LESON 5

Apresie Bann Kalite Extraordiner Ki Bondie Ena

DAN bann Lekritir Sakre, nou kapav trouv bann zoli kalite ki Bondie ena ek sa ed nou pou aprann konn li. Par exanp, bann Lekritir Sakre koz lor kat kalite prinsipal ki Bondie ena: pwisans, lazistis, sazes, ek lamour. Anou get sak kalite.

So Pwisans Pena Limit

Enn misie pe get bann zetwal — Bondie li Tou-Pwisan

Zeova ti dir Abraam: “Momem Bondie Tou-Pwisan.” (Zenez 17:1) So pwisans pena limit, zame li pa pou fini ek personn pena sa kantite pwisans-la. Ek gras-a sa pwisans-la Bondie inn kree liniver an-antie.

Bondie zame servi so pwisans dan enn move fason. Kan li servi so pwisans li touletan ena kontrol lor la ek li servi sa avek enn lobzektif presi. Li servi so pwisans ansam avek so lazistis, so sazes, ek so lamour.

Zeova pa ezite pou servi so pwisans pou ed so bann serviter ki fidel. “Lizie Zeova pe get partou lor later pou montre so lafors pou bann dimounn ki pe servi li avek tou zot leker.” (2 Kronik 16:9) Mem si Bondie li pwisan, li gagn nou traka. Eski sa pa fer ou anvi vinn pli pros ar li?

Enn Bondie Lazistis

“Zeova kontan lazistis.” (Psom 37:28) Tou seki li fer bon ek drwat parski li swiv so bann prinsip ki parfe.

Bann dimounn diferan ras ek laz — Bondie pa fer preferans

Bondie deteste linzistis. “Li pa fer preferans pou personn ek Li pa aksepte brayb.” (Deteronom 10:17) Li kont bann ki kraz lezot ek li ed bann ki pena personn pou protez zot, parmi ena bann “vev” ek bann “zanfan ki pena papa.” (Exod 22:22) Bondie tret tou dimounn parey. Li “pa fer preferans, me dan tou nasion dimounn ki ena enn gran respe pou li ek ki fer seki drwat gagn so faver.”—Zistwar Bann Zapot 10:34, 35.

Zeova touletan azir avek lazistis. Li pa permet tou kitsoz ek li pa tro sever osi. Li pini bann move dimounn ki pa repanti, me li montre mizerikord anver bann ki repanti. “Zeova ena mizerikord ek konpasion, li pa ankoler vit ek li ena lamour fidel an-abondans. Li pa pou kontign rapel nou bann erer, ek li pa pou gard dan leker pou touletan. Li pa finn azir avek nou dapre nou bann pese; ek li pa finn fer nou gagn seki nou merite akoz nou bann pese.” (Psom 103:8-10) Anplis, Bondie rapel bann bon kitsoz ki so bann serviter ki fidel fer, ek li rekonpans zot pou sa. Bondie vremem kontan lazistis. Eski sa pa pous ou pou fer li konfians?

Enn Bondie Ki Ena Sazes

Enn misie pe trap bann Lekritir Sakre — Nou trouv sazes Bondie dan bann Lekritir Sakre

Zeova li lasours vre sazes. “A! bann benediksion Bondie zot gran, so sazes ek so konesans zot profon!” (Romin 11:33) So sazes pena limit ek personn pena sa kalite sazes-la.

Kan nou get kreasion nou kapav trouv sazes Bondie. Enn ekrivin Psom ti dir “To’nn fer boukou kitsoz, A Zeova! To’nn fer tousala avek sazes.”—Psom 104:24.

Dan bann Lekritir Sakre nou kapav aprann osi lor sazes Bondie. Lerwa David ti ekrir: “Nou kapav ena konfians dan bann instriksion Zeova, ek li fer enn dimounn ki pena lexperyans gagn sazes.” (Psom 19:7) Reflesi lor la: Ou kapav aprann plis lor sazes ki Bondie ena! Eski ou pa ti pou kontan fer sa?

“Bondie Li Lamour”

Lamour se kalite pli inportan ki Zeova ena. Bann Lekritir Sakre dir nou ki “Bondie li lamour”. (1 Zan 4:8) Tou seki li fer motive par lamour.

Bondie montre ki li kontan nou dan diferan fason ek li donn nou bann bon kitsoz. Bann Lekritir Sakre dir: “Li’nn fer bann bon kitsoz. Li’nn donn zot lapli depi lesiel ek bann rekolt an-abondans pandan sak sezon, li’nn donn zot manze an-abondans ek li’nn ranpli zot leker ar lazwa.” (Zistwar Bann Zapot 14:17) Ofet, “tou zoli don ek tou kado parfe sorti lao, zot sorti kot Papa bann lalimier ki dan lesiel.” (Zak 1:17) Gras-a bann Lekritir Sakre, Bondie ed nou pou kone kisann-la li ete vremem, ek li osi fer nou konn so bann lalwa ek so bann prinsip ki ranpli ar lamour. Konsernan sa zoli kado ki Bondie inn donn nou la, Zezi ti dir dan enn lapriyer: “To parol li laverite.”—Zan 17:17.

Bann montagn — Kan nou trouv sazes Bondie dan kreasion, sa fer nou ena respe

Kan nou gagn bann problem, Bondie ed nou. “Zet to fardo lor Zeova, ek li pou soutenir twa. Zame li pou les enn kikenn drwat tonbe.” (Psom 55:22) Li osi pardonn nou bann pese. “Twa, A Zeova, to bon ek to pre pou pardone; to lamour fidel li an-abondans anver tou bann ki priye twa.” (Psom 86:5) Anplis li donn nou posibilite pou viv pou touletan. “Li pou souy tou larm dan zot lizie, ek lamor pou nepli existe, pou nepli ena ni dey, ni plore, ni douler.” (Revelasion 21:4) Kan ou reflesi lor lamour ki Bondie ena pou ou, ki sa pous ou pou fer? Eski ou osi ou pou kontan li?

Vinn Pros ar Bondie

Enn madam pe priye — Ou pou vinn pli pros ar Bondie kan ou priye ek ou reflesi lor so bann kalite

Bondie anvi ki ou konn li bien. Dan so Parol Sakre, Bondie ankouraz ou pou vinn pros ar li, ek li pou vinn pros ar ou. (Zak 4:8) Bondie ti apel profet Abraam “mo kamarad.” (Izai 41:8) Zeova anvi ki ou osi ou vinn so kamarad.

Plis ou pou aprann konn Bondie plis ou pou vinn pros ar li, ek ou pou pli ere. “Ere sa kikenn” ki “kontan lalwa Zeova, ek li lir So lalwa dousman lanwit-lizour.” (Psom 1:1, 2) Alor, kontign etidie bann Lekritir Sakre. Reflesi lor bann kalite ki Bondie ena ek lor seki li fer. Montre Bondie ki ou kontan li kan ou fer seki ou pe aprann. “Ala seki vedir lamour pou Bondie: obeir so bann komannman; ek pourtan so bann komannman pa lour.” (1 Zan 5:3) Lerla, ou pou kapav priye parey kouma sa ekrivin Psom la: “A! Zeova, fer mwa konn to bann semin; ansegn mwa to bann semin. Fer mwa mars dan to laverite.” (Psom 25:4, 5) Ou pou trouve ki Bondie “pa lwin ar sakenn parmi nou.”—Zistwar Bann Zapot 17:27.