“Aprann Ar Mwa”

“Pran mo zug lor zot ek aprann ar mwa, parski mo dus ek mo ena limilite dan mo leker, ek zot pu gayn sulazman pu zot nam.”—MATYE 11:29.

1. Kifer eski kan nu aprann ar Zezi sa kapav enn plezir ek enn benediksyon pu nu?

ZEZI KRIS ti tuletan pans kuma bizin, li ti anseyn kuma bizin, ek li ti azir kuma bizin. Mem ki li pa finn viv lontan lor later, li finn fer enn karyer ki finn donn li buku satisfaksyon ek buku benediksyon. Li finn tuletan gard so lazwa. Li ti fer bann disip ek li finn montre zot kuma ador Bondye, kuma kontan bann dimunn, ek gayn laviktwar lor lemond. (Zan 16:33) Li ti ranpli zot leker avek lespwar ek ‘par mwayin labonn nuvel li finn donn lesperans lavi ek kapasite pu pa mor zame.’ (2 Timote 1:10) Si u konsider u kuma enn disip Zezi, dapre u, ki vedir vinn enn disip? Nu kapav gayn buku benediksyon dan nu lavi, si nu egzaminn seki Zezi dir konsernan bann disip. Pu fer sa, nu bizin aksepte so lopinyon ek aplik sertin prinsip debaz.―Matye 10:24, 25; Lik 14:26, 27; Zan 8:31, 32; 13:35; 15:8.

2, 3. (a) Ki ete enn disip Zezi? (b) Kifer eski li inportan ki nu demann nu mem, ‘Disip kisannla mo ete vremem?’

² Dan bann Lekritir Grek Kretyin, “disip” tradir enn mo ki vedir sirtu enn kikenn ki diriz so panse lor enn kitsoz, uswa enn kikenn ki pe aprann. Dan Matye 11:29, ki tex-tem nu lartik, ena enn mo ki byin pros ar sa mo disip la. Nu lir dan sa verse la: “Pran mo zug lor zot ek aprann ar mwa, parski mo dus ek mo ena limilite dan mo leker ek zot pu gayn sulazman pu zot nam.” Wi, enn disip li enn kikenn ki aprann. Bann Levanzil suvan aplik mo “disip” ar bann kamarad intim Zezi ki ti pe swiv li ek ki ti vwayaz ansam avek li kan li ti pe prese. Zezi ti anseyn zot. Parmi bann dimunn, devet ti ena sertin ki ti aksepte bann lanseynman Zezi, kitfwa mem an sekre. (Lik 6:17; Zan 19:38) Bann ekrivin Levanzil mansyonn usi “bann disip Zan [Batis] ek bann disip bann Farizyin.” (Mark 2:18) Pwiski Zezi ti averti so bann disip pu “fer atansyon . . . ar lanseynman bann Farizyin,” nu kapav demann nu mem, ‘Disip kisannla mo ete vremem?’―Matye 16:12.

³ Si nu bann disip Zezi, si nu finn aprann ar li, abe nu prezans bizin kapav sulaz lezot lor plan spirityel. Zot bizin kapav diserne ki nu finn vinn pli dus ek ki nu ena limilite dan nu leker. Si nu enn responsab dan nu travay, si nu enn paran, uswa si nu ena bann responsabilite kuma berze dan kongregasyon, eski bann ki anba nu sarz santi ki nu tret zot parey kuma Zezi ti tret bann ki ti anba so sarz?

Kuma Zezi Ti Tret Bann Dimunn

4, 5. (a) Kifer eski li pa difisil pu kone kuma Zezi ti tret bann dimunn ki ti ena problem?(b) Ki ti ariv Zezi kan li ti al manze dan lakaz enn Farizyin?

⁴ Nu bizin kone kuma Zezi ti tret bann dimunn, sirtu bann ki ti ena bann problem grav. Avredir, li pa difisil pu nu konn sa. Labib sit plizir lokazyon kot Zezi ti an kontak avek bann dimunn, parmi ti ena sirtu bann ki ti ena buku problem. Anu gete usi kuma bann sef relizye, sirtu bann Farizyin, ti tret bann dimunn ki ti ena bann mem kalite problem. Sa diferans ki nu pu truve la pu fer nu konpran buku kitsoz.

