Nu Donn Zeova enn Gran Lestim Kan Nu Fer Seki Li Demande
“Mo pu donn Li enn gran lestim avek remersiman.”—PSOM 69:30.
1. (a) Kifer eski Zeova merit enn gran lestim? (b) Kuma eski nu donn Li enn gran lestim avek remersiman?
ZEOVA Li Bondye tu-pwisan, Li Suverin Liniver, Li Kreater. Akoz sa, so non ek so bann proze merit enn gran lestim. Donn Zeova enn gran lestim vedir donn Li pli gran laglwar ki ena, onor Li ek donn Li luanz par parol ek par aksyon. Pu fer sa “avek remersiman,” nu bizin tuletan remersye Li pu seki Li pe fer pu nu asterla ek pu seki Li pu fer dan lavenir. Nu truv latitid ki nu bizin ena dan Revelasyon 4:11, kot bann kreatir spirityel fidel dan lesyel dir: “Zeova, nu Bondye, to merit gayn laglwar, loner ek puvwar, parski to finn kre tu kitsoz, ek akoz to volonte ki zot finn egziste ek zot finn kre.” Kuma eski nu donn Zeova enn gran lestim? Kan nu aprann lor Li ek lerla nu fer seki Li demann nu. Nu bizin ena mem santiman ki sa ekrivin Psom la, kan li ti dir: “Anseyn mwa pu fer to volonte, parski to mo Bondye.”—Psom 143:10.
2. Kuma eski Zeova tret bann ki donn Li enn gran lestim, ek bann ki pa fer li?
2 Zeova apresye bann ki donn Li enn gran lestim. Ala kifer, Li “sa Kikenn ki rekonpans bann ki fer zefor pu rod Li la.” (Ebre 11:6) Ki rekonpans sa? Dan enn lapriyer, Zezi ti dir so Papa ki dan lesyel: “Sa mem seki vedir lavi pu tuletan, ki zot aprann konn twa, sel vre Bondye ek Zezi Kris, sa kikenn ki to finn anvwaye la.” (Zan 17:3) Wi, bann ki “donn [Zeova] enn gran lestim avek remersiman” pu “gayn later, ek zot pu res pu tuletan lor la.” (Psom 37:29) Parkont, “pa pu ena okenn lavenir pu ninport kisannla ki move.” (Proverb 24:20) Dan sa bann dernye zur la, li byin irzan pu donn Zeova enn gran lestim parski byinto Li pu detrir bann move ek Li pu prezerv bann ki drwat. “Lemond pe al fini ek so dezir usi, me seki fer volonte Bondye pu res pu tuzur.”—1 Zan 2:17; Proverb 2:21, 22.
3. Kifer eski nu bizin pran kont liv Malaki?
3 Labib montre nu volonte Zeova, parski “tu Lekritir finn inspire par Bondye.” (2 Timote 3:16) Dan Parol Bondye ena buku bann resi ki montre kuma Zeova beni bann ki donn Li enn gran lestim ek seki ariv bann ki pa fer sa. Enn sa bann resi la ena enn rapor avek seki ti pase an Izrael dan lepok profet Malaki. Ver lane 443 A.N.L., alor ki Neemya ti guverner Zida, Malaki ti ekrir liv ki port so non. Sa liv la byin pwisan ek li byin kaptivan. Li ranferm bann ranseynman ek bann profesi ki “finn ekrir kuma enn lavertisman pu nu, lor ki bann lafin bann sistem ki egziste finn arive.” (1 Korintyin 10:11) Si nu pran kont bann parol Malaki, sa kapav ed nu pu prepar nu pu “gran zur Zeova ki fer per,” kan Li pu detrir sa move sistem la.—Malaki 4:5.
