Kouma Regle Bann Problem?

Amezir ki zot pe koumans zot lavi ansam, zot pou gagn tou kalite problem parski zot manier panse, santiman ek fason ki zot trouv lavi, pa parey. Bann problem kapav osi sorti enn lot plas, ek bann levennman ki nou pa atann arive enn sel kout.

Kitfwa li pli fasil pou sove devan sa bann sitiasion-la. Me Labib ankouraz nou pou fer fas ar nou bann problem. (Matthieu 5:23, 24) Meyer mwayin ki ena pou regle to bann problem se, aplik bann prinsip Labib.

1 KOZ LOR PROBLEM-LA

KI LABIB DIR: “Ena . . . enn ler pou koze.” (Ecclésiaste 3:1, 7) Fer sir ki to pran letan pou koz lor problem-la. Fer to konzwin kone vremem ki to resanti ek ki to panse lor sa size-la. Touletan “dir laverite” to konzwin. (Éphésiens 4:25) Mem si zot toulede koumans sofe, kontrol twa pou to pa lager. Seki ti sipoze enn sinp diskision kapav transforme ek vinn enn bagar. Me to kapav anpes sa kan to reponn avek douser.​—Proverbes 15:4; 26:20.

Mem si to pa dakor avek to konzwin, gard to bann bon manier. Enn kitsoz ki fode zame to bliye se: Kontign montre lamour ek respe anver to konzwin. (Colossiens 4:6) Sey regle problem-la pli vit posib, ek pa aret kominike.​—Éphésiens 4:26.

KI TO KAPAV FER:

• Fixe enn moman apropriye pou koz lor problem-la

• Kan ariv to tour pou ekoute, fer tou pou pa koup konversasion to konzwin. To pou gagn lokazion pou koze apre

2 EKOUTE EK KONPRAN

KI LABIB DIR: “Ena enn gran lafeksion sakenn pou so kamarad. Zot bizin touzour premie pou onor sakenn so kamarad.” (Romains 12:10) Manier ki to ekoute li bien inportan. Avek “konpasion . . . ek limilite,” esey konpran lopinion to konzwin. (1 Pierre 3:8; Jacques 1:19) Pa fer sanblan ekoute. Kan li posib, kit tou seki to pe fer ek donn to konzwin tou to latansion, ouswa demann li si zot kapav koze enn lot moman. Olie ki to konsider to konzwin kouma to adverser, konsider li plito kouma to ko-ekipie. Koumsa to pa pou “ofanse vit.”​—Ecclésiaste 7:9.

KI TO KAPAV FER:

• Kontign ekoute avek enn lespri ouver, mem si seki to pe tande pa pe fer twa plezir

• Kan to ekoute, esey konpran mesaz ki to konzwin pe anvi fer pase. Pran kont lexpresion ki ena lor so figir, so bann zes ek ton so lavwa.

3 FER SEKI ZOT INN DESIDE

KI LABIB DIR: “Kan enn dimounn travay dir, sa fer li gagn profi; me kan li zis koze, sa amenn lamizer.” (Proverbes 14:23) Li bon ki zot tom dakor lor enn solision, me sa li pa ase. Zot bizin fer seki zot inn deside. Pou fer sa, kitfwa zot pou bizin kas zot an kat ek fer boukou zefor, me li vo lapenn. (Proverbes 10:4) Si zot travay kouma enn lekip, zot “pou gagn enn zoli rekonpans” pou travay dir ki zot inn fer.​—Ecclésiaste 4:9.

KI TO KAPAV FER:

• Deside ki bann kitsoz pratik sakenn pou fer pou regle zot problem

• Detanzantan, arete ek gete ki progre sakenn inn fer