Kifer Eski Bizin Batize?

“Ale . . . ek fer bann dimunn dan tu bann nasyon vinn bann disip, batiz zot.” —MATYE 28:19.

1, 2. (a) Dan ki bann sirkonstans sertin ti batize? (b) Ki bann kestyon ki suleve konsernan batem?

DAN lane 775-777 N.L., Charlemagne, Lerwa enn pep ki ti apel bann Francs, ti fors bann Saxon ki li ti konkerir, pu batize kuma enn grup an antye. Istoryin John Lord finn ekrir ki “li ti fors zot pu konverti, pu vinn bann Kretyin zis par non.” Pareyman, apre ki dirizan Russie, Vladimir I ti marye avek enn laprinses Grek Ortodox an 987 N.L., li ti deside ki tu bann ki anba so lotorite pu bizin vinn “bann Kretyin.” Li ti donn lord pu batiz lepep kuma enn grup an antye—ti menas pu tuy bann ki ti refize!

² Eski sa bann kalite batem la ti bon? Eski zot ena enn vre sinifikasyon? Eski bizin batiz ninport kisannla?

Batem—Kuma?

3, 4. Kifer eski aroze uswa vers delo lor latet pa bon metod pu batem Kretyin?

³ Kan Charlemagne ek Vladimir I ti fors bann dimunn pu batize, zot ti pe azir kont Parol Bondye. Avredir, bann dimunn pa tir okenn profi kan aroz zot latet avek inpe delo, ek mem kan plonz zot dan delo, alor ki zot pa finn aprann laverite ki ena dan Labib.

⁴ Get seki ti arive kan Zezi Nazaret ti vinn ver Zan Batis dan lane 29 N.L. Zan ti pe batiz bann dimunn dan Larivyer Zurdin. Sa bann dimunn la ti’nn vinn ver li volonterman pu pran batem. Eski Zan ti fer zot sinpleman debut dan Zurdin ek apre li ti vers inpe delo larivyer lor zot latet uswa aroz zot avek sa? Ki ti arive kan Zan ti batiz Zezi? Matye rakonte ki “deswit Zezi finn sorti anba delo,” apre ki li finn batize. (Matye 3:16) Sa vedir ki li ti anba delo; Zan ti plonz li dan Larivyer Zurdin. Parey kumsa mem, sa ofisye Etyopyin ki ti byin relizye la ti batize dan “enn ase gran kantite delo.” Sa bann gran kantite delo la ti neseser parski pu batiz Zezi ek so bann disip, ti bizin plonz zot net dan delo.—Akt 8:36.

5. Kuma eski bann premye Kretyin ti batiz bann dimunn?

⁵ Bann mo Grek ki tradir “batize,” ek “batem” fer referans ar plonze uswa kule anba delo. Smith’s Bible Dictionary dir: “Vre sinifikasyon batem vedir plonze.” Akoz sa, sertin tradiksyon Labib mansyonn “Zan ki ti plonz bann dimunn.” (Matye 3:1, Rotherham; Diaglott interlinear) Dan so liv History of the Christian Religion and Church, During the Three First Centuries (Listwar Bann Relizyon Kretyin ek Legliz, Pandan Trwa Premye Syek), Auguste Neander fer sa remark la: “Kan ti batiz bann dimunn okumansman, ti pe plonz zot.” Larousse du XX^e Siècle (Paris, 1928) fer sa komanter la: “Kan bann premye Kretyin ti batize, ti plonz zot dan ninport ki plas kot ti ena delo.” New Catholic Encyclopedia dir: “Li kler ki kumansman dan Legliz, ti plonz bann dimunn kan ti batiz zot.” (1967, Volim II, paz 56) Alor zordi, kan enn kikenn batize pu vinn enn Temwin Zeova, li fer sa volonterman ek plonz li net dan delo.

Enn Nuvo Rezon pu Batize

6, 7. (a) Pu ki rezon Zan ti batiz bann dimunn? (b) Ki ti nuvo dan batem bann disip Zezi?

