Azut Latasman pu Bondye ar U Landirans

“Azut ar zot lafwa . . . landirans, ar zot landirans, latasman pu Bondye.”—2 PYER 1:5, 6.

1, 2. (a) Dan ki domenn nu atann ki enn zanfan grandi? (b) Grandi lor plan spirityel, ki so linportans?

GRANDI. Sa li enn kitsoz inportan pu enn zanfan. Me nu pa atann ki li grandi zis lor plan fizik. Nu atann ki li devlope lor plan mantal ek emosyonel usi. Avek letan, sa zanfan la pu aret fer kuma enn tibaba ek li pu devlope ziska ki li vinn enn zom uswa enn fam adilt. Lapot Pol ti koz lor la kan li ti ekrir: “Kan mo ti enn tibaba, mo ti koz kuma enn tibaba, mo ti pans kuma enn tibaba, mo ti rezonn kuma enn tibaba, me asterla ki mo’nn vinn enn zom, mo finn aret azir kuma enn tibaba.”—1 Korintyin 13:11.

² Bann parol Pol fer nu konpran enn kitsoz inportan lor devlopman spirityel. Bann Kretyin bizin progrese. Fode pa ki zot res bann tibaba lor plan spirityel. Zot bizin vinn bann “adilt dan zot kapasite pu konpran.” (1 Korintyin 14:20) Zot bizin fer zefor ek sey “devlope net pu ariv mem nivo ki Kris.” Lerla zot pu nepli “bann tibaba ki balote par bann vag ek ki les zot sarye parsi-parla par ninport ki divan lanseynman.”—Efezyin 4:13, 14.

3, 4. (a) Ki nu bizin fer pu vinn bann adilt lor plan spirityel? (b) Ki bann kalite ki fer Bondye plezir nu bizin montre dan nu lavi, ek kifer sa bann kalite la inportan?

³ Kuma eski nu kapav vinn enn adilt lor plan spirityel? Dan bann kondisyon normal, li otomatik ki enn kikenn grandi lor plan fizik. Me lor plan spirityel li diferan. Pu nu grandi lor plan spirityel nu bizin fer bann zefor. Dabor, nu bizin gayn konesans egzak lor Parol Bondye, ek met an pratik seki nu pe aprann. (Ebre 5:14; 2 Pyer 1:3) Apre, sa konesans la pu ed nu pu montre bann kalite ki fer Bondye plezir. Kan enn kikenn grandi, diferan parti so lekor devlope an mem tan. Lor plan spirityel usi li parey. Plizir kalite ki fer Bondye plezir devlope an mem tan. Lapot Pyer ti ekrir: “Pu sa rezon la, kan zot pu fer bann gran zefor, azut enn bon kondwit ar zot lafwa, azut konesans ar zot bon kondwit, ar zot konesans, kapasite pu kontrol zotmem, ar kapasite pu kontrol zotmem, landirans, ek ar zot landirans, latasman pu Bondye, ar zot latasman pu Bondye, lafeksyon pu zot bann frer, ek ar zot lafeksyon pu zot bann frer, lamur.”—2 Pyer 1:5-7.

⁴ Sak kalite ki Pyer site, zot byin-byin inportan ek nu pa kapav bliye mem enn ladan. Li azute: “Si zot ena sa bann kitsoz la byin mem dan zot, sa pu anpes zot vinn swa pares uswa enn kikenn ki pa raport frwi dan konesans egzak nu Senyer Zezi Kris.” (2 Pyer 1:8) Anu gete kifer li inportan pu azut latasman pu Bondye ar nu landirans.