4. Mansyonn sis pwin lor ki Malaki sapit 1 atir nu latansyon.
4 Kuma eski liv Malaki, ki finn ekrir plis ki 2,400 an avan, kapav ed nu dan sa 21em syek la pu prepar nu pu gran zur Zeova ki fer gayn per? Sapit premye atir nu latansyon lor omwin sis pwin ki byin inportan pu nu donn Zeova enn gran lestim avek remersiman pu gayn so faver ek lavi pu tuletan: (1) Zeova kontan so pep. (2) Nu bizin apresye bann kitsoz sakre. (3) Zeova atann ki nu donn Li seki nu ena meyer. (4) Vre ladorasyon motive par enn lamur ki pa egois, pa par gurmandiz. (5) Enn servis akseptab pu Bondye li pa enn servis rutinn ki kuma enn fardo. (6) Sakenn parmi nu bizin rann kont Bondye. Donk, dan premye parmi sa trwa lartik la, amezir ki nu egzaminn Malaki sapit 1, anu analiz sa bann pwin la enn par enn.
Zeova Kontan So Pep
5, 6. (a) Kifer eski Zeova ti kontan Zakob? (b) Si nu fidel parey kuma Zakob, ki nu kapav atann?
5 Lamur Zeova resorti klerman dan bann premye verse Malaki. Liv la kumans par sa bann mo la: “Enn deklarasyon: Parol Zeova konsernan Izrael.” Pli lwin, Bondye dir: “Mo finn kontan zot.” Dan sa mem verse la, Zeova sit enn legzanp kan Li dir: “Mo ti kontan Zakob.” Zakob ti enn zom ki ti ena lafwa an Zeova. Avek letan, Zeova ti sanz non Zakob ek Li ti apel li Izrael, ek li ti vinn enn anset pu nasyon Izrael. Zeova ti kontan Zakob parski li ti enn zom ki ti ena lafwa. Zeova ti kontan usi bann ki, parmi lepep Izrael, ti ena mem latitid anver Zeova ki Zakob.—Malaki 1:1, 2.
6 Si nu kontan Zeova ek nu res atase fidelman ar so pep, nu kapav gayn rekonfor dan bann parol ki truv dan 1 Samyel 12:22: “Zeova pa pu abandonn so pep akoz so gran non.” Zeova kontan so pep, ek alafin Li pu donn zot lavi pu tuletan an rekonpans. Alor, Labib fer sa promes la: “Met to konfyans an Zeova ek fer seki bon; res lor later, ek azir fidelman. Pran plezir an Zeova, ek Li pu donn twa seki to leker demande.” (Psom 37:3, 4) Malaki sapit 1 atir nu latansyon lor enn dezyem pwin an rapor avek nu lamur pu Zeova.
Apresye Bann Kitsoz Sakre
7. Kifer eski Zeova ti ayir Ezau?
7 Dan Malaki 1:2, 3, apre ki Zeova dir: “Mo finn kontan Zakob,” Li dir: “Mo finn ayir Ezau.” Kifer sa diferans la? Zakob ti donn Zeova enn gran lestim, kontrerman ar so frer zimo Ezau. Ezau ti apel usi Edom. Dan Malaki 1:4, apel peyi Edom teritwar mesanste, ek Bondye akiz so bann abitan. Ezau ti gayn sa non Edom la (ki vedir “Ruz”) apre ki li ti vann so drwa premye-ne, ki ti ena buku valer, ar Zakob pu enn bol lanti ruz. Zenez 25:34 dir: “Ezau ti mepriz so drwa premye-ne.” Lapot Pol ti ankuraz so bann frer pu vey byin ki “pena personn ki fer bann vis sexyel, ni enn kikenn ki pa apresye bann kitsoz sakre, kuma Ezau, ki finn donn so bann drwa premye-ne an esanz enn repa.”—Ebre 12:14-16.
