LESON 7

Presi ek Konvinkan

Lik 1:3

REZIME: Si to anvi ed bann ki ekout twa pou tir bann bon konklizion, servi bann linformasion ki fiab.

Servi bann sours ki fiab. To bann explikasion bizin baze lor Parol Bondie, ek kan li posib, lir direkteman seki ena dan Labib. Si to pe servi enn linformasion siantifik, enn reportaz, enn lexperyans, ouswa ninport ki lezot linformasion, fer sir ki kapav fer konfians sa linformasion-la ek ki li azour.
Servi bien to bann sours. Explik bann verse an-akor avek so kontex, lansegnman Labib an zeneral, ek avek bann piblikasion “lesklav fidel ek saz.” (Mat. 24:45, NW) Kan to servi bann sours ki pa Biblik, pa sanz so lexplikasion ouswa pa dir enn kitsoz ki ekrivin-la pa’nn dir.

Kan to servi bann linformasion, pa azoute ek pa exazere lor bann sif ek bann fe. Par exanp, fer bien atansion ki bann expresion kouma “sertin dimounn” pa vinn “mazorite dimounn,” ouswa “dan sertin ka” pa vinn “touletan,” ek “li posib” pa vinn “nou sir.”
Rezonn avek bann ki ekout twa. Apre ki to’nn lir enn verse ouswa ki to’nn sit enn referans, poz bann kestion avek takt ouswa servi enn lexanp ki pou ed bann ki pe ekoute pou tir zot prop konklizion.