⁶ Bann batem ki Zan ti fer pa ti ena mem lobzektif ki batem ki bann disip Zezi ti fer. (Zan 4:1, 2) Batem ki Zan ti donn bann dimunn, ti montre an piblik ki zot ti repanti pu pese ki zot ti komet kont Lalwa.a (Lik 3:3) Me ti ena enn kitsoz nuvo dan batem bann disip Zezi. Dan fet Lapantkot lane 33 N.L., lapot Pyer ti donn bann dimunn ki ti ekut li sa lankurazman la: “Repanti, ek sakenn parmi zot, batize onon Zezi Kris pu gayn pardon zot pese.” (Akt 2:37-41) Mem si Pyer ti pe adres ar bann Zwif ek bann ki ti konverti pu vinn Zwif, li pa ti pe koz lor batem ki ti montre ki enn dimunn ti pe repanti pu pese ki li ti’nn fer kont Lalwa. Ni li ti rod dir ki kan enn kikenn batize onon Zezi, sa vedir ki so bann pese lave.—Akt 2:10.

⁷ Dan sa lokazyon la, Pyer ti servi premye parmi “bann lakle rwayom.” Dan ki lintansyon? Pu fer bann ki pe ekut li konn privilez ki zot ti ena pu rant dan Rwayom ki dan lesyel. (Matye 16:19) Pwiski bann Zwif ti’nn rezet Zezi kuma Mesi, repanti ek montre lafwa an li, sa ti enn nuvo fakter inportan pu zot rod ek gayn pardon Bondye. Zot ti kapav montre sa lafwa la an piblik kan ti plonz zot dan delo onon Zezi Kris. Dan sa fason la, zot ti pu montre zot langazman personel avek Bondye atraver Kris. Tu seki anvi gayn faver Bondye zordi bizin montre sa kalite lafwa la, angaz zot ar Bondye Zeova ek pran batem Kretyin an sinbol zot langazman total ar Bondye, sa Kikenn ki Pli Ot la.

Konesans Egzak Neseser

8. Kifer eski batem Kretyin pa pu tu dimunn?

⁸ Batem Kretyin pa pu tu dimunn. Zezi ti donn so bann disip sa komannman la: “Ale ek fer bann dimunn dan tu bann nasyon vinn bann disip, batiz zot onon Papa, onon Garson ek onon lespri sin, anseyn zot pu pratik tu bann kitsoz ki mo finn komann zot.” (Matye 28:19, 20) Avan ki bann dimunn pran batem, bizin ‘anseyn zot pu pratik tu bann kitsoz ki Zezi finn komann so bann disip.’ Alor, batiz parfors bann dimunn ki mank lafwa baze lor enn konesans egzak Parol Bondye, pena valer ek li kont komannman ki Zezi ti donn so bann vre disip.—Ebre 11:6.

9. Ki vedir batize “onon Papa”?

⁹ Ki vedir batize “onon Papa”? Sa vedir ki kandida batem la rekonet pozisyon ek lotorite nu Papa ki dan lesyel. Wi, li aksepte Bondye Zeova kuma nu Kreater, kuma “sa Kikenn ki Pli Ot lor later antye la,” ek kuma Suverin Liniver.—Psom 83:18; Izai 40:28; Akt 4:24.

10. Ki vedir batize ‘onon Garson’?

¹⁰ Batize ‘onon Garson’ vedir rekonet pozisyon ek lotorite Zezi antan ki sel Garson ki finn kre direk par Bondye. (1 Zan 4:9) Bann ki ranpli bann kondisyon pu batem aksepte Zezi kuma sa kikenn ki Zeova finn servi pu donn “enn ranson an esanz pu buku.” (Matye 20:28; 1 Timote 2:5, 6) Bann kandida batem bizin rekonet usi “pozisyon siperyer” ki Bondye finn donn so Garson.—Filipyin 2:8-11; Revelasyon 19:16.

11. Ki vedir batize ‘onon lespri sin’?

¹¹ Ki vedir batize ‘onon lespri sin’? Sa indike ki kandida batem la rekonet ki lespri sin li lafors aktif Bondye, ki Li servi dan plizir fason an akor avek so volonte. (Zenez 1:2; 2 Samyel 23:1, 2; 2 Pyer 1:21) Bann ki ranpli bann kondisyon pu pran batem rekonet ki lespri sin ed zot pu konpran “bann kitsoz profon an rapor avek Bondye.” Li ed zot pu akonpli travay predikasyon Rwayom, ek pu manifeste frwi lespri “lamur, lazwa, lape, pasyans, fer dibyin, bonte, lafwa, duser, kontrol numem.”—1 Korintyin 2:10; Galat 5:22, 23; Yoel 2:28, 29.

