Kuma Fer Fas Avek “enn Pikan dan Laser”?

“Mo faver ki [to] pa merite, sa mem ase pu twa.”—2 KORINTYIN 12:9.

1, 2. (a) Kifer eski nu bizin pa etone kan nu gayn bann leprev ek bann problem? (b) Kifer nu kapav gard konfyans malgre bann leprev?

“TU BANN ki ule viv dan latasman avek Bondye ansam avek Kris Zezi, zot usi, zot pu konn persekisyon.” (2 Timote 3:12) Kifer sa? Parski Satan pretann ki zom servi Bondye zis pu bann rezon egois, ek li pare pu fer tu pu pruv sa. Enn fwa Zezi ti donn so bann fidel zapot sa lavertisman la: “Satan finn demann pu tamiz zot, parey kuma tamiz dible.” (Lik 22:31) Zezi ti byin kone ki Bondye permet Satan teste nu par mwayin bann problem ki fer nu sufer. Byinsir, sa pa vedir ki Satan uswa so bann demon zot responsab direkteman tu problem ki nu gayne dan lavi. (Eklezyast 9:11) Me Satan ule servi kutkekut tu mwayin li ena pu kas nu latasman fidel ar Bondye.

² Labib dir nu ki fode pa nu etone kan nu gayn bann leprev. Ninport ki ariv nu, pu nu li pa drol, ni li enn kitsoz ki nu pa ti pe atann. (1 Pyer 4:12) Avredir, “partu dan lemond tu [nu] bann frer pe pas par mem sufrans.” (1 Pyer 5:9) Zordi, Satan pe met buku-buku presyon lor sak serviter Bondye. Dyab pran plezir pu truv nu afekte avek otan problem ki posib, ki kuma bann pikan. Pu fer sa, li servi so lemond enn fason ki li azut plis ‘pikan dan nu laser’ uswa li fons sa ‘bann pikan’ ki deza dan nu laser la plis dan fon. (2 Korintyin 12:7) Kan mem sa, nu kapav anpes bann latak Satan kas nu latasman fidel ar Bondye. Parey kuma Zeova “uver enn semin” pu nu andir tantasyon, Li pu fer parey kan nu gayn bann problem ki kuma bann pikan dan nu laser.—1 Korintyin 10:13.

Kuma pu Fer Fas Avek enn Pikan

3. Kuma eski Zeova ti reponn Pol kan li ti demann Li tir pikan ki ti dan so laser?

³ Lapot Pol ti sipliy Bondye pu tir sa pikan ki ti dan so laser la. “Konsernan sa, trwa fwa mo finn sipliy Senyer pu ki sa kapav kit mwa.” Kuma eski Zeova finn reponn siplikasyon intans ki Pol finn fer? “Mo faver ki [to] pa merite, sa mem ase pu twa; parski mo lafors pe vinn parfe dan febles.” (2 Korintyin 12:8, 9) Anu analiz sa repons la ek gete kuma li kapav ed nu pu fer fas avek ninport ki problem ki kuma pikan ek ki fer nu sufer.

4. Dan ki bann fason Pol ti profit faver Zeova ki li pa ti merite?

⁴ Note ki Bondye ti ankuraz Pol pu montre rekonesans pu faver ki li pa ti merite, ki li ti gayne par mwayin Kris. Wi vremem, Pol ti’nn gayn bann gran benediksyon dan buku domenn. Avek buku lamur, Zeova finn donn li privilez pu vinn enn disip Zezi, mem si li ti enn lennmi fanatik bann disip Zezi. (Akt 7:58; 8:3; 9:1-4) Apre sa, avek bonte, Zeova finn donn Pol buku privilez servis interesan. Leson ki nu kapav tire li kler. Mem dan bann sityasyon pli difisil ki kapav ena, nu tuzur ena buku benediksyon pu ki nu kapav montre nu rekonesan. Fode ki zame nu bann leprev fer nu bliye ki kantite Zeova bon anver nu.—Psom 31:19.

5, 6. (a) Kuma eski Zeova ti anseyn Pol ki So lafors ti “vinn parfe dan febles”? (b) Kuma eski legzanp Pol finn pruve ki Satan enn manter?

