Kestyon Bann Lekter

Eski li pu kumadir pe asosye avek enn lot relizyon kan nu aste enn batiman ar zot pu fer li vinn enn Lasal DiRwayom?

An zeneral, bann Temwin Zeova evit sa kalite tranzaksyon la avek bann lezot relizyon. Me mem sa, nu pa neseserman pe asosye avek zot kan nu pe fer sa bann tranzaksyon la. Nu kapav konsider sa kuma enn biznes ki pe fer enn fwa letan. Sa kongregasyon la pa pe korper avek enn lot relizyon pu konstrir enn batiman ki zot tulede pu servi.

Ki kitsoz Zeova konsider kuma enn asosyasyon avek bann lezot relizyon? Get seki lapot Pol dir: “Pa asosye zot avek bann ki pa krwayan. Parski ki kitsoz ena an komin ant lazistis ek mesanste? Uswa ki linite ena ant lalimyer ek marenwar? Anplis, ki larmoni ena ant Kris ek Belyal? Uswa ki par enn fidel ena avek enn kikenn pa krwayan? Ki tanp Bondye ena an komin avek bann zidol? . . . ‘Donk, sorti parmi zot, ek res separe ar zot,’ ala seki Zeova dir, ‘ek pa tus okenn kitsoz sal; ek mo pu akeyir zot.’” (2 Korintyin 6:14-17) Ki Pol ti pe rod dir par bann lexpresyon “kitsoz an komin” ek “linite”?

Li kler ki parmi sa bann kitsoz an komin ki Pol mansyone la, ena ladorasyon ek bann aktivite spirityel avek bann ki ador zidol ek ki pa krwayan. Li ti averti bann Korintyin pu pa ‘asiz lor mem latab ki bann demon.’ (1 Korintyin 10:20, 21) Donk, nu asosye avek enn lot relizyon, kan nu partisip dan mem adorasyon uswa ena bann kitsoz spirityel an komin avek bann lezot lorganizasyon relizye. (Egzod 20:5; 23:13; 34:12) Kan nu aste enn batiman ki enn lot relizyon finn servi, so bi prinsipal se pu zis gayn enn batiman pu nu fer nu Lasal DiRwayom. Avan ki nu servi li kuma enn Lasal DiRwayom, bizin tir tu bann lobze ki ena enn rapor avek fos ladorasyon. Apre sa, nu vwe lasal la ar Zeova pu ki nu servi li zis pu so ladorasyon. Pena nanyin an komin ni okenn linite ant vre ladorasyon ek fos ladorasyon.

Konversasyon ek kontak ki ena pu aste enn batiman bizin limite ek zot bizin konsern zis biznes. Bann manb kongregasyon bizin mazinn byin lavertisman ki Pol ti done setadir pa “asosye avek bann ki pa krwayan.” Mem si nu pa santi nu pli siperyer ki bann ki pena mem krwayans ki nu, nu pu evit asosye ar zot uswa les nu inflyanse par zot ladorasyon.a

Ki prinsip Labib bizin pran an konsiderasyon kan lwe enn batiman ki pu enn lorganizasyon relizye? An zeneral kan lwe enn batiman avek enn lot grup relizye, sa fer ki suvan bizin ena kontak avek zot. Me fode pa ki ena sa. Mem si pu lwe sa batiman la zis pu enn levennman, kolez ansyin bizin konsider sa bann pwin la: Eski pu ena bann zidol uswa bann sinbol relizye andan uswa andeor batiman la? Si nu pu servi sa batiman la, kuma eski bann dimunn dan landrwa pu konsider sa? Eski dan kongregasyon kapav ena ki pu soke si nu servi sa batiman la? (Matye 18:6; 1 Korintyin 8:7-13) Bann ansyin pu pran sa bann pwin la an konsiderasyon avan zot deside ki pu fer. Zot bizin usi pran an konsiderasyon zot konsyans ek konsyans tu dimunn dan kongregasyon pu kone si pu aste uswa pu transform enn batiman ki pu enn lot relizyon pu fer li vinn enn Lasal DiRwayom.

[Not anba paz]

[Zimaz lor paz 30]

Sa batiman la ti enn sinagog. Nu finn aste li ek finn fer li vinn enn Lasal DiRwayom.