8. Ki finn fer Pol konpar Ezau ar enn kikenn ki komet bann vis sexyel?
8 Kifer eski Pol ti asosye bann aksyon Ezau avek bann vis sexyel? Parski si enn kikenn ena mem latitid ki Ezau, sa kapav amenn li pa apresye bann kitsoz sakre. Lerla, li kapav komet bann pese grav, kuma bann vis sexyel. Alor, sakenn parmi nu bizin demann limem: ‘Eski parfwa mo tante pu esanz mo leritaz Kretyin—lavi eternel—kont enn kitsoz tanporer ki parey kuma enn bol lanti? Kitfwa san ki mo realize, eski mo pe mepriz bann kitsoz sakre?’ Ezau pa ti kapav atann, li ti byin anvi satisfer enn gran dezir fizik. Akoz sa, li ti dir Zakob: “Silteple, vit, donn mwa sa ruz la mo avale?” (Zenez 25:30) Malerezman, li vre ki sertin nu bann frer usi finn dir: “Vit! Kifer eski bizin atann enn maryaz onorab?” Wi pu zot, satisfer zot dezir sexyel pu ninport ki pri, sa finn vinn zot bol lanti.
9. Kuma eski nu kapav gard enn lakrint ranpli avek respe pu Zeova?
9 Fode zame nu mepriz bann kitsoz sakre par enn mank respe pu pirte sexyel, nu latasman fidel ar Bondye, ek pu nu leritaz spirityel. Olye ki nu fer parey kuma Ezau, anu plito montre enn lakrint ranpli avek respe pu Bondye, kan nu montre enn profon lapresyasyon pu bann kitsoz sakre, parey kuma fidel Zakob. Kuma eski nu kapav fer sa? Kan nu vey byin pu fer seki Zeova demann nu. Zisteman, sa amenn nu lor enn trwazyem pwin ki Malaki sapit 1 fer resorti. Ki sa pwin la sa?
Donn Zeova Seki Nu Ena Meyer
10. Dan ki fason bann pret ti pe mepriz latab Zeova?
10 Bann pret Zida ki ti servi dan tanp Zerizalem dan lepok Malaki, pa ti pe ofer Zeova bann meyer sakrifis. Malaki 1:6-8 dir: “‘Enn garson, li, li donn loner so papa; ek enn serviter donn loner so gran met. Alor, si mo enn papa, kot loner ki mo merite? Ek si mo enn gran met, kot lakrint pu mwa?’ Sa mem ki Zeova bann larme finn dir zot, zot bann pret ki pe mepriz mo non.” Alor, bann pret la finn demande: “Ki manyer eski nu finn mepriz to non?” Zeova reponn: “Zot finn prezant dipin ki polye lor mo lotel.” Bann pret demande: “Ki manyer eski nu finn polye twa?” Alor Zeova dir zot: “Kan zot finn dir: ‘Latab Zeova li enn kitsoz ki kapav meprize.’” Sa bann pret la ti montre ki zot ti pe mepriz latab Zeova sak fwa ki zot ti pe ofer an sakrifis enn zanimo ki ena defo, ek zot ti dir: “Pa grav sa.”
11. (a) Ki Zeova ti dir konsernan bann sakrifis ki Li pa ti aksepte? (b) Dan ki fason lepep an zeneral ti antor?
11 Lerla, Zeova ti rezonn avek zot konsernan sa bann kalite sakrifis ki Li pa ti aksepte la: “Silteple, amenn sa sakrifis la devan to guverner. Eski li pu pran plezir ar twa, uswa eski li pu akey twa byin?” Non, zot guverner pa ti pu pran plezir dan sa kalite ofrand la. Donk, komye plis nu Suverin Liniver pa pu aksepte sa bann ofrand fay kalite la! Pa zis bann pret ki ti antor. Li vre ki zot ti mepriz Zeova kan zot ti pe fer sa bann sakrifis la. Me, eski lepep an zeneral ti inosan? Non! Apre tu, zotmem ki ti’nn swazir bann zanimo aveg, bwate ek malad ek ti’nn amenn zot kot bann pret pu fer sakrifis pu Zeova. Sa ti vremem enn gran pese!
12. Ki led nu gayne pu donn Zeova meyer ki nu kapav?
12 Donn Zeova meyer ki nu kapav, sa li enn fason pu montre ki nu kontan Li vremem. (Matye 22:37, 38) Kontrerman ar sa bann pret rebel lepok Malaki la, zordi lorganizasyon Zeova donn nu enn bon linstriksyon ki sorti dan Labib, ki ed nu pu donn Zeova enn gran lestim avek remersiman kan nu fer seki Li demande. An rapor avek sa, ena enn katriyem pwin ki nu kapav tire dan Malaki sapit 1.
