Watchtower BIBLIOTEK LOR INTERNET
Watchtower
BIBLIOTEK LOR INTERNET
Kreol Morisien
  • LABIB
  • PIBLIKASION
  • RENION
  • w02 1/9 p. 11-16
  • “Kontiyne Swiv Mwa”

Pena video ki disponib pou seki ou finn swazir.

Sori, enn erer inn anpes sa video-la zwe.

  • “Kontiyne Swiv Mwa”
  • La Tour de Garde pé annonce Royaume Jéhovah—2002
  • Soutit
  • Lor Mem Size
  • Devlop Lamur pu Laverite Ki Nu Aprann
  • Nu Montre Ki Nu Kontan Laverite Ki Nu Anseyne
  • Lamur pu Bann Dimunn Ki Nu Anseyne
  • Pu Montre Lamur, Li Byin Inportan Ki Nu Abes Numem
  • Imite Jésus—Enseigne avek amour
    La Tour de Garde pé annonce Royaume Jéhovah—2009
  • Fixe To Leker lor Bann Trezor Spiritiel
    Latour Degard Pe Anons Rwayom Zeova (Edision Letid)—2017
  • “Mo Finn Donn Zot Legzanp”
    La Tour de Garde pé annonce Royaume Jéhovah—2002
  • Reste dan l’amour Bondié
    Ki la Bible enseigné vrai-mem?
Rod Plis
La Tour de Garde pé annonce Royaume Jéhovah—2002
w02 1/9 p. 11-16

“Kontiyne Swiv Mwa”

“Pu samem ki finn apel zot, parski Kris usi finn sufer pu zot, li finn les enn legzanp pu ki zot swiv byin so bann tras.”—1 PYER 2:21.

1, 2. Kifer eski nu kapav swiv legzanp parfe ki Zezi finn lese?

ZEZI KRIS, limem pli gran Anseynan ki zame finn egziste. Anplis, li ti parfe ek zame li’nn fer pese pandan tu so lavi lor later. (1 Pyer 2:22) Me eski sa vedir ki nu, parski nu bann dimunn ki fer pese, zame nu pa pu kapav imit li? Non.

2 Kuma nu finn truve dan lartik avan, lanseynman Zezi ti baze lor lamur. Ek lamur li enn kalite ki nu tu nu kapav devlope. Dayer, Parol Bondye suvan ankuraz nu pu ogmant lamur ki nu ena pu lezot. (Filipyin 1:9; Kolosyin 3:14) Zame Zeova demann nu fer bann kitsoz ki nu pa kapav fer. Dayer, “Bondye Li lamur,” ek Li finn kre nu dan so resanblans. Donk, nu kapav dir ki Li finn kre nu dan enn fason ki nu’si nu kapav kontan lezot. (1 Zan 4:8; Zenez 1:27) Donk, kan nu lir bann parol ki Pyer finn dir, ki truv dan tex lor ki nu lartik baze, avek konfyans nu kapav dir ki nu kapav fer sa. Wi, nu kapav swiv byin bann tras Zezi. Nu kapav mem obeir lord ki Zezi limem ti done: “Kontiyne swiv mwa.” (Lik 9:23) Zezi ti montre ki li ti kontan laverite ki li ti anseyne ek bann dimunn ki li ti anseyne. Anu gete kuma nu’si nu kapav fer parey kuma li.