Nu Bizin Landirans

5. Kifer eski nu bizin landirans?

⁵ Pyer ek Pol, tulede, ti montre ki latasman pu Bondye ek landirans zot mars ansam. (1 Timote 6:11) Ena landirans pa vedir zis ena lafors pu tini dan bann sityasyon difisil ek gard sa desizyon la. Li vedir ena pasyans, kuraz, res ferm, pa perdi lespwar devan bann sityasyon difisil, bann obstak, bann tantasyon uswa bann persekisyon. Nu bizin atann pu gayn persekisyon parski nu bann dimunn ki pe viv ar “latasman avek Bondye ansam avek Kris Zezi.” (2 Timote 3:12) Si nu’le montre ki nu kontan Zeova ek si nu’le devlop bann kalite inportan pu nu kapav sape, nu bizin andire. (Romin 5:3-5; 2 Timote 4:7, 8; Zak 1:3, 4, 12) Si nu pena landirans, nu pa pu gayn lavi pu tuletan.—Romin 2:6, 7; Ebre 10:36.

6. Ki sa vedir andire ziska lafin?

⁶ Zezi ti dir: “Seki pu andire ziska lafin, limem ki pu sape.” (Matye 24:13) Donk, mem si nu finn byin kumanse, seki kont plis se nu landirans. Wi, nu bizin andire ziska lafin; swa lafin nu lavi, swa lafin sa move lemond la. Donk, dan ninport ki ka, nu bizin res fidel avek Bondye. Me selman, nu pa pu kapav fer Zeova plezir ek gayn lavi pu tuletan si nu pa azut latasman avek Bondye ar nu landirans. Me ki ete latasman avek Bondye?

Latasman Avek Bondye, Ki Sa Vedir?

7. Ki ete latasman avek Bondye, ek ki sa pus nu pu fer?

⁷ Latasman avek Bondye vedir ki nu ena enn gran respe pu Bondye Zeova Limem. Nu ador Li, nu servi Li ek nu montre nu fidel anver so reyn siprem iniversel. Pu nu pratik latasman avek Zeova, nu bizin gayn konesans egzak lor Li ek lor so bann fason fer. Nu bizin ena enn dezir pu byin konn Bondye personelman. Sa pu pus nu pu devlop enn latasman sinser pu Li. Nu pu montre sa par nu bann aksyon ek fason ki nu amenn nu lavi. Nu bizin ena dezir pu resanble Zeova otan ki posib, fer parey kuma Li ek manifeste so bann kalite ek so personalite. (Efezyin 5:1) Wi, latasman avek Bondye pus nu pu ena enn dezir pu fer Bondye plezir dan tu seki nu fer.—1 Korintyin 10:31.

8. Kuma eski latasman avek Bondye ek latasman zis pu Li tusel, zot mars ansam?

⁸ Pu nu pratik vre latasman avek Bondye, nu bizin ador zis Zeova tusel. Nu bizin pa les nanyin okip plas ki Li ena dan nu leker. Zeova ena drwa pu atann ki nu kontan Li ek servi zis Li tusel, parski Li nu Kreater. (Deteronom 4:24; Izai 42:8) Me malgre sa, Zeova pa fors nu pu ador Li. Li anvi ki nu servi li volonterman. Kan nu finn konn Li byin, nu devlop enn lamur pu Li. Sa lamur la pus nu pu fer bann sanzman dan nu lavi lor plan moral ek fizik. Li pus nu’si pu angaz nu net ar Li ek pu tini sa langazman la.

Devlop enn Relasyon Avek Bondye

9, 10. Kuma eski nu kapav vinn pros avek Bondye ek gard enn bon relasyon avek Li?

⁹ Apre ki nu’nn angaz nu avek Bondye ek nu’nn montre sa par nu batem, nu bizin tuzur kontiyn vinn pli pros ar Li. Donk, nu dezir pu fer sa ek pu servi Zeova fidelman, pus nu pu kontiyn etidye ek medit lor so Parol. Amezir ki nu les lespri Bondye inflyans nu panse ek nu leker, nu arive kontan Zeova plis. Nu relasyon avek Li res kitsoz ki pli inportan dan nu lavi. Nu konsider Zeova kuma nu pli bon Kamarad ek nu anvi fer Li plezir tuletan. (1 Zan 5:3) Sa plezir ki nu gayne dan sa bon relasyon ki nu ena avek Bondye la, li ogmante, ek nu byin rekonesan ki Li anseyn nu avek buku lamur ek ki Li koriz nu kan bizin.—Deteronom 8:5.

