Enn Test lor Montagn Karmel

Boukou move lerwa ti regn lor rwayom dis tribi Izrael. Me Akab ti enn parmi bann pli move. Li ti marye ar enn madam bien move ki ti ador Baal. Sa madam-la ti apel Zezabel. Akab ek Zezabel ti ranpli pei Izrael ar ladorasion Baal ek zot ti touy bann profet Zeova. Ki Zeova ti fer? Li ti fer profet Eliya al anons enn mesaz ar Akab.

Eliya ti dir Lerwa Akab ki lapli pa ti pou tonbe dan Izrael akoz bann move kitsoz ki li ti fer. Pandan plis ki trwa-z-an, pa ti rekolte nanye ek lepep ti pe mor-de-fin. Plitar, Zeova ti fer Eliya retourn kot Akab. Lerwa ti dir Eliya: ‘Akoz twa ki nou pe gagn tou sa bann problem-la.’ Eliya ti reponn: ‘Se pa akoz mwa ki ena lasesres. Se akoz twa, parski to finn ador Baal. Anou fer enn test pou kone kisann-la vre Bondie. Fer lepep ek bann profet Baal rasanble lor Montagn Karmel.’

Lepep ti rasanble lor montagn. Lerla, Eliya ti dir zot: ‘Zot bizin pran zot desizion. Si Baal vre Bondie, ador Baal. Me si Zeova vre Bondie, alor ador Zeova. Anou fer enn test. Bann 450 profet Baal pou prepar enn ofrand ek zot pou apel zot bondie. Mwa, mo pou prepar enn ofrand ek mo pou apel Zeova. Bondie ki pou bril ofrand-la, Limem vre Bondie.’ Lepep ti dakor.

Bann profet Baal ti prepar zot ofrand. Toutlong lazourne zot ti kriye zot bondie: ‘A Baal, reponn nou!’ Me Baal pa ti reponn. Alor Eliya ti boufonn Baal. Li ti dir: ‘Kriye pli for ki zot kapav. Kitfwa li pe dormi, ek enn kikenn bizin lev li.’ Bann profet Baal ti kontign kriye ziska aswar. Me zot pa ti gagn okenn repons.

Eliya ti met so ofrand lor enn lotel ek li ti vid boukou delo lor la. Apre sa, li ti priye: ‘A Zeova, silteple, montre zot ki tomem vre Bondie.’ Deswit, Zeova ti avoy enn dife depi lesiel ki ti bril sa ofrand-la. Lepep ti kriye: ‘Zeova vre Bondie!’ Lerla, Eliya ti dir: ‘Pa les bann profet Baal sove!’ Sa zour-la, toule 450 profet Baal ti mor.

Kan enn ti niaz ti aparet lor lamer, Eliya ti dir Akab: ‘Enn tanpet pe vini. Mont lor to kales, ek retourn kot twa.’ Lesiel ti ranpli ar bann niaz bien nwar, divan ti soufle, ek enn gro lapli ti koumans tonbe. Anfin, sa lasesres-la ti fini! Akab ti fer so kales al pli vit ki posib. Me avek led Zeova, Eliya ti galoup pli vit ki kales-la! Me eski Eliya ti pou nepli gagn bann problem aster-la? Se seki nou pou al gete.