⁵ Faver Zeova ki nu pa merite, sa mem ase dan enn lot manyer. Lafors Bondye li plis ki ase pu ed nu dan nu bann leprev. (Efezyin 3:20) Zeova ti anseyn Pol ki So lafors ti “vinn parfe dan febles.” Kuma? Avek lamur Li ti donn Pol tu lafors ki li ti bizin pu fer fas avek so leprev. An retur, landirans Pol ek so ful konfyans an Zeova ti fer tu bann Kretyin truve ki lafors Bondye ti pe azir dan sa zom feb ek peser ki li ti ete la. Asterla anu egzaminn lefe ki legzanp Pol finn ena lor Dyab, ki pretann ki bann dimunn servi Bondye zis kan lavi korek ek kan pena problem. Ebyin, fidelite Pol ti kuma enn kalot lor figir sa manter la!

⁶ Ala Pol, ki avan ti pe mars avek Satan dan so lager kont Bondye. Li ti enn gran persekiter bann Kretyin, enn Farizyin byin devwe ki sirman ti viv dan byin parski li ti ne dan enn fami ki sorti dan enn klas favorize. Me, asterla Pol pe servi Zeova ek Kris kuma enn kikenn “pli tipti parmi bann zapot.” (1 Korintyin 15:9) Asterla, li pe sumet avek limilite ar lotorite kolez santral Kretyin premye syek. Li pe andire fidelman malgre so pikan dan laser. Satan ti dekonserte parski malgre ki Pol ti ena buku leprev dan so lavi, li pa’nn les sa afebli so zel. Zame Pol pa finn bliye so lesperans pu reyn dan Rwayom Kris dan lesyel. (2 Timote 2:12; 4:18) Okenn pikan, mem ki kantite dimal li kapav fer, pa ti pu kapav diminye so zel. Pareyman, anu kontiyn gard nu zel solid! Kan Zeova sutenir nu dan nu bann leprev, Li fer nu enn loner kan Li donn nu enn privilez ki nu pa pu gayne ankor: pruve ki Satan enn manter.—Proverb 27:11.

Bann Dispozisyon Zeova Byin Inportan

7, 8. (a) Par ki mwayin Zeova fortifye so bann serviter zordi? (b) Kifer eski lektir ek letid Labib tulezur byin inportan pu fer fas avek enn pikan dan nu laser?

⁷ Zordi, Zeova donn bann Kretyin lafors par mwayin so lespri sin, so Parol, ek nu fraternite Kretyin. Parey kuma lapot Pol, nu kapav zet nu fardo lor Zeova dan lapriyer. (Psom 55:22) Mem si kitfwa Bondye pa anlev nu bann leprev, li kapav donn nu sazes pu fer fas, mem dan bann leprev byin dir pu siporte. Zeova kapav donn nu usi kuraz—“lafors ki depas lafors normal”—pu ed nu pu andire.—2 Korintyin 4:7.

⁸ Kuma eski nu gayn sa led la? Nu bizin etidye Parol Bondye avek buku lintere, parski ladan nu truv so bann konsolasyon lor ki nu kapav konte. (Psom 94:19) Dan Labib, nu lir bann parol tusan ki bann serviter Bondye ti servi kan zot ti sipliy Bondye pu gayn So led. Dan bann repons Zeova, suvan ena bann parol rekonfortan lor ki nu kapav medite. Letid Parol Bondye pu fortifye nu pu ki “lafors ki depas lafors normal li lafors Bondye, pa nu prop lafors.” Parey kuma nu bizin manze tulezur pu nuri nu lor plan fizik ek pu nu gayn lafors, nu bizin nuri nu regilyerman avek parol Bondye. Eski nu fer sa? Si wi, nu pu truve ki kan nu gayn “lafors ki depas lafors normal,” sa ed nu pu andir ninport ki pikan sinbolik ki kitfwa pe fatig nu asterla.