⁵ Dan lane 31 N.L., alor ki Zezi ti pe fer enn turne predikasyon dan Galile, “enn parmi bann Farizyin ti kontiyn demann [Zezi] pu vinn manze kot li.” Zezi pa finn ezite pu aksepte sa linvitasyon la. “Alor li finn rant dan lakaz sa Farizyin la ek li finn asiz atab. Lerla gete! enn madam ki bann dimunn dan lavil ti konsider kuma enn peser, finn aprann ki [Zezi] ti pe asiz atab dan lakaz sa Farizyin la. Li finn amenn enn resipyan albat ranpli avek delwil parfime, ek li finn azenu kot lipye Zezi. Li ti pe plore ek li finn kumans muy lipye [Zezi] avek so bann larm. Apre, li finn suy li avek so seve. Pa fini, li finn anbras lipye Zezi avek buku tandres ek li finn frot so lipye avek sa delwil parfime la.”—Lik 7:36-38.

6. Kifer eski sa madam ki ti purtan “enn peser” la, finn arive rant dan lakaz sa Farizyin la?

⁶ Eski u kapav fer enn vizyon seki finn pase? Enn liv referans dir: “Sa madam la (v.37) ti profit bann kutim sosyal ki ti permet bann dimunn mizer vinn dan sa kalite festin la pu zot gayn inpe bann manze ki reste.” Asterla, nu konpran kifer enn kikenn ti kapav rantre san ki li invite. Devet ti ena usi lezot dimunn ki ti pe atann pu ramas manze kan repa fini. Me selman, sa madam la finn ena enn konportman ase etonan. Li pa finn debut dan enn kwin ek atann ki repa fini. Li ti ena telman enn move repitasyon, parski li ti “enn peser” renome, ki Zezi finn dir ki li konn “so bann pese, mem ki kantite pese li finn fer.”―Lik 7:47.

7, 8. (a) Kuma eski nu ti pu reazir dan sa bann mem kalite sityasyon ki nu truve dan Lik 7:36-38? (b) Kuma eski Simon finn reazir?

⁷ Fer kuma dir u ti viv sa lepok la ek u ti dan plas Zezi. Kuma eski u ti pu reazir? Eski u ti pu santi u malalez letan sa madam la ti pu koste ar u? Ki lefe sa sityasyon la ti pu ena lor u? (Lik 7:45) Eski u ti pu gayn sok?

⁸ Si u ti parmi bann lezot invite, eski u ti pu pans enn tipe parey kuma Farizyin Simon? “Kan sa Farizyin ki ti invit [Zezi] la finn truv seki pe pase, li finn dir dan so leker: ‘Sa zom la, si li ti enn profet, li ti pu kone kisannla ek ki kalite madam, sa madam ki pe tus li la ete, li enn peser.’” (Lik 7:39) Me, Zezi pa ti kuma bann Farizyin; li ti enn kikenn ki ti ena buku pitye. Li ti konpran sityasyon sa madam la ek li ti truve ki li ti byin bulverse. Labib pa dir nu kuma li finn tom dan sa lavi pese la. Me, si vremem li ti ena enn move lavi, li paret ki bann zom dan lavil, bann Zwif ki ti enn lepep angaze avek Bondye pa finn fer nanyin pu ed li.

9. Kuma eski Zezi finn reazir, ek ki rezilta devet sa finn done?

⁹ Me Zezi ti anvi ed sa madam la. Li dir li: “To bann pese finn pardone.” Apre sa li azute: “To lafwa finn sov twa; return anpe.” (Lik 7:48-50) Resi la fini la mem. Asterla, enn kikenn kapav dir ki Zezi pa finn fer gran kitsoz pu sa madam la. Me avredir, Zezi finn ranvway li avek so benediksyon. Eski u panse ki madam la finn kontiyn amenn so move lavi apre? Mem si nu pa kapav dir nanyin sir lor la, anu get seki Lik finn dir apre. Li rakonte ki Zezi ti pe al “lavil-lavil ek vilaz-vilaz, pu prese ek pu anons labonn nuvel dirwayom.” Lik dir usi ki ti ena “detrwa madam” ki ti avek Zezi ek so bann disip, ek sa bann madam la ti pe “servi zot avek zot dibyin [setadir dibyin bann madam la].” Ena enn posibilite ki sa madam ki finn repanti ek ki ena rekonesans la, ti parmi sa detrwa madam la. Kitfwa li finn kumans amenn enn lavi ki fer Bondye plezir avek enn konsyans prop, enn lavi ki finn regayn enn sans, ek enn lamur pli profon pu Bondye.―Lik 8:1-3.