Linportans pu Repanti ek pu Konverti

12. Ki rapor ena ant batem Kretyin ek repanti?

¹² Eksepte dan ka Zezi ki pa ti fer pese, batem li enn sinbol ki Bondye apruve ek ki montre ki nu finn repanti. Kan nu repanti, nu resanti enn profon regre uswa tristes pu enn kitsoz ki nu finn fer uswa ki nu pa finn reysi fer. Bann Zwif premye syek ki ti anvi fer Bondye plezir ti bizin repanti pu bann pese ki zot ti fer kont Zezi Kris. (Akt 3:11-19) Dan Korint, sertin krwayan ki pa ti Zwif ti repanti pu bann pese kuma vis sexyel, lidolatri, vol ek lezot pese grav ki zot ti fer. Parski zot ti’nn repanti, zot ti “finn lave” dan disan Zezi; zot ti “finn sanktifye,” uswa met apar pu servis Bondye; ek ti “deklar zot drwat” onon Zezi Kris ek avek lespri sin Bondye. (1 Korintyin 6:9-11) Repanti li enn etap inportan pu enn dimunn gayn enn bon konsyans ek sulazman ki Bondye done pu santiman kilpabilite ki pez lor li akoz li fer pese.—1 Pyer 3:21.

13. An rapor avek batem, ki vedir konverti?

¹³ Nu bizin konverti avan ki nu batize pu vinn enn Temwin Zeova. Enn kikenn ki konverti li enn kikenn ki volonterman finn pran enn desizyon avek tu so leker pu swiv Kris Zezi. Sa bann kalite dimunn la rezet zot ansyin kondwit ek zot determine pu fer seki drwat devan lizye Bondye. Dan Labib, bann mo Ebre ek Grek ki asosye ar konverti vedir fer demi tur, returne. Sa vedir kit enn move semin pu return ar Bondye. (1 Lerwa 8:33, 34) Enn kikenn ki konverti fer ‘bann travay ki montre ki li finn repanti.’ (Akt 26:20) Sa vedir ki nu bizin abandonn fos ladorasyon, azir an akor avek bann komannman Bondye, ek donn Zeova enn latasman zis pu Li tusel. (Deteronom 30:2, 8-10; 1 Samyel 7:3) Kan nu konverti, nu panse, nu bann lobzektif ek nu personalite sanze. (Ezekyel 18:31) Nu “returne” amezir ki enn nuvo personalite ranplas nu bann ansyin tre karakter ki pa ti fer Bondye plezir.—Akt 3:19; Efezyin 4:20-24; Kolosyin 3:5-14.

Li Inportan Ki Nu Angaz Nu Avek Tu Nu Leker

14. Kan bann disip Zezi angaz zot ar Bondye, ki sa sinifi?

¹⁴ Avan zot batize, bann disip Zezi usi bizin angaz zot avek tu zot leker ar Bondye. Angaze vedir met apar pu fer enn kitsoz sakre. Sa etap la telman inportan ki dan lapriyer nu bizin fer Zeova kone ki nu deside pu donn Li tuletan enn latasman zis pu Li tusel. (Deteronom 5:9) Byinsir, nu pa finn angaz nu ar enn travay uswa enn imin, me ar Bondye Limem.

15. Kifer eski plonz bann kandida batem dan delo?

¹⁵ Kan nu angaz nu ar Bondye atraver Kris, nu montre ki nu determine pu servi nu lavi pu fer volonte Bondye, parey kuma finn ekrir dan Labib. Pu sinboliz sa langazman la, plonz bann kandida batem dan delo, parey kuma Zezi ti batize dan Larivyer Zurdin pu prezant limem devan Bondye. (Matye 3:13) Li interesan pu note ki Zezi ti priye dan sa lokazyon byin inportan la.—Lik 3:21, 22.