Devlop Lamur pu Laverite Ki Nu Aprann

3. Kifer eski sertin truve ki li difisil pu etidye, me ki lankurazman nu truve dan Proverb 2:1-5?

3 Pu nu kontan laverite ki nu anseyn lezot, fode numem dabor, nu kontan pu aprann sa laverite la. Me, dan sa lemond kot nu pe viv la, li pa fasil pu devlop enn lamur pu aprann. Buku dimunn pa kontan pu aprann parski zot pa finn gayn lokazyon pu fer tu zot klas lekol. Ena lezot ki pa finn devlop bann bon labitid pu aprann kan zot ti ankor zenn. Me malgre sa, li byin-byin inportan ki nu aprann laverite ki Zeova anseyn nu. Proverb 2:1-5 dir: ‘Mo garson, si to aksepte seki mo pe dir ek to gard byin mo bann komannman, ek ki to ekut byin lasazes, ek ki to prepar to leker pu konn ziz byin bann kitsoz, si anplis to apel lintelizans ek to kriye pu kone kuma pu ziz byin bann kitsoz, si to kontiyn rod sa kuma larzan, ek si to kontiyn rod sa kuma bann trezor ki finn kasyet, lerla to pu konpran ki ete lakrint Zeova, ek to pu truv konesans Bondye.’

4. Ki sa vedir “prepar nu leker pu konn ziz byin bann kitsoz,” ek ki latitid ki kapav ed nu pu fer sa?

4 Remarke ki dan verse 1 ziska 4, plizir fwa nu gayn lankurazman pu fer zefor pu “kontiyn rod” sa bann parol la, ek pa zis pu “aksepte”ek “gard zot byin.” Me ki kitsoz ki kapav ed nu pu fer tusala? Get sa fraz la: “Prepar to leker pu konn ziz byin bann kitsoz.” Enn liv dir ki dan sa verse la, pa pe demann nu pu zis pran kont sa bann parol la. Me pe demann nu pu ena enn bon latitid, setadir enn gran dezir pu aksepte sa bann lanseynman la. Ek ki kitsoz pu ed nu fer sa? Se fason ki nu konsider sa bann kitsoz la. Nu bizin konsider “konesans Bondye” parey kuma “lor” ek “bann trezor ki finn kasyet.”

5, 6. (a) Ki kapav arive avek letan, ek ki u kapav fer pu anpes sa arive?(b) Kifer eski nu bizin kontiyn ogmant nu konesans ki nu finn gayne dan Labib?

5 Li pa difisil pu gayn sa kalite latitid la. Par egzanp, kan u finn gayn “konesans Bondye” sirman u finn aprann usi ki lintansyon Zeova. U finn aprann ki Li anvi ki tu bann dimunn ki Li kontan viv pu tuletan dan enn Paradi lor later. (Psom 37:28, 29) Pena dut ki premye fwa ki u ti tann sa, u ti konsider sa laverite la kuma enn trezor. Li ti enn ranseynman ki ti fer u gayn enn gran lespwar ek enn gran lazwa. Me asterla, ki u santiman? Eski avek letan sa santiman ki u ti ena pu sa trezor la finn diminye? Si wi, sey sa de kitsoz la. Dabor, pu u regayn sa santiman la, rerapel pu ki rezon u estim sak lanseynman Zeova, mem bann ki u’nn aprann depi byin lontan.

6 Dezyem: kontiyn ogmant sa trezor ki u ena la. Par egzanp, si zame letan u pe fuye, u al truv enn pyer ki ena buku valer, ki u pu fer? Eski u pu zis met li dan u pos, ek u pu ale, leker kontan? Uswa u pu kontiyn fuye pu rode si ena ankor? Parol Bondye ranpli ar bann lanseynman ki parey kuma bann pyer. Donk, plis nu fuye plis nu pu truve. (Romin 11:33) Kan u pe aprann enn nuvo kitsoz, poz u sa bann kestyon la: ‘Kifer eski sa lanseynman la ena buku valer? Eski li ed mwa pu konpran plis kuma Zeova ete, ek konpran plis so bann lintansyon? Eski li donn mwa bann konsey pratik ki kapav ed mwa pu swiv bann tras Zezi?’ Si u medit lor sa bann kalite kestyon la, sa pu ed u pu ogmant u lamur pu laverite ki Zeova finn anseyn u.

Nu Montre Ki Nu Kontan Laverite Ki Nu Anseyne

7, 8. Kuma eski nu kapav montre lezot ki nu kontan laverite ki nu finn aprann dan Labib? Donn enn legzanp.

