Kestyon Bann Lekter

Eski li move pu zwe larzan mem si pe zwe zis pu enn tigit kas?

Parol Bondye pa donn bann detay lor zwe larzan. Me seki li dir nu la, ase pu nu konpran ki li kont bann prinsip Labib.a Par egzanp, buku dimunn rekonet ki zwe larzan ankuraz bann dimunn pu vinn gurman kas. Sa pwin la tusel li enn kitsoz inportan ki bann Kretyin bizin pran kont, parski Labib dir ki “bann dimunn gurman” pa pu gayn Rwayom Bondye. Dapre Labib, dezir pu gayn plis, li enn form idolatri.—1 Korintyin 6:9, 10; Kolosyin 3:5.

Zwe larzan ankuraz usi dimunn pu vinn egois ek pu ena enn latitid pu met paryaz, ek ena enn gran dezir pu gayne. Lapot Pol ti donn warning kont sa bann kitsoz la kan li ti ekrir: “Fode pa nu rod met nu an avan, ek met paryaz ant nu ek zalu nu kamarad.” (Galat 5:26) Anplis, zwe larzan ankuraz buku dimunn pu vinn siperstisye etandone ki zot kont lor lasans. Bann zugader devlop tu sort kalite siperstisyon, dan lespwar pu inflyans lasans dan zot kote. Zot fer nu rapel bann Izraelit infidel ki ti’nn “met latab pu bondye Lasans ek donn bondye Destin divin melanze.”—Izai 65:11.

Sertin kapav panse ki li pa danzere si zot parye bann ti som larzan kan zot zwe kart uswa bann lezot zwe kuma dam, esek, uswa monopoli avek bann kamarad swa fami. Li vre ki enn kikenn ki parye enn tigit kas kapav pa konsider limem kuma enn gurman, enn kikenn ki met li an avan, enn kikenn ki ena lespri konpetisyon, uswa ki siperstisye. Me kan mem sa, ki lefe so labitid zwe kapav ena lor bann dimunn ar ki li pe zwe? Buku bann gran zugader ti kumans zwe pu tigit kas ‘zis pu amize.’ (Lik 16:10) Seki ti paret enn distraksyon inosan finn vinn enn kitsoz byin danzere.

Li vre sirtu kan li konsern bann zanfan. Buku zanfan finn telman kontan kan zot finn gayn bann ti paryaz, ki zot finn tante pu zwe bann pli gro som. (1 Timote 6:10) Enn letid ki pibliye an Amérique, konfirm ki buku zwer ki’nn droge ar zwe ti kumans boner “kan zot ti’nn parye bann ti som larzan lor bann levennman sportif uswa zwe kart avek bann kamarad uswa fami.” Enn lot rapor dir ki “se dan lakaz ki bann zanfan kumans zwe, suvan zot zwe kart an fami uswa avek bann kamarad.” Sa rapor la azute ki “trant pursan bann zanfan ki zwe, ti kumans avan mem zot gayn onzan.” Enn rapor ki apel Why Do People Gamble Too Much—Pathological and Problem Gambling [Kifer Bann Dimunn Zwe Larzan Buku—Enn Maladi ek enn Vis], dir ki pu reysi satisfer zot vis zwe, buku adolesan fer krim, uswa amenn move lavi. Se enn kitsoz ki pa ti paret danzere ditu, me purtan sa finn amenn bann konsekans byin tris.

Pwiski nu pe viv deza dan enn lemond kot ena buku pyez ek tantasyon, kifer eski pu nanyin nu al met nu dan enn lot sityasyon difisil? (Proverb 27:12) Zwe pu kas devan bann zanfan uswa non, ki li pu enn ti som uswa enn gro som, sa afekte nu ladorasyon pu Bondye. Donk, nu bizin rezet sa. Wi, li bon ki bann Kretyin ki kontan zwe kart, dam, esek ek lezot zwe ki’nn mansyone lao, zot zwe zis pu lamizman uswa zot zis kont pwin lor enn but papye. Bann Kretyin saz ki pran kont lasante spirityel zot bann kamarad, zot fami ek zot prop lasante spirityel, evit fer zwe vinn enn labitid, mem si se zis pu enn tigit kas.

[Not anba paz]