¹⁰ Si nu pa fer zefor pu vinn pli pros avek Zeova, nu kapav perdi sa relasyon ki ena buku valer la. Bondye pa antor si sa arive, parski “Li pa lwin ar sakenn parmi nu.”(Akt 17:27) Me nu byin kontan ki nu kapav apros ar Zeova fasilman. (1 Zan 5:14, 15) Byinsir, nu bizin fer buku zefor pu gayn enn relasyon personel avek Li. Me pu fer sa, Li donn nu led ki nu bizin. (Zak 4:8) Kuma eski nu kapav profit byin tu sa bann led ki Li donn nu la?

Res For lor Plan Spirityel

11. Sit sertin bann aksyon ki montre nu latasman avek Bondye.

¹¹ Nu lamur pu Bondye ki byin anrasine pu pus nu pu montre ki nu ena enn gran latasman avek Bondye. Se seki Pol dir: “Fer tu to posib pu paret devan Bondye kuma enn kikenn apruve, enn zuvriye ki pena nanyin pu onte, ki konn servi parol laverite kuma bizin.” (2 Timote 2:15) Pu fer sa, nu bizin gard enn bon labitid pu etidye Labib, asiste bann reynion, ek partisip dan predikasyon. Kan nu ‘priye sanses,’ sa usi pu ed nu pu res pros ar Zeova.’ (1 Tesalonisyin 5:17) Sa se bann aksyon inportan ki montre nu latasman avek Bondye. Si nu negliz enn sa bann kitsoz la, nu kapav tom malad lor plan spirityel ek nu kapav tom fasilman dan bann pyez Satan.—1 Pyer 5:8.

12. Kuma eski nu kapav reysi fer fas avek bann leprev?

¹² Si nu res for ek aktif lor plan spirityel, nu pu kapav fer fas ar buku sityasyon difisil ki nu gayne. Ena plizir kitsoz ki kapav teste nu dan enn fason byin dir. Par egzanp, li kapav arive ki bann manb nu fami, bann paran, uswa bann vwazin, pa interese ar seki nu pe fer, ek zot persekit nu. Sa li kapav byin-byin dir pu nu. Dan travay uswa dan lekol, lezot kapav met presyon lor nu san ki nu rann nu kont. Zot kapav pus nu pu al kont bann prinsip Kretyin. Dekurazman, maladi ek depresyon kapav fer nu vinn feb fizikman. Lerla li pu pli difisil pu fer fas ar bann difikilte ki teste nu lafwa. Me, nu kapav reysi si nu kontiyn ena ‘bann aksyon ki montre enn kondwit sin ek nu latasman avek Bondye, ek nu atann ek gard byin dan lespri prezans zur Zeova.’ (2 Pyer 3:11, 12) Kan nu fer sa nu pu gard nu lazwa parski nu pu sir ki Bondye pu beni nu.—Proverb 10:22.

13. Ki nu bizin fer si nu’le pratik latasman avek Bondye?

¹³ Mem si Satan atak bann ki pratik latasman avek Bondye, nu bizin pa per. Kifer? Parski “Zeova kone kuma pu tir bann dimunn ki ena latasman avek Li dan problem.” (2 Pyer 2:9) Pu nu fer fas ar sa bann difikilte la ek konn sa delivrans la, nu bizin “rezet bann kitsoz ki Bondye pa kontan ek bann dezir sa lemond la ek viv avek bon zizman ek lazistis ek latasman avek Bondye dan sa lemond la.” (Tit 2:12) Nu, bann Kretyin, nu bizin veye ki okenn febles, parey kuma bann move dezir ek bann laktivite, pa pran plas nu latasman pu Bondye dusma-dusma ek detrir li. Anu get detrwa sa bann kitsoz ki menas nu la.