7 Kan nu pe anseyne, kuma eski nu kapav montre ki nu kontan laverite ki nu’nn aprann dan Parol Bondye? Se kan nu swiv legzanp Zezi, setadir nu servi Labib kan nu pe prese ek kan nu pe anseyne. Pa tro lontan, tu bann serviter Zeova dan lemond antye ti’nn ankuraze pu servi plis Labib kan zot prese. Ek an mem tan ki u pe fer sa, rod bann mwayin pu fer dimunn la kone ki u’si u ena enn gran lestim pu seki u pe montre li dan Labib.—Matye 13:52.

8 Par egzanp, get seki ti arive zis apre latak bann teroris dan lavil New York, lane dernyer. Enn ser ti pe lir Psom 46:1, 11, ar tu bann dimunn ki li ti zwenn dan predikasyon. Dabor li ti demann bann dimunn la kuma zot ti pe arive fer fas ar sa maler ki ti fek arive la. Li ti ekut zot byin, ek li ti remersi zot. Apre sa li dir: “Eski mo kapav montre u enn pasaz dan Labib ki’nn byin sulaz mwa dan sa moman difisil la?” Laplipar finn aksepte, ek li finn gayn bann bon konversasyon. Kan li ti pe koz avek bann zenn, sa ser la ti dir: “Sa fer 50 an depi ki mo anseyn Labib. Me mo asir u, ninport ki problem ki mo’nn gayne, mo’nn truv so solisyon dan Labib.” Kan nu koz avek tu nu leker, nu montre bann dimunn ki nu byin estim ek nu kontan seki nu finn aprann dan Parol Bondye.—Psom 119:97, 105.

9, 10. Kan nu bizin reponn bann kestyon lor nu krwayans, kifer eski li inportan ki nu servi Labib?

9 Kan bann dimunn poz nu bann kestyon lor nu krwayans, sa se bann lokazyon ki nu gayne pu montre ki nu kontan Parol Bondye. Nu kapav swiv legzanp Zezi, setadir nu pa zis baz nu bann repons lor nu prop panse, me nu servi Labib pu reponn. Me, eski u per atansyon kikenn poz u enn kestyon ki u pa kapav reponn? Anu get de kitsoz byin pratik ki kapav ed u?

10 Fer tu u posib pu prepar u. Lapot Pyer finn ekrir: ‘Rekonet Kris kuma zot Senyer dan zot leker ek donn li laglwar, tuzur pre pu defann zot lafwa devan bann dimunn ki demann zot enn explikasyon lor zot lesperans, me fer li avek duser ek avek enn gran respe.” (1 Pyer 3:15) Eski u pre pu defann u bann krwayans? Par egzanp, si enn kikenn anvi kone kifer u pa partisip dan bann kutim ki pa biblik, ki u pu dir li? Eski u pu zis dir li: “Mo relizyon defann mwa fer sa”? Si nu reponn kumsa, nu kapav donn linpresyon ki se lezot ki pran desizyon dan nu plas, ek ki nu fer parti dan enn sekt. Kitfwa, li pli bon nu dir: “Labib, Parol Bondye, kondann sa,” uswa “Sa pu depler mo Bondye.” Apre, nu kapav explik li kifer nu pa fer sa.—Romin 12:1.

11. Ki liv ki kapav ed nu pu prepar nu byin pu reponn bann kestyon lor Parol Bondye?

11 Si u ena linpresyon ki u pa byin prepare, ki u kapav fer? Kifer eski u pa pran inpe letan pu etidye liv Comment raisonner à partir des Écritures, si u konpran Franse?a Sinon u kapav demann enn kikenn pu explik u. Swazir detrwa size lor ki bann dimunn suvan poz bann kestyon, ek sey rapel detrwa tex Labib ki koz lor la. Gard u liv ek u Labib tuletan avek u. Pa ezite pu servi zot. U kapav dir ki u ena enn liv ki u ti pu kontan servi pu montre bann repons ki Labib done pu bann kestyon.