Diferans ant Zezi ek Bann Farizyin

10. Kifer eski li bon ki nu egzaminn resi ki ti pase dan lakaz Simon konsernan Zezi ek sa madam la?

¹⁰ Ki nu kapav aprann dan sa resi byin vivan la? Sa resi la tus nu leker, pa vre? Fer kuma dir u ti dan lakaz Simon. Ki u ti pu resanti? Eski u ti pu reazir parey kuma Zezi, uswa eski u ti pu ena inpe mem santiman ki sa Farizyin ki ti invit li la? Li vre ki, ni nu kapav ena mem santiman ki Zezi, ni nu kapav azir parey kuma li, parski li ti Garson Bondye. Me an mem tan, nu pale usi resanble Farizyin Simon. Sirman, byin tigit parmi nu ti pu fyer li resanble enn Farizyin.

11. Kifer eski nu pa pu’le met nu dan mem ran ki bann Farizyin?

¹¹ Enn letid Labib ek enn letid bann lezot temwaynaz andeor kapav fer nu tir konklizyon ki bann Farizyin ti konsider zot tro bel dan seki zot ti pe fer pu swadizan protez lintere piblik ek byinet lepep. Bann Farizyin pa ti satisfe ki Lalwa Bondye tro kler ek fasil pu konpran. Dan ninport ki sityasyon kot Lalwa pa ti paret ase presi pu zot, zot finn rod azut bann aplikasyon byin detaye pu konplet Lalwa. Par sa fason fer la, zot ti anpes bann dimunn servi zot konsyans. Sa bann sef relizye Zwif la finn sey invant enn regleman pu kontrol kondwit bann dimunn pu ninport ki kitsoz, mem pu bann kitsoz ki pena linportans.a

12. Ki lopinyon bann Farizyin ti ena lor zot mem?

¹² Zozef, enn istoryin Zwif dan premye syek, ti montre dan enn fason byin kler ki bann Farizyin ti konsider zot mem kuma bann dimunn ki bon, ki zanti, ki drwat, ek ki byin kalifye pu fer zot fonksyon. Ti ena sertin Farizyin ki ti ena vremem sa bann kalite la. Sirman u pe pans Nikodem. (Zan 3:1, 2; 7:50, 51) Avek letan, sertin parmi zot finn vinn Kretyin. (Akt 15:5) Lapot Kretyin Pol finn ekrir konsernan sertin Zwif, par egzanp bann Farizyin. Li ti dir: “Zot ena enn zel pu Bondye me pa enn zel ki dapre konesans egzak.” (Romin 10:2) Me, bann Levanzil dekrir sa bann Farizyin la parey kuma lepep an zeneral ti truv zot―zot vantar, dapre zot, zot krwar ki zot tro drwat, zot tir tu ti lay ar lezot, zot ziz lezot ek zot abes lezot.

Lopinyon Zezi

13. Ki Zezi ti ena pu dir lor bann Farizyin?

¹³ Zezi ti kondann bann skrib ek bann Farizyin kan li ti dir ki zot bann ipokrit. “Zot atas bann pwa byin lur ek zot poz sa lor zepol bann zom, me zot mem zot pa’le buz sa avek zot ledwa.” Wi, ti ena enn pwa byin lur lor ledo lepep, ek ti obliz zot sarye enn zug byin-byin dir pu sarye. Zezi ti apel zot usi “bann fu.” Enn kikenn ki fu, li enn danze pu piblik. Zezi finn dir usi ki sa bann skrib ek Farizyin la zot “bann gid aveg” ek “zot finn negliz bann pwin inportan dan Lalwa, parey kuma lazistis, mizerikord, ek fidelite.” Kisannla ti pu anvi ki Zezi konsider li kuma enn Farizyin?―Matye 23:1-4, 16, 17, 23.

14, 15. (a) Ki nu dekuver lor bann manyer azir bann Farizyin kan nu get fason ki Zezi ti tret Matye? (b) Ki bann leson inportan nu kapav tire dan sa resi la?

¹⁴ Ninport ki dimunn ki lir bann resi dan Levanzil kapav truve kuma bann Farizyin ti bann dimunn ki kontan kritike. Matye ki ti apel usi Levi ek ki ti enn kikenn ki ramas tax, ti fer enn gran fet pu Zezi, apre ki Zezi ti invit li pu vinn so disip. Nu kapav lir seki finn ekrir lor la: “Lerla, bann Farizyin ek zot bann skrib finn kumans mirmire avek bann disip Zezi. Zot demande: ‘Kifer eski zot pe manze-bwar avek bann ki ramas tax ek bann ki fer pese?’ Alor, Zezi reponn zot: ‘. . . Mo pa finn vini pu apel bann dimunn drwat mwa, me bann peser pu ki zot repanti.’”—Lik 5:27-32.