9. Kuma eski bann ansyin kapav ed bann ki pe fer fas avek bann problem?

⁹ Bann ansyin ki ena lakrint pu Bondye kapav “kuma enn plas kasyet kont divan, enn refiz kont siklonn,” setadir enn proteksyon kont sufrans ek problem. Bann ansyin ki anvi reflet sa deskripsyon inspire la, demann Zeova avek limilite ek sinserite pu donn zot “lalang bann ki gayn lanseynman” pu ki zot ena bann mo ki bizin kan zot koz ar bann ki pe sufer. Bann parol bann ansyin kapav kuma enn ti lapli ki rafresi ek ki sulaz nu lespri pandan bann moman difisil dan nu lavi. Kan bann ansyin “ankuraz bann nam ki deprime,” zot vremem ed zot bann frer ek ser spirityel ki kitfwa kumans fatige uswa dekuraze akoz bann pikan ki dan zot laser.—Izai 32:2; 50:4; 1 Tesalonisyin 5:14.

10, 11. Kuma eski bann serviter Bondye ankuraz lezot ki pe andir bann gro leprev?

¹⁰ Tu bann serviter Zeova form parti dan So fami Kretyin ki ini. Wi, “nu bann manb ki apartenir ar sakenn so kamarad,” ek nu “oblize kontan nu kamarad.” (Romin 12:5; 1 Zan 4:11) Kuma eski nu swiv sa komannman la? Dapre 1 Pyer 3:8, nu fer sa kan nu ‘ena konsiderasyon pu santiman lezot, kan nu ena lafeksyon fraternel, ek kan nu montre konpasyon’ pu tu bann ki nu fami dan lafwa. Pu tu bann ki pe fer fas avek enn pikan dan laser ki fer zot byin sufer, ki zot vye uswa zenn, nu tu kapav donn zot enn latansyon spesyal. Kuma?

¹¹ Nu bizin fer zefor pu montre ki nu partaz zot sufrans. Si nu pa montre okenn santiman, nu frwa, uswa indiferan, nu kapav fer zot plis sufer, san nu rann nu kont. Kan nu konn zot bann leprev, sa kapav pus nu pu fer plis atansyon ar seki nu dir, manyer nu dir li, ek manyer nu azir. Nu letadespri pozitif ek nu lankurazman kapav diminye duler intans zot pe gayne par pikan ki dan zot laser. Kumsa nu pu enn led ki rann zot for.—Kolosyin 4:11.

Kuma Eski Bann ki Fidel Finn Reysi Fer Fas

12-14. (a) Ki enn ser Kretyin ti fer pu fer fas ar kanser? (b) Kuma eski bann frer ek ser spirityel sa madam la finn ed li ek ankuraz li?

¹² Amezir ki nu pe apros lafin sa bann dernye zur la, “bann duler” pe ogmante sak zur. (Matye 24:8) Donk, bann leprev kapav afekte tu dimunn lor later, sirtu bann fidel serviter Zeova ki pe rod fer So volonte. Anu sit par egzanp ka enn ser ki ti dan servis aplintan. Bann dokter finn dekuver ki li ti ena kanser ek ki li ti bizin fer enn loperasyon pu anlev so bann glann ki prodir lasaliv ek so bann glann linfatik. Kan li ek so mari finn aprann ki li ti ena sa maladi la, deswit zot finn turn zot ver Zeova ek zot finn sipliy Li dan enn long lapriyer. Plitar ser la finn dir ki zot finn santi enn lape inkrwayab vinn lor zot. Kan mem sa, li finn tonbe-leve, sirtu kan li ti bizin fer fas avek bann lefe segonder so tretman.

¹³ Pu fer fas avek so sityasyon, sa ser la finn sey ranseyn li otan ki li kapav lor kanser. Li finn demann lopinyon so bann dokter. Dan Latur Degard, Réveillez-vous !, ek bann lezot piblikasyon Kretyin, li finn truv zistwar lavi bann dimunn ki montre kuma zot finn fer fas ar sa maladi la lor plan afektif. Li finn lir usi bann pasaz Labib ki adapte ar so sityasyon ek ki montre kapasite Zeova pu sutenir so pep dan bann difikilte. Li finn lir usi bann lezot ranseynman ki finn byin ed li.

