LESON 14

Met Laksan lor Bann Pwin Prinsipal

Ebre 8:1

REZIME: Ed lasistans pou swiv to diskour ansam avek twa, ek montre dan enn fason bien kler kouma sak pwin prinsipal ena enn lien avek to lobzektif ek to tem.

KOUMA POU FER SA:

Fixe enn lobzektif. Reflesi lor lobzektif to size. Eski se pou inform bann dimounn, pou konvink zot, ouswa pou motiv zot? Lerla, dapre sa, devlop to size. Fer sir ki tou to bann pwin prinsipal ed twa pou akonpli to lobzektif.

Demann tomem: ‘Ki kestion ouswa ki lobzeksion lasistans kapav ena lor sa size-la? Dan ki lord lozik zot bann kestion ek zot bann lobzeksion pou vini?’ Apre sa, organiz to bann lide dan sa lord-la, pou ki lasistans kapav swiv, konpran, ek aksepte seki to pe ansegne.
Met laksan lor tem to diskour. Fer referans ar to tem toutlong to diskour. Repet bann mo inportan ki dan to tem ouswa servi bann mo ki ena mem sinifikasion.
Prezant to bann pwin prinsipal dan enn fason kler ek sinp. Swazir zis bann pwin inportan ki ena enn lien ar to tem ek ki to pou kapav devlop bien, dapre kantite letan ki to ena. Pa devlop boukou pwin inportan. Mansionn dan enn fason kler sak pwin inportan. Apre, fer enn ti poz, ek pas an douser lor prosin pwin inportan.

To kapav mansionn to bann pwin inportan dan to lintrodiksion pou ed lasistans swiv to diskour ansam avek twa, ouswa to kapav repet bann pwin-la dan to konklizion pou ki lasistans rapel zot.