Zeova—Pli Gran Legzanp Bonte

“Donn laglwar Zeova bann larme, parski Zeova bon!”—ZEREMI 33:11.

1. Kifer eski nu santi nu puse pu donn Bondye laglwar pu so bonte?

ZEOVA, nu Bondye, Li bon dan tu sort fason. Profet Zekarya ti dir: “A! Vremem so bonte byin gran!” (Zekarya 9:17) Wi, nu truve ki kantite Bondye Li bon kan nu get tu seki Li finn fer pu prepar later pu nu plezir. (Zenez 1:31) Zame nu pa pu arive konpran tu bann lalwa konplike ki Li finn etabli pu kre liniver. (Eklezyast 3:11; 8:17) Me sa tigit ki nu kone la pus nu pu donn Bondye laglwar pu so bonte.

2. Ki vedir bonte?

² Ki vedir bonte? Bonte vedir seki bon lor plan moral. Me selman, li pa vedir sinpleman pa fer seki move. Bonte fer parti dan frwi lespri Bondye ek nu montre sa par bann aksyon. (Galat 5:22, 23) Nu manifeste bonte kan nu fer seki bon ek kan nu fer dibyin anver lezot. Dan sa sistem kot nu pe viv la, seki bon dan enn kominote, kapav move dan enn lot kominote. Me selman, bizin ena enn sel prinsip bonte si nu’le konn lape ek boner. Kisannla ki ena drwa etabli sa prinsip la?

3. Ki Zenez 2:16, 17 indike konsernan prinsip bonte?

³ Bondye ki etabli prinsip bonte. Dan kumansman listwar imin, Zeova Limem ki ti donn premye zom sa komannman la: “To kapav manz [frwi] tu bann pye dan zardin komye to anvi. Me an seki konsern sa pye konesans bon ek move la, to bizin pa manz [so frwi], parski zur ki to pu manz [so frwi], pena bare, sa zur la mem to pu mor.” (Zenez 2:16, 17) Wi, bann dimunn depann lor zot Kreater pu kone ki bon ek ki move.

Bondye Montre So Bonte Ki Nu Pa Merite

4. Ki Bondye finn fer pu limanite depi ki Adan finn fer pese?

⁴ Kan Adan finn fer pese ek li finn refiz aksepte drwa ki Bondye ena pu etabli bann prinsip bonte, li finn met an danze posibilite ki bann dimunn ti ena pu viv ere ek parfe pu tuletan. (Zenez 3:1-6) Me selman, avan mem ki bann desandan Adan pran nesans ek erit pese ek lamor, Bondye ti anonse ki enn Semans parfe ti pu vini. Avredir, kan Li ti pe koz avek “serpan orizinel,” Satan, ki apel usi Dyab, Zeova ti dir: “Mo pu met enn gran laenn ant twa ek sa fam la, ant to semans ek so semans. Li pu kraz to latet ek to pu mord so talon.” (Revelasyon 12:9; Zenez 3:15) Zeova ti ena lintansyon pu sov limanite ki dan pese. Atraver sakrifis ki so Garson finn done an ranson, Zeova finn pran dispozisyon pu sap bann ki ena lafwa dan sa sakrifis la. Sa li enn bonte ki nu pa merite.―Matye 20:28; Romin 5:8, 12.

5. Mem si nu finn erit bann move tandans dan nu leker, kifer eski nu kapav manifeste enn sertin degre bonte?

⁵ Parski Adan finn fer pese, nu finn erit bann move tandans dan nu leker. (Zenez 8:21) Erezman kan mem, Zeova ed nu pu manifeste enn sertin degre bonte. Kan nu persevere dan bann kitsoz ki nu finn aprann dan so parol sakre Labib ki ena buku valer, sa pa zis fer nu ‘vinn saz pu delivrans’ ek ekip nu pu tu bon travay, me sa ed nu’si pu fer seki bon devan so lizye. (2 Timote 3:14-17) Me, pu nu kapav profit linstriksyon ki ena dan Labib ek pu nu manifeste bonte, nu bizin ena mem latitid ar enn ekrivin Psom ki finn sante: “[Zeova] to bon ek to fer dibyin. Anseyn mwa to bann regleman.”―Psom 119:68.