¹⁴ Dan enn lartik ki montre kuma fer fas avek dezespwar, ti ena sa bann mo la: “Enn kikenn ki res dan so kwin tusel pu rod [so prop] dezir egois.” (Proverb 18:1) Alor lartik la donn sa konsey la: “Reziste kont lanvi pu res tusel dan enn kwin.”a Ser la rakonte: “Buku ti dir mwa ki zot pe priye pu mwa; lezot finn telefonn mwa. De ansyin ti telefonn mwa regilyerman pu gayn mo nuvel. Mo ti resevwar bann fler ek enn kantite kart. Sertin ti mem prepar bann repa. Ti ena usi buku ki ti port zot volonter pu amenn mwa fer mo bann tretman.”

15-17. (a) Kuma eski enn Kretyin ti fer fas avek bann difikilte apre so bann aksidan? (b) Ki led bann manb so kongregasyon finn donn li?

¹⁵ Enn ser ki’nn servi Zeova depi lontan dan Nouveau-Mexique, États-Unis d’Amerique, ti fer de aksidan loto. So liku ek so zepol ti blese, ek sa finn agrav so maladi artrit avek ki li ti pe fer fas depi plis ki 25 an. Li rakonte: “Mo ti gayn buku difikilte pu tini mo latet ek sarye enn kitsoz ki pez plis ki sink liv. Me lapriyer profon ki mo’nn fer ar Zeova ek bann lartik Latur Degard ki nu finn etidye finn sutenir mwa buku. Enn lartik ladan ti fer enn komanter lor Mika 6:8 ek ti fer resorti ki mars avek modesti ar Bondye vedir rekonet nu bann limit. Sa finn ed mwa pu realize ki malgre mo kondisyon, fode pa mo dekuraze, mem si mo pas mwins letan ki mo ti swete dan minister. Servi Zeova avek bann bon mobil, sa mem ki plis konte.”

¹⁶ Li finn dir usi: “Bann ansyin finn tuletan felisit mwa pu mo bann zefor pu asiste bann reynion ek pu al prese. Bann zenn ti may mwa kan zot ti dir mwa bonzur. Bann pyonye ti ena buku pasyans avek mwa ek suvan zot ti adapte zot program dan bann zur ki mo ti tro malad pu al prese. Kan letan ti move, zot ti amenn mwa dan zot bann vizit uswa dan zot bann letid Labib. Pwiski mo pa ti kapav sarye enn sak kan mo ti al prese, bann lezot proklamater ti met mo bann piblikasyon dan zot prop sak.”

¹⁷ Remarke kuma bann ansyin dan kongregasyon ek bann lezot frer ek ser ti ed sa de ser la pu fer fas ar zot bann andikap ki ti kuma bann pikan dan zot laser. Zot ti ofer enn led pratik pu permet bannla fer fas ar bann bezwin presi dan domenn spirityel, fizik, ek afektif. Eski sa pa ankuraz u pu fer parey pu lezot frer ek ser ki dan problem? Zot, bann zenn, zot usi zot kapav ed bann ki, dan zot kongregasyon, pe lite avek bann pikan dan zot laser.—Proverb 20:29.

18. Ki lankurazman nu kapav truve dan zistwar lavi bann dimunn ki pibliye dan bann peryodik Latur Degard ek Réveillez-vous ! ?

¹⁸ Peryodik Latur Degard ek Réveillez-vous ! finn pibliy buku zistwar lor lavi ek lexperyans bann Temwin ki finn fer fas, ek ki pe tuzur fer fas avek bann problem dan lavi. Kan u lir sa bann kalite lartik la regilyerman, u pu truve ki buku u bann frer ek ser spirityel dan lemond finn andir bann problem ekonomik, finn perdi enn kikenn ki zot kontan dan bann katastrof, ek finn konn bann kondisyon danzere pandan lager. Ena lezot ki viv avek bann maladi ki’nn paraliz zot. Buku pa kapav fer bann kitsoz sinp dan lavi, ki purtan normal pu bann ki an bonn sante. Zot maladi li enn gran leprev pu zot, sirtu kan zot pa kapav fer kantite ki zot ti pu anvi, dan bann laktivite Kretyin. Zot ena vremem enn gran rekonesans pu led ek sutyin ki zot bann frer ek ser, zenn ek vye, donn zot!