12. Ki nu kapav dir si nu pa kone ki pu reponn kan enn kikenn poz nu enn kestyon lor Labib?

12 Pa trakase pu nanyin. Pena okenn dimunn lor later ki kapav reponn tu bann kestyon. Donk, kan enn kikenn poz nu enn kestyon ki nu pa kapav reponn, nu kapav dir li: “Mo remersi u pu sa kestyon byin interesan ki u finn poze la. Mo pu dir u fran, mo pa konn so repons. Me, mo sir ki Labib koz lor la. Mo ti pu byin kontan fer detrwa resers dan Labib, apre sa mo pu returne pu donn u so repons.” Si nu koz fran, ek nu aksepte ki nu pa konn repons la, sa kapav donn nu lokazyon pu gayn bann lezot konversasyon.—Proverb 11:2.

Lamur pu Bann Dimunn Ki Nu Anseyne

13. Kifer eski nu bizin gard enn bon latitid anver bann dimunn ar ki nu prese?

13 Zezi ti montre ki li kontan bann dimunn ki li ti anseyne. Me kuma eski nu kapav fer parey kuma li? Fode pa ki nu vinn enn kikenn dir, ki pena okenn santiman pu bann dimunn ki otur nu. “Lager gran zur Bondye Tu-Pwisan” pe koste ankor plis, ek buku dimunn pu detrir. (Revelasyon 16:14; Zeremi 25:33) Nu pa kone kisannla ki pu sape, ek kisannla ki pu mor. Sa zizman la pu arive dan lavenir. Ek Zeova finn swazir Zezi Kris pu fer sa zizman la. Me tank pankor fer sa zizman la, nu konsider sak dimunn kuma enn kikenn ki kapav vinn enn serviter Zeova.—Matye 19:24-26; 25:31-33; Akt 17:31.

14. (a) Ki nu bizin demann numem pu gete si nu konpran bann dimunn uswa non?(b) Kuma eski nu kapav montre ki nu konpran ek ki nu interese ar lezot?

14 Donk, parey kuma Zezi, nu sey konpran bann dimunn. Nu kapav demann numem: ‘Relizyon, politik, komers tusala finn anbet buku dimunn, me eski mo sagrin sa bann dimunn la? Kan zot pa interes ar mesaz ki mo pe anons zot, eski mo sey konpran zot? Eski mo rekonet ki momem, uswa lezot ki zordi pe servi Zeova avek tu zot leker, ti pans parey kuma zot? Eski mo finn adapte mo fason prese dapre seki sa bann dimunn la bizin? Uswa eski mo dir ki pena okenn lespwar pu sa bann dimunn la?’ (Revelasyon 12:9) Bann dimunn interese plis ar nu mesaz kan zot truve ki nu konpran zot. (1 Pyer 3:8) Kan nu sey konpran bann dimunn, sa pus nu pran plis kont bann dimunn ki nu zwenn dan predikasyon. Nu kapav pran bann not lor bann kestyon ki zot finn poze, ek bann kitsoz ki trakas zot. Kan nu returne, nu kapav montre ki nu’nn pans lor bann kitsoz ki zot ti dir dernye fwa. Nu kapav fer zot kone usi, ki si zot bizin nu led tutswit, nu kapav ed zot, si li dan nu posibilite.

15. Kifer eski nu bizin pran kont bann bon kalite ki bann dimunn ena?

15 Parey kuma Zezi, nu’si nu get bann bon kalite ki bann dimunn ena. Nu zwenn enn mama ki kitfwa pe fer zefor pu elve so bann zanfan tusel. Uswa, enn papa ki pe fer zefor pu donn so fami tu seki li bizin pu viv. Uswa enn dimunn aze ki interese ar Labib. Kan nu zwenn bann dimunn, eski nu pran kont sa bann kalite ki zot ena la? Eski nu felisit zot pu sa? Si nu fer sa, se kumadir nu pe montre zot ki nu’si nu parey kuma zot. Kumsa nu kapav gayn lokazyon pu koz lor Rwayom avek zot.—Akt 26:2, 3.