16. Kan nu get bann dimunn pran batem, kuma eski nu kapav montre nu lazwa dan enn bon fason?

¹⁶ Batem Zezi ti enn levennman serye, me an mem tan zwaye. Batem Kretyin usi parey zordi. Kan nu truv bann dimunn montre zot langazman ar Bondye, nu kapav montre nu lazwa kan nu tap lamin avek respe ek kan nu felisit zot avek buku santiman. Me, fode pa kriye, sufle, uswa fer bann lezot kitsoz kumsa pu pa mank respe pu valer sakre sa levennman la, kot sa bann dimunn la pe montre zot lafwa. Nu montre nu lazwa avek dinite.

17, 18. Kuma kapav kone si bann dimunn ranpli bann kondisyon pu pran batem?

¹⁷ Kontrerman ar bann ki vers delo lor latet bann tibaba, uswa ki fors bann grup dimunn pu batize, bann Temwin Zeova zame pa fors personn pu batize. Dayer, zot pa batiz bann ki pa ranpli bann kondisyon ki ena dan Labib. Avan mem ki enn kikenn vinn enn proklamater ki pa batize, bann ansyin fer sir ki li konpran bann lanseynman debaz lor Labib, ki li viv an akor avek sa bann lanseynman la ek ki li reponn wi, kan demann li: “Eski vremem u ti pu kontan vinn enn Temwin Zeova?”

¹⁸ Dan laplipar ka, kan bann dimunn pe partisip byin dan travay predikasyon Rwayom ek zot dir ki zot ena enn dezir pu batize, bann ansyin gayn bann konversasyon avek zot pu fer sir ki zot bann krwayan ki finn angaz zot ar Zeova ek ki zot ranpli bann kondisyon pu pran batem. (Akt 4:4; 18:8) Bann ansyin pu kapav determine si sa bann dimunn la ranpli bann kondisyon ki ena dan Labib pu batize kan zot reponn plis ki 100 kestyon lor bann lanseynman Labib. Ena ki pa ranpli bann kondisyon, alor zot pa gayn batem Kretyin.

Eski Ena Kitsoz Ki Pe Retenir U?

19. Dapre seki Zan 6:44 dir, kisannla ki pu zeritye ansam avek Zezi Kris?

¹⁹ Buku dimunn ki finn batiz an grup parfors finn tann promes ki zot pu al viv dan lesyel apre lamor. Me konsernan bann disip ki ti pu swiv so tras, Zezi ti dir: “Personn pa kapav vinn ver mwa, amwin mo Papa, ki finn anvway mwa, atir li.” (Zan 6:44) Zeova finn atir ver Kris 144,000 dimunn ki pu zeritye ansam ar Zezi dan Rwayom ki dan lesyel. Batem forse zame pa finn met personn apar pu sa plas laglwar dan laranzman Bondye la.—Romin 8:14-17; 2 Tesalonisyin 2:13; Revelasyon 14:1.

20. Ki kapav ed sertin ki pankor pran batem?

²⁰ Ver 1935 sirtu, bann gran laful dimunn ki ena lesperans pu travers vivan “gran detres” ek viv pu tuletan lor later, finn kumans vinn fer parti dan “bann lezot muton” Zezi. (Revelasyon 7:9, 14; Zan 10:16) Zot ranpli bann kondisyon pu pran batem parski zot viv an akor avek Parol Bondye ek zot kontan Bondye avek ‘tu zot leker, tu zot nam, tu zot lafors, ek tu zot lespri.’ (Lik 10:25-28) Mem si sertin dimunn rekonet ki bann Temwin Zeova ‘ador Bondye avek lespri ek laverite,’ zot pankor swiv legzanp Zezi ek pran batem pu montre an piblik zot vre lamur ek latasman pu Zeova tusel. (Zan 4:23, 24; Deteronom 4:24; Mark 1:9-11) Si zot fer enn lapriyer sinser ek presi konsernan sa etap inportan la, sa pu donn zot motivasyon ek kuraz pu viv an akor net avek Parol Bondye, pu angaz zot net avek Bondye Zeova, ek pu pran batem.

21, 22. Pu ki bann rezon sertin pa rod angaz zot ar Bondye ek pran batem?

