalement, Bondié ti permette ki l’Assyrie detruire royaume le nord Israël.
Royaume Juda ti dure enn tipé pli longtemps, apepré enn siecle plus ki Israël, mais li aussi Bondié ti puni li. Zis certain le roi dan Juda ti ecoute l’avertissement bann prophete Bondié ek zot ti essaye dirige le peuple vers Jéhovah. Le roi Yoshiya, par exemple, ti commence tire fausse religion ki ti ena dan Juda, ek li ti retabli temple Jéhovah. Yoshiya ti bien touché kan ti trouve enn copie la Loi ki Bondié ti donné par Moïse, ek sa ti pousse li pou augmente so zeffort pou tire tou fausse religion dan pays.
Mais, malheureusement, bann le roi ki ti vini apré Yoshiya, pa ti suive so bon l’exemple. Alors, Jéhovah ti permette bann Babylonien pou prend Juda, ek detruire Jérusalem ek so temple. Bann ki ti reussi sapé ti al en exil dan Babylone. Bondié ti annoncé ki sa l’exil-la ti pou dure 70 an. Juda ti reste vide pendant tou sa le temps-la, ziska ki bann Israélite ti gagne l’autorisation pou retourne dan zot pays, couma Bondié ti promette.
Mais, pa ti pou ena okenn le roi parmi bann descendant David ki ti pou regné ziska ki Sauveur ki Bondié ti promette, le Messie ki ti annoncé, ti pou vini. La plupart le roi ki ti assize lor trone David dan Jérusalem, ti prouvé ki bann dimoune imparfait pa qualifié pou dirigé. Zis le Messie ki ti pou vrai-mem qualifié. A cause sa Jéhovah ti dire dernier le roi ki ti regne lor trone David: “Enleve couronne. . . . Vrai-mem li pa pou vinn pou personne ziska ki sa kikenn ki ena droit legal-la vini, ek mo pou donne li sa.”—Ézékiel 21:26, 27.
—Basé lor 1 ek 2 Rois; 2 Chroniques chapitre 10 ziska 36; Jérémie 25:8-11.