Bonte Zeova Gayn Bann Luanz

6. Apre ki Lerwa David ti fer amenn lars lalyans dan Zerizalem, ki bann parol bann Levit ti sante?

⁶ David ki ti lerwa dan ansyin Izrael, ti rekonet ki Bondye Li bon ek li ti rod So direksyon. Li ti dir: “Zeova bon ek drwat. Akoz sa mem Li anseyn bann peser dan [bon] semin.” (Psom 25:8) Parmi bann linstriksyon ki Bondye ti donn bann Izraelit, ti ena dis lalwa byin inportan―Dis Komannman―ki ti ekrir lor de tablet ros. Ek ti gard sa bann tablet la dan enn kof sakre ki ti apel lars lalyans. Apre ki David ti fer amenn Lars dan Zerizalem, lavil kapital Izrael, bann Levit ti sant enn sante. Dan sa sante la zot ti dir: “Remersye Zeova, zot lepep, parski Li bon, parski so lamur fidel li pu tuletan.” (1 Kronik 16:34, 37-41) Wi, li ti enn gran plezir pu tann sa bann parol la dan labus bann santer Levit!

7. Ki ti arive apre ki finn amenn Lars dan Tre-Sin ek apre ki Salomon ti fini fer lapriyer linogirasyon?

⁷ Pandan linogirasyon tanp ki Salomon, garson David, ti ranze, ti fer byin resorti sa bann mem parol luanz la. Apre ki finn plas lars lalyans dan Tre-Sin sa nuvo tanp la, bann Levit finn kumans donn Zeova laglwar, “parski Li bon, ek so lamur fidel li pu tuletan.” Dan sa lokazyon la Zeova ti fer enn mirak kan Li ti ranpli tanp avek enn nyaz pu montre so prezans dan laglwar. (2 Kronik 5:13, 14) Apre ki Salomon finn fer lapriyer linogirasyon, “dife finn sorti dan lesyel ek finn kumans bril bann sakrifis.” Letan zot finn truv sa, “tu bann garson Izrael . . . deswit finn kurbe, zot figir ater lor pavaz ek zot finn prosterne ek zot finn remersye Zeova, ‘parski Li bon, ek so lamur fidel li pu tuletan.’” (2 Kronik 7:1-3) Apre 14 zur fet, bann Izraelit finn return zot lakaz “dan lazwa ek leker kontan akoz tu dibyin ki Zeova ti fer pu David ek pu Salomon ek pu Izrael so pep.”―2 Kronik 7:10.

8, 9. (a) Mem si bann Izraelit ti donn Zeova laglwar pu so bonte, ki kalite kondwit zot finn ena apre? (b) Ki Zeremi ti anonse konsernan Zerizalem, ek kuma eski sa profesi la finn realize?

⁸ Malerezman, bann Izraelit pa finn kontiyn viv an akor avek bann luanz ki zot ti sant pu Bondye. Avek letan, lepep Zida ‘finn kumans donn Zeova laglwar zis avek zot lalev.’ (Izai 29:13) Olye zot swiv bann prinsip bonte Bondye, zot finn kumans pratik seki move. Ki bann kitsoz move zot ti fer? Ebyin, zot finn kumans ador bann zidol, pratik limoralite, dominn bann pov, ek fer lezot pese byin grav! Tusala finn rann zot kupab devan Bondye. Konsekans: An 607 A.N.L., Zerizalem finn detrir ek bann abitan Zida finn al kuma bann prizonye dan Babilonn.

⁹ Alor, Bondye finn koriz so pep. Me, par profet Zeremi, Li finn anonse kan mem ki dan Zerizalem pu ena ankor bann ki pu dir: “Donn laglwar Zeova bann larme, parski Zeova bon; so lamur fidel li pu tuletan!” (Zeremi 33:10, 11) Ek sa mem ki finn arive. An 537 A.N.L., apre ki Zerizalem finn res abandone pandan 70 an, enn leres Zwif finn return dan zot peyi. (Zeremi 25:11; Danyel 9:1, 2) Zot finn reranz lotel lor Montayn Moriya, landrwa kot tanp ti ete ek la, zot finn kumans ofer bann sakrifis. Dan dezyem lane apre ki zot finn returne, zot finn poz fondasyon tanp. Sa ler la ti ena vremem enn gran lazwa! Ezra finn rakont sa: “Kan bann travayer finn poz fondasyon tanp Zeova, lerla bann pret, dan zot bann linz ofisyel, avek bann tronpet, ek bann Levit, bann garson Azaf, avek zot bann sinbal, finn leve pu donn Zeova laglwar dapre bann instriksyon David, lerwa Izrael. Ek zot finn kumans donn Zeova bann luanz ek remersye Li, ‘parski Li bon, parski so lamur fidel anver Izrael li pu tuletan.’”―Ezra 3:1-11.