Vre Ladorasyon Motive par Lamur, Pa par Gurmandiz
13. Ki bann pret ti pe fer, seki ti montre ki zot ti motive par gurmandiz?
13 Bann pret lepok Malaki ti egois, zot pa ti ena lamur, ek zot ti swaf larzan. Kuma eski nu konn sa? Malaki 1:10 dir: ‘“Kisannla usi parmi zot pu ferm bann laport? Ek zot pa pu alim mo lotel—pu nanyin. Mo pena okenn apresyasyon pu zot,’ Zeova bann larme finn dir, ‘ek mo pa apresye ditu ofrand ki zot fer.’” Wi, sa bann pret gurman la ti pe mem demann kas pu pli tipti servis ki zot ti fer dan tanp; zot ti rod gayn kas pu ferm bann laport ek pu alim dife lor lotel! Li pa drol ki Zeova pa ti apresye bann ofrand ki zot ti pe ofer Li.
14. Kifer eski nu kapav dir ki bann Temwin Zeova motive par lamur?
14 Gurmandiz ek latitid egois sa bann pret peser dan ansyin Zerizalem la kapav fer nu rapel byin ki, dapre Parol Bondye, bann dimunn gurman pa pu gayn Rwayom Bondye. (1 Korintyin 6:9, 10) Kan nu reflesi lor bann manyer azir egois sa bann pret la, sa bizin fer nu apresye plis travay predikasyon ki bann Temwin Zeova pe fer. Sa li enn travay volonter, ek zame nu pa pran kas pu okenn form nu minister. Non, “nu pa fer komers ar parol Bondye.” (2 Korintyin 2:17) Parey kuma Pol, sakenn parmi nu kapav dir sinserman: “San ki sa kut zot nanyin, nu finn kontan pu anons zot labonn nuvel lor Bondye.” (2 Korintyin 11:7) Remarke ki Pol ti “kontan pu anons labonn nuvel.” Sa amenn nu lor sinkyem pwin lor ki Malaki sapit 1 atir nu latansyon.
Servis Bondye Pa enn Servis Rutinn Ki Kuma enn Fardo
15, 16. (a) Ki latitid bann pret ti ena anver ofer bann sakrifis? (b) Kuma eski bann Temwin Zeova ofer zot sakrifis?
15 Pu sa bann pret infidel dan Zerizalem la, ofer bann sakrifis ti vinn enn servis fatigan ki zot ti pe fer zis par rutinn. Li ti enn fardo pu zot. Kuma finn ekrir dan Malaki 1:13, Bondye ti dir zot: “Zot finn dir, ‘Gete! Nu’nn plin!’ ek zot finn lev nene avek sa.” Sa bann pret la finn lev nene, uswa zot finn mepriz bann kitsoz sakre Bondye. Anu priye pu ki zame personelman nu pa vinn kuma zot. Plito, anu manifeste tuletan latitid ki 1 Zan 5:3 fer resorti: “Ala seki vedir lamur pu Bondye, ki nu met an pratik so bann komannman, purtan so bann komannman pa lur pu obeir.”
16 Anu pran plezir pu fer bann sakrifis spirityel pu Bondye, san ki zame nu konsider sa kuma enn fardo fatigan. Anu swiv sa bann parol profet Osea la: “Dir [Zeova] zot tu, ‘Pardonn nu erer, ek aksepte seki bon, ek an retur nu pu ofer bann zenn toro nu lalev.’” (Osea 14:2) Lexpresyon “bann zenn toro nu lalev” vedir isi bann sakrifis spirityel, bann parol ki nu dir pu donn laglwar Zeova ek so bann proze. Ebre 13:15 dir: “Atraver [Zezi Kris], anu tuletan donn Bondye enn sakrifis luanz, setadir, frwi nu lalev ki fer deklarasyon piblik pu so non.” Wi, nu kontan ki nu pa pe fer bann sakrifis spirityel zis par rutinn, me plito pu montre avek tu nu leker ki nu kontan Bondye! Sa amenn nu lor enn sizyem pwin ki nu kapav aprann dan Malaki sapit 1.