Pu Montre Lamur, Li Byin Inportan Ki Nu Abes Numem

16. Kifer eski li inportan ki nu koz avek duser ek enn gran respe kan nu pe prese?

16 Lamur pu bann dimunn ki nu pe anseyne pu pus nu pu pran kont sa lavertisman byin inportan ki Labib done la: ‘Konesans fer nu vinn vantar, me lamur fer nu vinn pli for.’ (1 Korintyin 8:1) Zezi ti ena enn gran konesans, purtan, zame li ti montre li vantar. Donk, kan nu pe partaz nu bann krwayans, nu bizin evit koz avek lotorite, avek enn ler vantar. Seki nu anvi se tus leker bann dimunn ek atir zot ver laverite ki numem nu byin kontan. (Kolosyin 4:6) Rapel ki Pyer ti donn bann Kretyin konsey pu prepar zot pu defann zot lafwa. Me, li ti usi azute ki zot bizin fer sa “avek duser ek avek enn gran respe.” (1 Pyer 3:15) Si nu koz avek duser ek enn gran respe, li pu pli fasil pu nu atir bann dimunn ver Bondye ki nu servi.

17, 18. (a) Ki nu bizin fer kan bann dimunn dir ki nu pa kalifye pu prese? (b) Kifer eski li pa neseser ki bann etidyan Labib aprann bann langaz kuma Ebre uswa Grek?

17 Pa neseser nu inpresyonn bann dimunn avek nu konesans uswa nu ledikasyon. Li kapav arive ki sertin dimunn dan nu teritwar refiz pu ekut nu parski nu pena bann diplom, uswa nu pa finn al liniversite. Me fode pa ki sa latitid la dekuraz nu. Zezi pa ti pran kont kan bann dimunn ti dir ki li pa ti al dan bann gran-gran lekol sa lepok la. Li pa finn sey usi inpresyonn bann dimunn avek so gran konesans.—Zan 7:15.

18 Pu bann Kretyin, kan nu montre ki nu kontan bann dimunn ek nu konn abes nu, sa li pli inportan ki enn gran ledikasyon. Se Zeova, nu Pli Gran Anseynan, ki kalifye nu. (2 Korintyin 3:5, 6) Pa neseser ki nu aprann bann langaz kuma Ebre uswa Grek pu nu vinn bann bon anseynan Parol Bondye, mem si bann pret dir ki li inportan. Ninport kisannla kapav konpran laverite ki ena dan Labib, parski grasa lespri sin, Zeova finn fer ekrir sa dan enn fason byin kler. Mem si finn tradir sa bann lanseynman la dan plizir santenn langaz, zot pa finn sanze. Donk enn konesans lor sa bann vye langaz la, pa inportan, mem si defwa li kapav servi nu. Anplis, enn kikenn ki fyer parski li konn sa bann langaz la, kapav perdi enn kalite ki bann vre Kretyin bizin ena, setadir, vinn enn kikenn ki les li anseyne fasilman.—1 Timote 6:4.

19. Kuma eski, dan enn sans, nu predikasyon li enn servis?

19 Donk, pena okenn dut ki pu enn kikenn partisip dan predikasyon li bizin konn abes li. Byin suvan nu bizin fer fas ar lopozisyon, bann dimunn ki pa interese, mem defwa persekisyon. (Zan 15:20) Me kan nu fer nu predikasyon byin kuma bizin, nu pe fer enn servis ki byin-byin inportan. Si nu kontiyn servi lezot dan sa travay la, nu pe imit lamur ki Zezi ti ena pu bann dimunn. Anu pran enn legzanp: Mem si nu bizin pres ar mil dimunn ki pa interese uswa ki opoze pu nu reysi zwenn enn dimunn sinser, eski sa pa vo lapenn? Donk kan nu kontiyn fer sa travay la, ek nu pa bes lebra, nu pe travay pu bann dimunn sinser ki nu pankor zwenn. Pena dut ki Zeova ek Zezi pu fer tu pu ki nu truv enn kantite lezot dimunn kumsa pu ed zot.—Agai 2:7.