10. Avek ki bann parol luanz ki ena buku sinifikasyon Psom 118 kumanse ek fini?

¹⁰ Nu truv bann mem parol luanz pu bonte Zeova dan plizir psom. Parmi ena Psom 118, ki bann fami Izraelit ti sante pu terminn selebrasyon Pak. Sa psom la kumanse ek fini par sa bann parol la: “Remersye Zeova, zot lepep, parski Li bon; parski so lamur fidel li pu tuletan.” (Psom 118:1, 29) Ek kitfwa sa mem ti bann dernye parol luanz ki Zezi Kris ti sante ansam avek so bann zapot fidel, aswar avan so lamor, dan lane 33 N.L.―Matye 26:30.

“Silteple, Fer Mwa Truv To Laglwar”

11, 12. Letan Moiz ti gayn enn ti lide laglwar Bondye, ki bann parol li ti tande?

¹¹ Nu truv relasyon ki ena ant bonte Zeova ek so lamur fidel premye fwa dan lepok Moiz, plizir syek avan lepok Ezra. Enn tipe letan apre ki bann Izraelit ti ador enn vo an or dan dezer ek lerla Bondye ti detrir tu bann move, Moiz ti sipliy Zeova: “Silteple, fer mwa truv to laglwar.” Zeova ti kone ki Moiz pa ti pu kapav get So figir ek kontiyn viv. Alor, Li ti dir li: “Mwa, mo pu fer tu mo bonte pas devan to figir.” ―Egzod 33:13-20.

¹² Landemin, lor Montayn Sinai, bonte Zeova ti pas devan figir Moiz. Dan sa ler la, Moiz ti gayn enn ti lide laglwar Bondye ek Li ti tann sa bann parol la: “Zeova, Zeova, enn Bondye ki ena mizerikord ek konpasyon, ki pa ankoler vit, ek ki ena enn labondans lamur fidel ek laverite, ki prezerv lamur fidel pu bann milye, ki pardonn erer, fot ek pese, me par okenn fason Li pa pu retir so pinisyon, Li pu amenn pinisyon lor bann garson ek lor bann ti zanfan akoz erer zot papa, lor trwazyem ek lor katriyem zenerasyon.” (Egzod 34:6, 7) Sa bann parol la indike ki bonte Zeova ena enn rapor avek so lamur fidel, ek avek lezot laspe so personalite. Si nu egzaminn sa bann laspe la, sa pu ed nu pu manifeste bonte. Avan, anu egzaminn sa kalite ki mansyone de fwa dan bann parol extraordiner ki Moiz ti tande lor bonte Bondye.

“Enn Bondye . . . Ki Ena Labondans Lamur Fidel”

13. Ki kalite ki mansyone de fwa dan bann parol ki Moiz ti tande lor bonte Bondye, ek kifer eski li apropriye?

¹³ “Zeova, [Li] enn Bondye . . . ki ena labondans lamur fidel . . . , ki prezerv lamur fidel pu bann milye.” Lamur fidel li sel kalite ki paret de fwa dan bann parol ki Bondye ti dir Moiz. Wi, sa li byin apropriye parski lamur sa mem kalite prinsipal ki Zeova ena! (1 Zan 4:8) Sa bann parol luanz ki popiler la, “parski Li bon, parski so lamur fidel li pu tuletan,” zot fer resorti ankor plis sa kalite la.