¹⁵ Dan sa lokazyon la, Levi limem finn konpran enn lot kitsoz ki Zezi ti dir: “Abe, al aprann seki vedir: ‘Mo ule mizerikord, pa sakrifis.’” (Matye 9:13) Mem si bann Farizyin ti deklar krwar dan bann parol ki bann profet Ebre ti ekrir, zot pa finn aksepte sa bann parol ki sorti dan Osea 6:6 la. Si zot ti bizin fer pese, zot ti pu prefer dezobeir lalwa ki zot bann tradisyon. Sakenn parmi nu kapav poz li sa bann kestyon la, ‘Eski bann dimunn konn mwa kuma enn kikenn ki byin strik lor sertin lalwa, par egzanp bann kestyon lopinyon personel, ubyin lopinyon zeneral? Uswa eski lezot konsider mwa plito kuma enn kikenn ki sirtu montre mizerikord ek bonte?’

16. Kuma eski bann Farizyin ti azir, ek kuma eski nu kapav evit vinn kuma zot?

¹⁶ Kritike, kritike, kritike! Sa mem seki bann Farizyin ti konn fer. Zot ti rod tu ti lay―zot ti mem invante. Zot ti met lepep dan enn sityasyon kot lepep ti pe bizin tuletan defann zot. Bann Farizyin ti pe tuletan rapel zot, zot bann erer. Zot ti flat zot mem parski zot ti pe donn enn dizyem bann pli tipti lerb, kuma lamant, lanet ek lani. Zot ti fer piblisite lor zot latasman ar Bondye par zot fason abiye, ek zot ti pe rod diriz lepep. Wi, si nu’le ki nu bann aksyon an armoni avek legzanp Zezi, nu bizin evit tandans pu tuletan rod tu ti erer lezot, ek atir latansyon lor sa bann erer la.

Kuma Eski Zezi Ti Regle Bann Problem?

17-19. (a) Explike kuma Zezi ti regle enn sityasyon ki ti kapav ena bann konsekans byin grav. (b) Ki ti rann sa sityasyon la stresan ek dezagreab? (c) Kuma eski u ti pu reazir si u ti la kan sa madam la ti apros Zezi?

¹⁷ Fason ki Zezi ti regle bann problem ti byin diferan ar fason bann Farizyin. Anu gete kuma Zezi ti regle enn sityasyon ki ti kapav vinn byin grav. Ti ena enn madam ki ti ena enn emorazi depi 12 an. U kapav lir sa resi la dan Lik 8:42-48.

¹⁸ Mark finn ekrir ki madam la ti pe “per ek li ti pe tranble.” (Mark 5:33) Kifer? Sirman, parski li ti kone ki li finn dezobeir lalwa Bondye. Dapre Levitik 15:25-28, enn madam ki ti gayn emorazi ti inpir tank ki emorazi la ti dire, ek plis pandan enn semenn ankor. Tu kitsoz ki li ti tuse ek tu dimunn ki ti gayn kontak ar li, ti vinn inpir. Pu kapav vinn pre ar Zezi, sa madam la finn bizin lite pu pas atraver sa gran laful la. Mem si nu pe lir sa resi la zordi, 2000 an apre, nu partaz so sufrans dan sa sityasyon anbarasan ki li ti ete la.

¹⁹ Si u ti la sa zur la, kuma eski u ti pu truv sa sityasyon la? Ki u ti pu dir? Remarke ki Zezi finn tret sa madam la avek lamur ek konsiderasyon, ek li pa finn mem mansyonn bann problem ki madam la finn kapav provoke.―Mark 5:34.

20. Si Levitik 15:25-28 ti ankor an viger zordi, ki defi nu ti pu bizin releve?

²⁰ Eski nu kapav aprann kitsoz dan seki finn pase? Sipoze ki u enn ansyin dan enn kongregasyon Kretyin zordi. Ek sipoze ki Levitik 15:25-28 ti tuzur enn lalwa an viger pu bann Kretyin zordi. Asterla enn ser finn vyol sa lalwa la parski li ti dezespere, ek pena personn pu ed li. Kuma eski u ti pu reazir? Eski u ti pu abes li an piblik avek bann konsey byin sever? Sirman u pu dir: “Non, mwa zame mo pa ti pu fer sa! Mo ti pu swiv legzanp Zezi ek mo ti pu fer zefor pu montre bonte, lamur ek konsiderasyon pu sa dimunn la.” Byin bon! Selman, li byin fasil pu dir, me pu fer li, pu imit legzanp Zezi, sa li kapav enn vre defi.

