Enn Gerye ek enn Tipti Tifi

Dan Siri, ti ena enn tipti tifi Izraelit ki ti viv lwin ar so fami. Bann larme Sirien ti kokin li, ek aster-la li ti enn servant kot madam enn sef larme Sirien. Sa sef-la ti apel Naamann. Sa tifi-la ti ador Zeova, mem si bann dimounn ki ti otour li pa ti ador Zeova.

Naamann ti ena enn maladi lapo bien grav, ek sa ti fer li soufer touletan. Tipti tifi-la ti vremem anvi ed li. Li ti dir madam Naamann: ‘Mo konn enn kikenn ki kapav geri to misie. Li apel Elize. Li enn profet Zeova ek li res dan Izrael.’

Madam Naamann ti rakont so mari seki sa tifi-la ti dir. Naamann ti pre pou fer ninport ki kitsoz. Alor, li ti al get Elize dan Izrael. Naamann ti panse ki Elize ti pou akeyir li kouma enn kikenn ki inportan. Me Elize pa ti al get Naamann. Olie sa, li ti avoy so serviter akeyir Naamann ek donn li sa mesaz-la: ‘Al lav twa set fwa dan Larivier Zourdin ek to pou geri.’

Naamann pa ti kontan ditou. Li ti dir: ‘Mo ti panse ki sa profet-la ti pou priye so Bondie ek pas so lame lor mo maladi pou mo geri. Olie sa, li dir mwa al lav mwa dan enn larivier dan Izrael. Nou bann larivier pli bon dan Siri. Kifer mo pa zis al laba pou lav mwa?’ Naamann ti bien ankoler, ek li ti ale.

Me bann serviter Naamann ti fer li reflesi. Zot ti dir Naamann: ‘Eski to pa pou fer ninport ki kitsoz pou to geri? Seki sa profet-la inn dir twa fer, li bien sinp. Kifer to pa zis fer li?’ Naamann ti ekout zot. Li ti al dan Larivier Zourdin ek li ti plonz set fwa dan delo. Kan Naamann ti sorti dan delo apre setiem fwa-la, li ti geri net. Li ti bien rekonesan, ek li ti re-al get Elize pou remersie li. Naamann ti dir: ‘Aster-la mo kone ki Zeova Limem vre Bondie.’ Dapre twa, ki sa tipti tifi-la ti resanti kan li ti trouv Naamann inn geri net?