14. Kisannla sirtu pe profit bonte ek lamur fidel Bondye?

¹⁴ Zeova “ena labondans lamur fidel,” ek sa li enn fason ki Li montre so bonte. Nu truv sa byin kan nu gete kuma avek buku lamur Li pran swin so bann fidel serviter lor later ki finn angaz zot lavi pu servi Li. (1 Pyer 5:6, 7) Bann Temwin Zeova kapav konfirme ki Zeova vremem ‘pe prezerv lamur fidel’ anver bann ki kontan Li ek ki servi Li. (Egzod 20:6) Nasyon Izrael lor later ti aret gut lamur fidel Zeova, parski zot ti rezet so Garson. Me, bonte ek lamur fidel ki Bondye ena anver bann Kretyin fidel dan tu bann nasyon, sa li pu dire pu tuletan.―Zan 3:36.

Zeova Ena Mizerikord ek Konpasyon

15. (a) Par ki bann parol seki Moiz ti tande lor Montayn Sinai ti kumanse? (b) Ki vedir mizerikord?

¹⁵ Seki Moiz ti tande lor Montayn Sinai, ti kumans avek sa bann parol la: “Zeova, Zeova, enn Bondye ki ena mizerikord ek konpasyon.” Mo Ebre ki tradir “mizerikord” kapav fer referans ar “lintestin” ek li byin pre ar lexpresyon “vant enn mama.” Donk, mizerikord vedir bann santiman byin-byin profon ki ranpli ar lamur ki enn kikenn ena dan fon limem. Mizerikord pa zis enn santiman pitye. Me, li enn santiman ki bizin pus nu pu fer kitsoz pu sulaz sufrans lezot. Par egzanp bann ansyin dan kongregasyon ki ena lamur pu zot bann frer kone ki li inportan ki zot ena mizerikord anver zot bann frer ek ser, ek ki zot ‘montre mizerikord avek lazwa’ kan neseser.―Romin 12:8; Zak 2:13; Zid 22, 23.

16. Kifer eski nu kapav dir ki Zeova ena konpasyon?

¹⁶ Nu truv bonte Bondye dan so konpasyon. Enn dimunn ki ena konpasyon li enn kikenn ki ena enn “gran konsiderasyon pu santiman lezot,” ek avek buku lafeksyon li montre li ‘bon sirtu anver bann ki pli ba ki li.’ Zeova Li mem finn les pli gran legzanp dan fason ki Li montre konpasyon anver so bann serviter fidel. Par egzanp, par mwayin bann anz, avek buku konpasyon Bondye ti fortifye profet Danyel, ki ti vinn vye ek Li ti fer Mari, enn zennfi vyerz, kone ki li pu ena privilez pu donn nesans Zezi. (Danyel 10:19; Lik 1:26-38) Nu, lepep Zeova, nu ena gran rekonesans pu fason ki Li atir nu avek buku konpasyon atraver bann paz Labib. Nu donn Li laglwar pu sa fason ki Li montre so bonte la ek nu fer zefor pu montre nu bon ek pu ena konsiderasyon dan nu relasyon avek lezot. Kan bann ki ena kalifikasyon spirityel redres enn kikenn dan kongregasyon “avek enn lespri kalm,” zot fer li avek duser ek konpasyon.―Galat 6:1.

Enn Bondye Ki Pa Ankoler Vit

17. Kifer eski nu rekonesan ki Zeova “pa ankoler vit”?

¹⁷ “Enn Bondye . . . ki pa ankoler vit.” Sa bann parol la montre byin enn lot laspe bonte Zeova. Avek buku pasyans, Zeova siport nu bann erer ek Li donn nu letan pu sirmont nu bann gro febles ek pu progrese lor plan spirityel. (Ebre 5:12–6:3; Zak 5:14, 15) Bann ki pankor vinn bann adorater Bondye, zot usi zot kapav profit so pasyans. Zot ankor ena letan pu ekut mesaz Rwayom ek repanti. (Romin 2:4) Selman, mem si Zeova ena pasyans, parfwa so bonte pus Li pu montre so koler, parey kuma Li ti fer kan bann Izraelit ti ador enn vo an or kot Montayn Sinai. Byinto Zeova pu montre so koler dan enn pli gran fason, kan Li pu detrir sa move sistem Satan la.―Ezekyel 38:19, 21-23.

