Zezi Kalme enn Tanpet lor Lamer

Zordi, Zezi inn pas enn long lazourne dan so minister. Kan ariv aswar, li dir bann disip: “Anou travers lot kote,” setadir lot kote Lamer Galile, anfas ar Kafarnaom.​—Mark 4:35.

Dan kote les Lamer Galile, ena rezion bann Zerazenien. Sa rezion-la form parti dan distrik Dekapol. Mem si ena boukou Zwif ki res dan bann lavil Dekapol, sa bann lavil-la bien inflianse par kiltir Grek.

Kan Zezi kit Kafarnaom, bann dimounn gagn sa nouvel-la bien vit. Alor, sertin pran bann lezot bato ek travers lamer ansam avek li. (Mark 4:36) An realite, pena enn long distans pou traverse. Lamer Galile parey kouma enn gran lak delo dou, ki fer anviron 21 kilomet longer ek 12 kilomet larzer. Me selman li fon.

Mem si Zezi enn zom parfe, avek tou seki li fer dan so minister, nou kapav konpran ki li fatige. Alor, apre ki zot bato kit lakot, li al par deryer, li alonze, li poz so latet lor enn lorye, ek li dormi.

Sertin parmi bann zapot, zot bann bon marin, me selman, sa vwayaz-la pa pou fasil. Toutotour Lamer Galile ena bann montagn, ek bien souvan delo lamer-la inpe tied. Parfwa, enn ler fre desann depi bann montagn ek al lor lamer. Kan sa ler fre la melanz ar ler so ki ena lor lamer, sa kree bann tanpet bien for lor lamer, ek sa kapav arive enn kout koumsa. Ek samem ki arive asterla. Bann vag koumans kraz ar zot bato, ek li koumans pran delo. Lavi tou dimounn “andanze.” (Lik 8:23) Kanmem sa, Zezi dan gran somey!

Sa bann marin-la ena boukou lexperyans, ek zot fer tou seki zot kapav pou tini zot bato dan sa tanpet-la. Me sa fwa-la, sa pa marse. Zot gagn per pou zot lavi. Alor, zot lev Zezi ek zot kriye: “Sov nou, Segner, nou pe mor.” (Matie 8:25) Bann disip gagn per tansion zot nwaye!

Kan Zezi leve, li dir so bann zapot: “Kifer zot per? Ala zot lafwa feb la.” (Matie 8:26) Lerla, Zezi donn sa lord-la divan ek lamer: “Res trankil, kalme twa.” (Mark 4:39) Bann rafal arete ek lamer kalme. (Dan bann Levanzil ki Mark ek Lik inn ekrir, zot rakonte ki Zezi inn kalme tanpet-la avan, ek apre sa ki li dir so bann disip ki zot lafwa feb.)

Mazinn reaksion bann disip! Zot fek trouv enn lamer demonte, kalme net. Enn lafreyer trap zot ek sakenn dir so kamarad: “Kisannla sa? Mem divan ek lamer obeir li?” Finalman, zot ariv lot kote lamer an sekirite. (Mark 4:41–5:1) Bann lezot bato ki ti lor lamer kitfwa inn retourn lor lakot lwes.

Sa rasir nou boukou pou kone ki Garson Bondie ena pouvwar pou kontrol lanatir, pa vre? Pandan so regn, Zezi pou okip later. Lerla, tou dimounn pou viv an sekirite, parski nepli pou ena okenn katastrof natirel!