20. Kuma eski nu kapav anseyne par nu legzanp?

20 Enn lot mwayin pu montre ki nu pre pu servi lezot, se kan nu donn legzanp. Par egzanp, nu anvi anseyn bann dimunn ki pli bon kitsoz ki zot kapav fer dan zot lavi, ki pu fer zot gayn buku boner, se servi Zeova, ‘Bondye ki ere.’ (1 Timote 1:11) Kan zot get nu kondwit, ek fason nu azir avek nu bann vwazin, nu bann kamarad lekol, uswa nu bann kamarad travay, eski zot kapav truve ki nu kontan ek ki nu ena enn satisfaksyon dan nu lavi? Li parey pu nu bann letid. Nu anseyn zot ki kongregasyon li enn landrwa kot ena lamur, konpare ar sa lemond kriyel la. Me eski nu bann letid kapav truve ki nu kontan tu dimunn dan kongregasyon? Eski zot kapav truve ki nu fer zefor pu gard lape avek lezot?—1 Pyer 4:8.

21, 22. (a) Kan nu egzaminn nu sityasyon, ki bann kitsoz nu truve nu kapav fer? (b) Ki nu pu egzamine dan sa bann prosin lartik la?

21 Kan nu pre pu servi lezot, defwa sa kapav ed nu pu egzaminn nu prop sityasyon. Buku proklamater finn truve ki zot kapav fer plis dan predikasyon, apre ki zot finn egzaminn zot sityasyon byin. Kitfwa zot kapav fer servis pyonye uswa al dan enn teritwar kot pa prese suvan. Lezot kapav deside pu aprann koz enn lot lang pu kapav pres avek bann dimunn etranze ki’nn vinn res dan zot teritwar. Si u ena tu sa bann posibilite la, reflesi lor la ek priye. Kan nu servi Zeova, sa fer nu gayn buku lazwa, satisfaksyon, ek lape.—Eklezyast 5:12.

22 Anu fer tu seki nu kapav pu imit legzanp Zezi Kris, kan nu kontiyn ogmant nu lamur pu laverite ek pu bann dimunn ki nu pe anseyne. Kan nu devlop lamur ek nu montre sa lamur la, sa pu ed nu pu poz enn bon baz pu vinn bann bon anseynan parey kuma Kris. Me kuma eski nu kapav fer sa? Bann prosin lartik pu egzaminn detrwa metod ki Zezi ti servi pu anseyne.

[Not anba paz]

a Pibliye par bann Temwin Zeova.

Kuma Eski U Pu Reponn?

• Kifer eski nu sir ki nu kapav imit legzanp Zezi, ek vinn enn bon anseynan?

• Kuma eski nu kapav montre ki nu kontan laverite ki nu finn aprann dan Labib?

• Kifer eski li inportan ki nu konn abes nu amezir ki nu konesans ogmante?

• Kuma eski nu kapav montre ki nu kontan bann dimunn ki nu anseyne?

[Zimaz lor paz 13]

Fer tu u posib pu prepar u

[Zimaz lor paz 14]

Si u konsider “konesans Bondye” kuma enn trezor, u pu kapav servi Labib byin

[Caption on page 1]

Nu montre ki nu kontan bann dimunn kan nu pres avek zot

    Piblikasion Kreol Morisien (2000-2025)
    Dekoneksion
    Koneksion
    • Kreol Morisien
    • Partaze
    • Preferans
    • Copyright © 2025 Watch Tower Bible and Tract Society of Pennsylvania
    • Linformasion Legal
    • Prinsip Konfidansialite
    • Reglaz Konfidansialite
    • JW.ORG
    • Koneksion
    Partaze