18. An seki konsern laverite, ki diferans ena ant Zeova ek bann dirizan lemond?

¹⁸ “Zeova [Li] enn Bondye ki ena . . . labondans . . . laverite.” Wi, Zeova byin diferan avek bann dirizan lemond ki fer bel-bel promes ek apre pa tini zot parol! Parkont, bann serviter Zeova kapav kont lor tu seki Li finn dir dan so Parol inspire. Pwiski Bondye ena labondans laverite, nu kapav tuletan ena konfyans dan so bann promes. Dan so bonte, nu Papa ki dan lesyel zame pa manke pu reponn nu kan nu priye Li pu gayn laverite spirityel. Li donn nu sa an abondans.―Psom 43:3; 65:2.

19. Dan ki fason extraodiner Zeova finn manifeste so bonte anver bann peser ki repanti?

¹⁹ “Zeova [Li] enn Bondye . . . ki pardonn erer, fot ek pese.” Dan so bonte, Zeova pre pu pardonn bann peser ki repanti. Nu byin rekonesan ki nu Papa dan lesyel ki kontan nu, finn pran dispozisyon pu pardonn nu bann pese atraver sakrifis Zezi. (1 Zan 2:1, 2) Wi, vremem nu byin kontan ki tu bann ki ena lafwa dan ranson kapav zwir enn relasyon spesyal ar Zeova, ek gard lespwar pu viv pu tuletan dan lemond nuvo ki Li finn promet. Ala bann bon rezon pu donn Zeova laglwar pu bonte ki Li finn manifeste anver limanite!―2 Pyer 3:13.

20. Ki prev nu ena ki Bondye pa exkiz mesanste?

²⁰ “Par okenn fason [Zeova] pa pu retir so pinisyon.” Avredir sa li enn lot rezon pu donn Zeova laglwar pu so bonte. Kifer? Parski bonte pa exkiz mesanste dan okenn fason. Akoz sa, ‘kan Senyer Zezi pu vini avek so bann anz pwisan,’ li pu amenn vanzans “lor tu bann ki pa konn Bondye ek ki pa obeir labonn nuvel.” Zot “pu gayn . . . destriksyon pu tuletan.” (2 Tesalonisyin 1:6-9) Lerla, bann serviter Zeova ki pu sape pu kapav profit lavi plin-plin san ki bann move dimunn ki ‘pa kontan seki bon,’ agas zot.―2 Timote 3:1-3.

Imit Bonte Zeova

21. Kifer eski nu bizin manifeste bonte?

²¹ Wi, vremem nu ena bann bon rezon pu donn Zeova laglwar ek pu remersye Li pu so bonte. Nu ki so bann serviter, eski nu pa bizin fer tu seki nu kapav pu manifeste sa kalite la? Dayer sa mem ki Lapot Pol ti ankuraz bann Kretyin kan li finn dir: “Imit Bondye, kuma bann zanfan ki Li byin kontan.” (Efezyin 5:1) Nu Papa ki dan lesyel montre so bonte tuletan, ek nu’si nu bizin fer parey.

22. Ki nu pu egzamine dan prosin lartik?

²² Si nu finn angaz nu ar Zeova avek tu nu leker, pena dut ki nu pu ena enn gran dezir pu imit so bonte. Parski nu bann desandan peser Adan, li pa fasil pu nu fer seki bon. Me, dan prosin lartik nu pu truve kifer nu kapav manifeste bonte. Nu pu egzaminn usi diferan fason kuma nu kapav ek nu bizin imit Zeova―pli gran legzanp bonte.

Kuma U Pu Reponn?

• Ki ete bonte?

• Ki bann parol ki truv dan Labib montre byin bonte Bondye?

• Dan ki bann fason eski Zeova finn manifeste so bonte?

• Kifer eski nu bizin imit legzanp bonte Zeova?

[Zimaz lor paz 10]

Zeova ti koriz so pep lontan parski zot pa ti pe viv an akor avek zot bann parol luanz

[Zimaz lor paz 10]

Enn leres fidel ti return dan Zerizalem

[Zimaz lor paz 11]

Moiz ti tann bann parol extraordiner lor bonte Bondye

[Zimaz lor paz 13]

Nu kapav truv bonte Zeova dan fason ki Li atir nu atraver bann paz Labib