21. Ki Zezi ti anseyn bann dimunn konsernan Lalwa?

²¹ Zezi ti sirtu sulaz bann dimunn, li ti remont zot moral ek li ti ankuraz zot. Li ti montre zot ki kan lalwa Bondye li kler, abe ti bizin fer seki lalwa dir. Me, si li ti enn lalwa an zeneral, alor la, bann dimunn ti pu bizin servi plis zot konsyans, ek montre par zot desizyon ki zot ena lamur pu Bondye. Lalwa Bondye ti byin sup. (Mark 2:27, 28) Bondye ti kontan so pep, ek Li ti tuletan travay pu zot byinet. Kan zot ti fer erer, Li ti pre pu pardonn zot. Zezi usi ti kumsa.―Zan 14:9.

Bann Rezilta Ki Bann Lanseynman Zezi Finn Done

22. Apre tu seki zot finn aprann ar Zezi, ki latitid so bann disip ti ena?

²² Bann ki finn ekut Zezi ek finn vinn so bann disip finn kapav apresye laverite sa bann parol ki li ti dir la: “Mo zug li dus ek mo lasarz li leze.” (Matye 11:30) Zame zot pa finn santi enn pwa lor zot, ni zot finn santi zot fatige, uswa gayn linpresyon ki Zezi ti pe fer enn sermon avek zot. Zot ti pli lib, pli ere, ek zot ti ena enn relasyon pli sir avek Bondye ek avek zot prosin. (Matye 7:1-5; Lik 9:49, 50) Atraver Zezi, zot finn aprann ki enn kikenn ki pran latet lor plan spirityel bizin enn kikenn ki sulaz lezot, ki ena limilite dan so lespri ek so leker.—1 Korintyin 16:17, 18; Filipyin 2:3.

23. Ki bann leson inportan bann disip Zezi finn aprann kan zot ti avek li, ek ki konklizyon sa finn ed zot pu tire?

²³ Anplis, buku ti sezi linportans pu res ini avek Zezi Kris ek pu ena mem latitid ki li. Li ti dir so bann disip: “Mo finn kontan zot parey kuma mo Papa finn kontan mwa, res dan mo lamur. Si zot swiv mo bann komannman, zot pu res dan mo lamur, parey kuma mo finn swiv bann komannman mo Papa ek mo finn res dan so lamur.” (Zan 15:9, 10) Pu vinn bann minis ek serviter Bondye efikas, zot ti pu bizin aplik byin seki zot finn aprann ar Zezi. Zot ti pu bizin fer sa dan predikasyon ek lanseynman labonn nuvel extraordiner Bondye an piblik ek dan fason ki zot tret zot fami ek zot bann kamarad. Amezir ki zot asosyasyon fraternel ti pu grandi ek vinn bann kongregasyon, zot ti pu bizin rapel tuletan ki semin Zezi, samem ki bon semin. Zezi finn anseyn zot laverite ek zot finn truve ki so fason viv sa mem lavi ki vremem zot ti bizin rode.—Zan 14:6; Efezyin 4:20, 21.

24. Ki bann kitsoz nu bizin pran byin serye dan legzanp ki Zezi finn lese?

²⁴ Asterla, kan u reflesi lor sa bann kitsoz ki nu finn egzamine la, eski u truv bann fason kot u kapav amelyore? Eski u dakor ki Zezi ti tuletan pans kuma bizin, anseyn kuma bizin ek azir kuma bizin? Alor, pa bes lebra. Li ankuraz nu par sa bann parol la: “Si zot konn sa bann kitsoz la, zot pu ere si zot fer li.”—Zan 13:17.

[Not anba paz]

Kuma U Pu Reponn?

• Pu u, ki ete vinn enn disip Zezi?

• Kuma eski Zezi ti tret bann dimunn?

• Ki nu kapav aprann ar fason ki Zezi ti anseyne?

• Ki diferans ena ant bann Farizyin ek Zezi?

[Zimaz lor paz 16, 17]

Wi, latitid Zezi anver bann dimunn ti byin diferan ar latitid bann Farizyin!