Sakenn Bizin Rann Kont Bondye
17, 18. (a) Kifer eski Zeova ti modi “sa kikenn ki fer malin la”? (b) Ki kitsoz bann ki ti fer malin pa ti pran an konsiderasyon?
17 Sak dimunn ki ti viv dan lepok Malaki ti bizin asim responsabilite so bann aksyon, ek nu’si parey. (Romin 14:12; Galat 6:5) Zisteman, Malaki 1:14 dir: “Modi kikenn ki fer malin, alor ki ena enn zanimo mal [san defo] dan so trupo, ek li pe fer enn promes ek pe donn enn zanimo inferyer an sakrifis pu Zeova.” Enn dimunn ki ti ena enn trupo pa ti ena zis enn zanimo—par egzanp zis enn muton—sibyin ki li pena okenn swa. Kan li ti swazir enn zanimo pu sakrifis, li pa ti neseser swazir enn zanimo aveg, bwate uswa malad. Si vremem li ti swazir enn zanimo ki ti ena defo kumsa, sa ti pu montre ki li ti mepriz bann sakrifis, enn dispozisyon ki Zeova ti’nn pran, parski enn dimunn ki ti ena enn trupo, ti byin kapav truv enn zanimo ki pa ti ena okenn defo!
18 Alor, Zeova ti ena rezon valab kan Li ti’nn modi sa kikenn ki fer malin la, ki ti ena enn zanimo mal san defo, me ki ti amenn—kitfwa mem li ti bizin trenn—enn zanimo aveg, bwate, uswa malad pu pret fer sakrifis. Purtan, pena mem enn ti indikasyon ki montre ki enn bann pret ti sit Lalwa pu montre lepep ki sakrifis bann zanimo malad pa ti akseptab. (Levitik 22:17-20) Bann dimunn ki ti rezone ti kone ki zot pa ti pu kapav anbet enn guverner avek enn ofrand kumsa, sinon so konsekans ti pu byin-byin grav. Me an realite zot ti pe gayn zafer ar Zeova, Suverin Liniver, enn Kikenn ki buku pli gran ki ninport ki guverner imin. Get kuma Malaki 1:14 dir sa: “‘Mo enn gran Lerwa,’ Zeova bann larme finn dir, ‘ek mo non pu fer bann nasyon gayn lakrint.”’
19. Ki nu pe atann avek inpasyans, ek ki nu bizin pe fer?
19 Antan ki bann serviter fidel Bondye, nu pe atann avek inpasyans zur kan tu dimunn pu ador Zeova, nu gran Lerwa. Sa lepok la, “later pu vremem ranpli avek konesans Zeova parey kuma delo kuver lamer.” (Izai 11:9) Anatandan, anu fer tu nu posib pu fer seki Bondye demande kan nu imit sa ekrivin psom ki ti dir: “Mo pu donn Li enn gran lestim avek remersiman.” (Psom 69:30) Pu nu fer sa, profesi Malaki ena bann lezot konsey pu nu profi. Donk, dan de prosin lartik ki pe vini, anu egzaminn avek buku latansyon bann lezot porsyon dan liv Malaki.
Eski U Rapel?
• Kifer eski nu bizin donn Zeova enn gran lestim?
• Kifer eski Zeova pa ti aksepte sakrifis bann pret dan lepok Malaki?
• Kuma eski nu ofer Zeova enn sakrifis luanz?
• Ki bizin motiv nu pu pratik vre ladorasyon?
[Zimaz lor paz 18]
Profesi Malaki ti viz nu lepok
[Zimaz lor paz 19]
Ezau pa ti apresye bann kitsoz sakre
[Zimaz lor paz 20]
Bann pret ek lepep ti ofer bann sakrifis ki pa ti akseptab
[Zimaz lor paz 21]
Dan lemond antye, bann Temwin Zeova ofer bann sakrifis luanz san pran okenn larzan