Fer Atansyon Bann Kitsoz Ki Menas Nu Latasman Avek Bondye

14. Si nu pe santi nu atire par kas, ki nu bizin rapel?

¹⁴ Galup deryer kas, sa li enn pyez pu buku. Nu kapav anbet numem kan nu “konsider latasman pu Bondye kuma enn mwayin pu gayn kitsoz.” Lerla, nu krwar ki nu kapav profit konfyans nu bann frer ek ser. (1 Timote 6:5) Nu kapav arive mal konpran ek panse ki nu kapav fors enn Kretyin ki pli ris ki nu, pu donn nu enn lorn, mem si petet nu kone ki nu pa pu kapav ranburs li. (Psom 37:21) Se pa kan nu galup deryer larzan ki nu pu gayn “promes pu lavi asterla ek lavi dan lavenir.” Me se kan nu ena latasman avek Bondye. (1 Timote 4:8) Pwiski ‘nu pa finn amenn nanyin dan lemond, ek nu pa kapav amenn kitsoz ar nu,’ nu bizin plis deside ankor pu rod “latasman avek Bondye, ek nu satisfer nu ar seki nu ena.” Ek ‘kontant nu ar manze ek linz’ ki nu ena.—1 Timote 6:6-11.

15. Si nu truve ki galup deryer plezir pe rod tuf nu latasman avek Bondye, ki nu kapav fer?

¹⁵ Galup deryer plezir kapav tuf nu latasman pu Bondye. Eski nu bizin fer bann sanzman rapid dan sa domenn la? Li vre ki, kan nu fer legzersis uswa kan nu amize, nu gayn byinfe. Me sa bann rekonpans la zot byin tigit konpare avek lavi pu tuletan. (1 Zan 2:25) Zordi ena buku “ki kontan plezir plis ki Bondye, zot ena enn form latasman ar Bondye, me zot trayir so puvwar.” Nu bizin evit sa bann kalite dimunn la. (2 Timote 3:4, 5) Bann ki konsider latasman avek Bondye kuma kitsoz ki byin inportan, pe “ramas enn trezor pu lavenir dan enn plas sir, pu ki zot kapav gayn vre lavi.”—1 Timote 6:19.

16. Sit bann move dezir ki anpes sertin pu viv dapre bann kitsoz drwat ki Bondye demann nu pu fer, ek kuma nu kapav dominn sa bann dezir la?

¹⁶ Lalkol, ladrog, limoralite, ek bann move dezir kapav detrir nu latasman avek Bondye. Si nu sede devan sa bann kitsoz la, nu pa pu kapav viv dapre bann kitsoz drwat ki Bondye demann nu. (1 Korintyin 6:9,10; 2 Korintyin 7:1) Mem Pol ti bizin amenn enn long lalit kont so lekor inparfe. (Romin 7:21-25) Nu bizin pran bann aksyon strik pu eliminn sa bann move dezir la. Enn rezon kifer nu bizin fer sa, se parski nu anvi res prop lor plan moral. Pol dir nu: “Rann insansib bann manb zot lekor ki lor later, konsernan bann vis sexyel, malpropte, lapeti sexyel, bann dezir ki fer ditor ek dezir pu gayn plis, tusala zot enn form lidolatri.” (Kolosyin 3:5) Pu nu fer sa ek eliminn sa bann move dezir la, nu bizin ena buku volonte. Nu pu kapav rezet sa bann move dezir la si nu priye Bondye avek tu nu leker pu gayn so led. Sa pu ed nu’si pu rod lazistis ek latasman avek Bondye dan sa move lemond la.

17. Kuma nu bizin konsider disiplinn?

¹⁷ Dekurazman kapav afebli nu landirans ek ena enn move lefe lor nu latasman avek Bondye. Buku serviter Zeova finn gayn dekurazman. (Nom 11:11-15; Ezra 4:4; Yona 4:3) Me, dekurazman kapav ena enn pli move lefe lor nu, si nu gard enn kikenn dan nu leker. Kitfwa parski dimunn la finn ofans nu uswa finn disiplinn nu dan enn fason sever. Me kan nu gayn koreksyon ek disiplinn, sa montre ki Bondye byin kontan nu ek ki Li ena enn gran lintere pu nu. (Ebre 12:5-7, 10, 11) Nu bizin konsider disiplinn kuma enn mwayin pu form nu dan lazistis ek pa kuma enn sinp pinisyon. Si nu ena limilite, nu pu rekonet valer sa konsey la ek nu pu aksepte li, ek nu pu realize ki “bann koreksyon zot semin lavi.” (Proverb 6:23) Sa kapav ed nu pu fer bann progre spirityel pu kontiyn rod latasman avek Bondye.

