Kestyon Bann Lekter

Eski Nu Bizin Tini Tu Bann Langazman Ki Nu Fer ar Bondye?

Dan Labib, enn langazman li enn promes sakre ki nu fer ar Bondye pu fer enn aksyon, pu fer enn ofrand uswa kumans enn aktivite spesyal. Li kapav vedir usi aksepte enn responsabilite, ubyin evit fer sertenn kitsoz ki an zotmem pa move. Dan Labib ena bann resi ki koz lor bann langazman ki ti fer dan sertenn kondisyon dan sans ki ti ena enn promes pu fer sertenn aksyon si premyerman Bondye Li, Li ti fer kitsoz. Par egzanp, Ana, mama profet Samyel, “ti pran enn langazman kan li ti dir: ‘O Zeova ki diriz bann larme, si . . to pa bliye to esklav ek vremem to donn to esklav enn garson, mo pu donn li Zeova tu bann zur so lavi, ek pa pu pas razwar lor so latet.’” (1 Samyel 1:11) Labib usi koz lor bann langazman kuma enn kitsoz ki volonter. Ziska ki pwin nu bizin tini bann langazman ki nu fer ar Bondye?

Salomon ki ti enn lerwa dan ansyin Izrael ti dir: “Kan to pran enn langazman ar Bondye, fode pa to ezite pu tini li.” Li azute: “Tini langazman ki to pran. Vomye to pa pran okenn langazman, ki to pran ek to pa tini li.” (Eklezyast 5:4, 5) Lalwa ki Zeova ti donn Izrael par mwayin Moiz dir: “Si to pran enn langazman ar Zeova to Bondye, to bizin pa tarde pu tini li, parski Zeova to Bondye pu atann ki vremem to tini to langazman, ek vremem sa pu vinn enn pese pu twa.” (Deteronom 23:21) Donk li kler ki pran enn langazman ar Zeova, li enn zafer serye. Bizin fer li pu enn bon rezon. Ek sa kikenn ki pe pran sa langazman la, bizin pa dut so kapasite pu tini ninport ki promes li’nn fer dan so langazman. Sinon, li pli bon si li pa pran okenn langazman. Alor, eski bizin tini tu bann langazman ki nu pran?

Ki arive si enn kikenn finn angaz li pu fer kitsoz ek plitar li aprann ki langazman la pa an akor avek volonte Bondye? Sipoze li ti enn langazman ki dan enn sertenn manyer asosye limoralite avek vre ladorasyon? (Deteronom 23:18) Byinsir, nu pena pu tini sa kalite langazman la. Anplis, Lalwa Moiz ti dir ki enn papa ti kapav kennsel langazman ki so tifi ti’nn pran ek enn mari usi ti kapav kennsel langazman ki so fam ti’nn pran.—Nonm 30:3-15.

Anu get usi ka enn kikenn ki finn pran langazman ar Bondye pu res selibater, me aster li truv li dan enn sityasyon kot li pa kone ki pu fer. So langazman finn met li dan enn pozisyon kot li santi ki si li tini sa promes la, li kapav tante pu dezobeir bann prinsip Bondye lor moralite. Eski li bizin fer zefor pu tini so langazman? Eski li pa pli bon ki li pa tini so langazman pu li evit komet limoralite ek apre rod faver Bondye ek sipliy Li pu gayn so pardon? Selman li tusel kapav pran sa desizyon la. Personn pa kapav desid pu li.

Ki arive si enn kikenn pran enn langazman ek plitar li realize ki li pa’nn byin reflesi avan? Eski kan mem sa li bizin tini li? Li pa ti fasil pu Yifta tini langazman ki li ti’nn pran ar Bondye, me kan mem sa li’nn fer li egzak kuma li ti promet. (Ziz 11:30-40) Zeova kapav “ankoler” avek enn kikenn ki pa reysi tini so langazman, ek Li kapav usi detrir kitsoz ki sa dimunn la finn fer. (Eklezyast 5:6) Si nu pa tini nu langazman ek nu konsider sa kuma enn ti zafer, nu kapav perdi faver Bondye.

Zezi Kris ti dir: “Fer ki zot Wi vedir Wi, ek zot Non vedir Non; parski tu seki anplis sorti ar sa kikenn ki move la.” (Matye 5:37) Enn Kretyin bizin pa zis interese pu tini so bann langazman anver Bondye, me usi pu montre ki li fidel dan tu seki li dir—anver Bondye ek anver bann dimunn. Ki arive si li truv li dan enn sityasyon kot li pa kone ki li pu fer parski li’nn pran enn langazman avek enn lot dimunn ki kumansman ti paret bon me apre kan li egzaminn langazman la byin, li paret pena okenn sans? Fode pa ki li konsider sa bann kitsoz la kuma enn ti zafer. Me, apre enn konversasyon serye, lot dimunn la kapav deside pu kas langazman la.—Psom 15:4; Proverb 6:2, 3.

Ki bizin interes nu prinsipalman, an rapor avek bann langazman ek tu bann lezot kitsoz? Anu tuzur fer zefor pu gard enn bon relasyon avek Bondye Zeova.

[Zimaz lor paz 30]

Ana pa ti ezite pu tini so langazman

[Zimaz lor paz 31]

Mem si li ti difisil, Yifta ti respekte so langazman