Landirans Fer Gayn Boner

19. Kifer eski Pol ti kapav rezwir malgre so bann leprev ek so bann febles ki ti kuma bann pikan?

¹⁹ Pol ti kontan kan li ti’nn truve kuma Bondye ti fortifye li. Li ti dir: “Mo prefer flat mwa dan mo bann febles, pu ki lafors Kris res lor mwa kuma enn latant. Donk pu Kris, mo pran plezir dan bann febles, kan mo gayn maltrete, kan mo pena nanyin, dan persekisyon ek dan bann difikilte. Parski kan mo feb, lerla mem mo for.” (2 Korintyin 12:9, 10) Akoz so bann lexperyans personel, Pol ti kapav dir avek konfyans: “Mo pa dir sa akoz mo pena nanyin, parski mo finn aprann pu debriy par mo mem dan ninport ki sityasyon. Wi, mo konn viv avek tigit [manze], mo konn viv dan labondans. Dan tu kitsoz ek dan tu sirkonstans mo finn aprann sekre pu viv kan ena buku ek kan pena manze, ek viv dan labondans ek kan pena nanyin. Pu tu kitsoz mo ena kuraz grasa sa Kikenn ki donn mwa lafors la.”—Filipyin 4:11-13.

20, 21. (a) Kifer eski nu kapav truv lazwa kan nu medit lor “bann kitsoz ki nu pa kapav truve”? (b) Ki detrwa “bann kitsoz ki nu pa kapav truve” u ena lespwar pu truve dan Paradi lor later?

²⁰ Alor, kan nu andir ninport ki pikan sinbolik dan nu laser, nu kapav truv enn gran satisfaksyon kan nu montre tu dimunn ki lafors Zeova pe vinn parfe dan nu febles. Pol ti ekrir: “Nu pa bes lebra. . . Sa dimunn ki nu ete andan la pe renuvle dezur-an-zur. Parski mem si leprev la li tipti ek li pu enn tigit letan mem, li donn nu enn laglwar ki ena enn pwa deplizanpli extraordiner ek ki eternel; alor ki nu fixe nu lizye . . . lor bann kitsoz ki nu pa truve. Parski bann kitsoz . . . ki nu pa truve, zot eternel.”—2 Korintyin 4:16-18.

²¹ Laplipar serviter Zeova zordi ena lesperans pu viv dan so Paradi lor later ek pu zwir bann benediksyon ki Li’nn promet. Zordi, nu kapav konsider sa bann benediksyon la kuma “bann kitsoz ki nu pa truve.” Me, ler pe koste vit-vit kot nu pu truv sa bann benediksyon la avek nu prop lizye, wi, ek kot nu pu zwir tusala pu tuletan. Enn sa bann benediksyon la, se ki zame ankor nu pu bizin viv avek bann problem ki kuma pikan dan nu laser! Garson Bondye pu “detrir bann travay Dyab” ek li pu fer “sa kikenn ki provok lamor la vinn enn nanyin ditu.”—1 Zan 3:8; Ebre 2:14.

22. Ki konfyans ek ki determinasyon nu bizin ena?

²² Donk, anu kontiyn fer fas avek ninport ki pikan dan nu laser ki pe fer nu dimal zordi. Parey kuma Pol, nu pu gayn kuraz pu fer tusala grasa Zeova, ki donn nu lafors avek zenerozite. Kan nu pu viv dan Paradi lor later, nu pu beni Zeova nu Bondye tulezur pu tu so bann travay extraordiner ki Li fer pu nu.—Psom 103:2.

[Not anba paz]

Kuma Eski U Pu Reponn?

• Kifer ek kuma eski Dyab rod kas latasman fidel bann vre Kretyin?

• Kuma eski lafors Zeova “finn vinn parfe dan febles”?

• Kuma eski bann ansyin ek lezot kapav ankuraz bann ki sufer akoz bann problem?

[Zimaz lor paz 13]

Trwa fwa Pol ti priye Bondye pu ki Li tir pikan ki ti dan so laser