Aprann ar Nou Sef, Lemesi

BONDIE ti predir ki li ti pou swazir Lemesi pou vinn Sef pou tou bann dimounn. Bondie kone ki kalite sef nou vremem bizin ek li’nn swazir meyer Sef ki ena. Ki kalite Sef eski Lemesi ete? Eski li enn gran zeneral? Eski li enn politisien ki bien kalifie? Eski li enn filozof ki ena sazes? Dapre bann Lekritir Sakre, Lemesi se profet Zezi, enn profet ki diferan ar tou lezot profet.​—Matie 23:10.

Bondie ti fer sir ki Zezi ne parfe ek san okenn pese. Anplis, Zezi ti reziste kont tou bann zefor ki Satan ti fer pou fer li fer pese. Dan enn fason parfe, Zezi ti imit fason ki Bondie servi so pwisans, so lazistis, so sazes, ek so lamour dan tou seki li ti dir ek fer. Anou gete ki nou kapav aprann ar lexanp Zezi.

Li’nn servi pwisans ki Bondie finn donn li pou ed lezot. Zezi ti vremem gagn traka bann dimounn ek li pa ti ezite pou servi sa pwisans-la pou ed zot. Li ti dir: ‘Mo ena pitie pou sa lafoul-la, parski zot pena nanye pou manze.’ (Mark 8:2) Lerla, gras-a enn mirak Zezi ti nouri enn lafoul dimounn ki ti vini pou ekout li ansegne.

Zezi ti osi vwayaze pou ansegne ek “geri tou sort kalite maladi ek problem lasante ki bann dimounn ti gagne.” (Matie 4:23) Akoz samem boukou dimounn ti swiv li ek “zot tou dan lafoul ti pe rod tous li, parski enn lafors ti pe sorti dan li ek ti pe geri zot tou.” (Lik 6:19) Vremem, Zezi ti vini “pa pou ki lezot servi li, me pou servi lezot ek donn so lavi kouma enn ranson pou liber boukou dimounn.” (Matie 20:28)a Komie dirizan imin montre ki zot pa egois me ki zot gagn traka lezot?

Li’nn azir avek lazistis parey kouma Bondie. Zezi ti swiv bann instriksion presi ki ena dan lalwa Bondie ek li ti azir dapre sa bann prinsip-la. Parey kouma bann Lekritir Sakre ti predir, se koumadir Zezi ti dir: “A Bondie, mo dezir, se fer to volonte, ek to lalwa li dan fon mo leker.” (Psom 40:8) Parey kouma Bondie, Zezi ti tret tou dimounn parey ek avek respe, ki zot ti ris ouswa pov, zom ouswa fam, tipti ouswa gran. Enn fwa, bann disip Zezi ti kriy ar bann paran ki ti pe amenn zot zanfan pou vinn get Zezi. Me Zezi ti dir: “Les sa bann ti zanfan-la vinn ar mwa; pa esey anpes zot, parski Rwayom Bondie pou bann dimounn ki kouma zot.”​—Mark 10:14.

Li’nn montre ki li ti ena sazes ki sorti kot Bondie. Zezi ti bien konpran bann dimounn. “Li ti kone ki ena dan leker bann dimounn.” (Zan 2:25) Kan Zezi so bann lennmi ti avoy bann zom pou aret li, mem bann-la ti rekonet ki “zame enn zom pa finn koz koumsa.” Kotsa Zezi ti gagn sazes? Li ti dir: “Seki mo ansegne pa sorti kot mwa, me sorti kot sa kikenn ki’nn avoy mwa la.”​—Zan 7:16, 46.

Li’nn montre ki li ti ena lamour parey kouma Bondie. Zezi ti ena boukou konpasion pou bann dimounn. Enn misie ki ti “ranpli ar lalep” ti sipliy li: “Segner, si to anvi, to kapav geri mwa.” Parski Zezi ti ena pitie pou sa zom-la, li “ti avoy so lame pou tous li ek li ti dir: ‘Mo anvi geri twa!’ Deswit so lalep ti disparet ek li ti geri.” (Lik 5:12, 13; Mark 1:41, 42) Zezi ti vremem anvi soulaz soufrans sa misie-la.

Eski Zezi gagn ou traka? Zezi limem ti dir: “Vinn kot mwa, zot tou ki pe rinte ek ki pe sarye enn pwa bien lour, ek mo pou redonn zot lafors. Vini ek travay ansam avek mwa ek aprann ar mwa, parski mo ena enn karakter dou ek mo ena limilite, ek zot pou regagn lafors.”​—Matie 11:28, 29.

Zezi limem meyer Sef ki nou kapav ena. Akoz samem li dir nou: “Aprann ar mwa.” Eski ou pou aksepte so linvitasion? Si wi, ou pou gagn enn zoli lavi.