Bondié koz a travers so bann prophete

PENDANT lepok ki bann le roi Israël ek Juda ti pé regné, ti ena enn groupe zom ki ti ena enn travail special. Ti appel zot bann prophete. C’est bann zom ki ti ena enn la foi ek enn courage extraordinaire ek ki ti annonce bann message Bondié. Anou guette quatre message important lor ki bann prophete Bondié ti kozé.

1. Destruction Jérusalem. Bien a l’avance, bann prophete Bondié—Isaïe ek Jérémie surtout—ti commence averti ki Jérusalem ti pou detruire ek ti pou reste vide. Par bann parole bien vivant, zot ti faire koné kifer Bondié ti bien en colere kont Jérusalem. Bann habitant sa la ville-la ti pretann ki zot ti represente Jéhovah. Mais seki zot ti faire—bann pratik ki ti ena dan fausse religion, corruption ek la violence—pa ti montré sa ditou.—2 Rois 21:10-15; Isaïe 3:1-8, 16-26; Jérémie 2:1–3:13.

2. Vrai l’adoration retabli. Apré 70 an en exil dan Babylone, peuple Bondié ti pou liberé. Zot ti pou retourne dan zot pays ki ti reste vide ek zot ti pou reconstruire temple Jéhovah dan Jérusalem. (Jérémie 46:27; Amos 9:13-15) Preské 200 an a l’avance, Isaïe ti annoncé ki enn kikenn ki appel Cyrus ti pou prend la ville Babylone ek ti pou permette peuple Bondié pou retabli vrai l’adoration. Isaïe ti mem donne bann detail bien interessant lor fason ki Cyrus ti pou prend sa la ville-la.—Isaïe 44:24–45:3.

3. Kan Messie pou vini ek seki ti pou arrive li. Le Messie ti pou né dan la ville Bethléhem. (Mika 5:2) Li ti pou enn kikenn ki humble, ek li ti pou vinn Jérusalem lor enn bourrik. (Zekaria 9:9) Mem si li ti pou enn kikenn ki ti ena douceur ek ki ti bon, bann dimoune pa ti pou content li, ek beaucoup ti pou rejette li. (Isaïe 42:1-3; 53:1, 3) Li ti pou konn enn la mort terrible. Eski so la vie ti pou arrete la-mem? Non, parski grace a so sacrifice beaucoup dimoune ti pou gagne pardon pou zot peché. (Isaïe 53:4, 5, 9-12) Zis so resurrection ki ti pou kapav permette sa.

4. Regne Messie lor la terre. Bann humain imparfait vrai-mem pa kapav gouverné par zot-mem dan la paix. Mais la Bible dire nou ki le Roi Messianik pou gagne nom Prince la Paix. (Isaïe 9:6, 7; Jérémie 10:23) Kan li pou regné, tou bann dimoune pou vive dan la paix sakenn avek so camarade ek mem avek bann zanimo. (Isaïe 11:3-7) Maladie pou disparette. (Isaïe 33:24) Mem la mort pou nepli existé. (Isaïe 25:8) Pendant regne Messie, bann dimoune ki’nn mort pou ressuscité ek zot pou vive lor la terre.—Daniel 12:13.

—Basé lor bann livre Isaïe, Jérémie, Daniel, Amos, Mika, ek Zekaria.