²¹ Ena pa rod angaz zot ar Bondye ek pran batem parski zot telman plonze dan bann zafer lemond uswa zot pe telman galup deryer larises, ki zot pena letan mem pu bann kitsoz spirityel. (Matye 13:22; 1 Zan 2:15-17) Zot pu vremem ere si zot sanz zot latitid ek zot bann lobzektif! Si zot vinn pros ar Zeova, zot pu beni lor plan spirityel, zot pu sulaze ar zot bann traka, ek zot pu gayn lape ek satisfaksyon parski zot pe fer volonte Bondye.—Psom 16:11; 40:8; Proverb 10:22; Filipyin 4:6, 7.

²² Lezot dir ki zot kontan Zeova, me zot pa angaz zot ar Li ek pran batem parski zot panse ki kumsa zot pa pu bizin rann kont devan Bondye. Me, sakenn parmi nu pu bizin rann kont devan Bondye. Avredir, enn fwa ki nu’nn tann parol Zeova, nu’nn fini gayn enn responsabilite lor nu latet. (Ezekyel 33:7-9; Romin 14:12) Pwiski bann Izraelit ti enn ‘pep ki ti finn swazire,’ zot ti ne dan enn nasyon ki ti deza fini angaze ar Zeova. Alor, zot ti oblize servi Li fidelman an akor avek so bann komannman. (Deteronom 7:6, 11) Zordi, personn pa vinn enn serviter ki angaze ar Bondye kuma li ne, me si nu finn gayn konesans egzak ki ena dan Labib, nu bizin azir avek lafwa dapre sa konesans la.

23, 24. Ki bann ezitasyon bizin pa retenir bann dimunn pu pran batem?

²³ Ena ki ezite pu pran batem parski zot per ki zot pena ase konesans. Li vre ki nu tu nu ena buku pu aprann parski ‘zame bann dimunn pa pu dekuver travay ki vre Bondye finn fer depi kumansman ziska lafin.’ (Eklezyast 3:11) Get par egzanp sa ofisye Etyopyin la. Pwiski li ti konverti pu vinn Zwif, li ti ena deza enn konesans Lekritir, me pa pu sa ki li ti kapav reponn tu bann kestyon lor bann proze Bondye. Apre ki li ti’nn aprann lor dispozisyon ki Bondye ti’nn pran atraver ranson sakrifis Zezi pu sov bann dimunn, deswit sa ofisye la ti pran batem dan delo.—Akt 8:26-38.

²⁴ Ena ankor ki ezite pu angaz zot ar Bondye parski zot per pangar zot pa reysi respekte zot langazman. Monique, enn zennfi 17 an dir: “Mo ti ezite pu pran batem parski mo ti per pangar mo pa reysi viv an akor avek mo langazman.” Me, si nu fer Zeova konfyans avek tu nu leker, ‘Li pu rann nu bann semin drwat.’ Li pu ed nu pu “kontiyn mars dan laverite” kuma so bann serviter fidel ki finn angaze ar Li.—Proverb 3:5, 6; 3 Zan 4.

25. Ki kestyon merite ki nu egzamine asterla?

²⁵ Tulelane plizir milye dimunn santi zot puse pu angaz zot lavi ar Bondye ek pu pran batem, parski zot ena enn konfyans total an Zeova ek zot kontan Li avek tu zot leker. Sirman, tu bann serviter Bondye ki angaze ar Li anvi res fidel ar Li. Me selman, nu pe viv bann letan kritik, ek nu lafwa pas dan plizir leprev. (2 Timote 3:1-5) Ki nu kapav fer pu viv an akor avek nu langazman ar Zeova? Nu pu egzaminn sa dan prosin lartik.

[Not anba paz]

Eski U Rapel?

• Kuma batem Kretyin derule?

• Ki konesans enn kikenn bizin gayne pu li batize?

• Ki bann etap amenn enn kikenn ver batem bann vre Kretyin?

• Kifer eski sertin retenir zot pu pran batem, me ki led zot kapav gayne?

[Zimaz lor paz 24]

Eski u kone ki vedir batize ‘onon Papa, onon Garson, ek onon lespri sin’?