18. Si nu finn ofans enn kikenn, uswa si enn kikenn finn ofans nu, ki responsabilite nu ena?

¹⁸ Bann malantandi ek bann ofans personel kapav vinn enn defi pu nu latasman avek Bondye. Zot kapav fer nu gayn traka uswa pus sertin pu fer enn kitsoz ki pa bon ditu setadir res lwin ar zot bann frer ek ser spirityel. (Proverb 18:1) Me li bon nu rapel ki si nu kontiyn ena kitsoz kont lezot uswa gard zot dan nu leker, sa kapav afekte nu relasyon avek Zeova. (Levitik 19:18) Dayer, “si enn kikenn pa kontan so frer ki li truve, li pa kapav kontan Bondye ki li pa’nn truve.” (1 Zan 4:20) Dan so Sermon lor Montayn, Zezi ti montre linportans pu fer bann pa deswit pu rezud bann problem personel. Li ti dir bann ki ti pe ekut li: ‘Donk, si to amenn to ofrand devan Zeova, ek ki la to rapel ki to frer ena kitsoz kont twa, les to ofrand la, ek ale, fer lape avek to frer avan, ek apre, kan to returne, donn to ofrand.’ (Matye 5:23, 24) Enn sinp parol kuma “exkiz mwa,” kapav ed enn kikenn pu bliye bann parol uswa bann aksyon ki’nn bles li. Si nu demann pardon ek rekonet ki nu’nn fer enn erer, sa kapav retabli bann bon relasyon. Zezi ti donn usi lezot konsey pu regle bann difikilte. (Matye 18:15-17) Wi vremem, nu pu byin kontan si nu reysi regle bann problem, grasa bann zefor!—Romin 12:18; Efezyin 4:26, 27.

Swiv Legzanp Zezi

19. Kifer li inportan imit legzanp Zezi?

¹⁹ Li vre ki bann leprev pu fatig nu, me zot bizin pa anpes nu pu kontiyn nu lekurs pu lavi pu tuletan. Rapel ki Zeova kapav tir nu dan leprev. Amezir ki nu “tir tu pwa” ki lor nu ek nu “galup avek landirans sa lekurs ki devan nu la,” anu “fixe nu lizye lor Zezi, Azan prinsipal nu lafwa ek sa Kikenn ki fer nu lafwa vinn parfe la.” (Ebre 12:1-3) Nu pu kapav devlop latasman avek Bondye ek manifeste li plis, kan nu egzaminn avek buku latansyon legzanp Zezi ek nu sey imit li an parol ek an aksyon.

20. Ki rekonpans nu pu gayne si nu rod landirans ek latasman avek Bondye?

²⁰ Nu bizin landirans ek latasman avek Bondye tulede, pu nu kapav sape. Kan nu manifeste sa bann kalite ki ena buku valer la, nu kapav kontiyn fidelman nu servis sakre pu Bondye. Mem dan bann leprev nu pu kontan, amezir ki nu resanti lafeksyon ek benediksyon Zeova, parski nu finn andire ek nu pe pratik latasman avek Bondye. (Zak 5:11) Anplis, Zezi limem donn nu sa lasirans la: “Par zot landirans, zot pu sap zot lavi.”—Lik 21:19.

Kuma U Pu Reponn?

• Kifer landirans inportan?

• Ki ete latasman avek Bondye, ek kuma li manifeste?

• Kuma eski nu kapav vinn pros ar Bondye ek gard enn bon relasyon avek li?

• Sit sertin kitsoz ki menas nu latasman avek Bondye, ek kuma nu kapav evit zot?

[Zimaz lor paz 8]

Latasman avek Bondye li manifeste dan buku fason

[Zimaz lor paz 9]

Fer atansyon bann kitsoz ki menas u latasman avek Bondye