Ki Repa Diswar Nu Senyer Reprezante pu U?
“Si enn dimunn manz dipin ek bwar divin nu Senyer san okenn respe, li pu kupab kont lekor ek disan nu Senyer.”—1 KORINTYIN 11:27.
1. Ki levennman pli inportan ki’nn prevwar pu lane 2003, ek kuma sa finn kumanse?
PLI gran levennman ki’nn prevwar pu lane 2003, pu pase le 16 Avril apre kuse soley. Bann Temwin Zeova pu rasanble ansam pu selebre Memoryal lamor Zezi Kris. Kuma nu finn gete dan lartik avan, Zezi ti etabli sa selebrasyon la, apre ki li ek so bann disip ti fini selebre Pak, le 14 Nizan lane 33 N.L. Sa selebrasyon la apel usi Repa Diswar Nu Senyer. Dipin ki pena levin ek divin ruz ki servi pu Memoryal reprezant lekor Kris ki parfe ek so disan ki li’nn verse pu nu. Se sel sakrifis ki kapav liber tu bann dimunn ar pese ek lamor ki zot finn erite.—Romin 5:12; 6:23.
2. Ki lavertisman nu truve dan 1 Korintyin 11:27?
2 Bann ki pran dipin ek divin Memoryal bizin fer sa byin kuma bizin ek avek enn gran respe. Lapot Pol ti dir sa byin kan li ti ekrir bann Kretyin ki ti dan lavil Korint. Dan sa kongregasyon la, bannla pa ti pe selebre Repa Diswar Nu Senyer kuma bizin. (1 Korintyin 11:20-22) Pol ti ekrir: “Si enn dimunn manz dipin ek bwar divin nu Senyer san okenn respe, li pu kupab kont lekor ek disan nu Senyer.” (1 Korintyin 11:27) Ki sinifikasyon sa bann parol la ena?
Sertin Ti Selebre Memoryal san Okenn Respe
3. Kuma eski bann Kretyin dan Korint ti pe konport zot pandan Repa Diswar Nu Senyer?
3 Buku Kretyin dan lavil Korint ti pran dipin ek divin Memoryal san okenn respe. Ti ena divizyon ant zot. Omwin pu enn sertenn letan, sertin ti amenn zot dine ek zot ti manz sa avan uswa pandan reynion. Ek suvan zot ti tro manze ek tro bwar. Donk, pandan Memoryal, kumadir zot ti pe dormi lor plan mantal ek spirityel. Akoz sa zot ti “kupab kont lekor ek disan nu Senyer.” Bann ki pa ti dine ti pe gayn fin, ek zot pa ti pe kapav konsantre. Wi, buku ti pran dipin ek divin san okenn respe. Ek zot ti bliye ki sa levennman la ti enn levennman ki byin-byin serye. Pena dut ki zotmem zot finn rod zot prop kondanasyon!—1 Korintyin 11:27-34.
4, 5. Kifer eski li byin inportan ki bann ki abitye pran dipin ek divin Memoryal, zot egzaminn zot byin?
4 Sak lane, kan lepok Memoryal koste, li byin inportan ki bann ki abitye pran dipin ek divin egzaminn zot byin. Zot bizin byin for lor plan spirityel pu zot kapav partaz sa repa la. Enn kikenn ki pena respe uswa mem ki mepriz sakrifis Zezi, li pe met limem dan enn sityasyon byin danzere. Bondye pu ‘tir li parmi so pep.’ Se seki ti ariv enn Izraelit si li ti partaz enn repa ansam avek plizir dimunn alor ki li ti inpir.—Levitik 7:20; Ebre 10:28-31.
5 Pol ti konpar Memoryal ar enn repa ki bann Izraelit ti pran ansam avek lezot. Li ti koz lor bann ki partisipe ansam avek Kris, apre sa li ti dir: “Zot pa kapav bwar an mem tan dan kup Zeova ek dan kup bann demon. Zot pa kapav manz an mem tan ‘lor latab Zeova’ ek lor latab bann demon.” (1 Korintyin 10:16-21) Si enn kikenn ki abitye pran dipin ek divin Memoryal arive komet enn pese byin grav, ki li bizin fer? Li bizin konfes so pese ar Zeova ek li bizin rod led spirityel ar bann ansyin dan kongregasyon. (Proverb 28:13; Zak 5:13-16) Si li repanti avek tu so leker ek li montre par bann aksyon ki vremem li finn repanti, lerla li pu kapav partisipe san ki li mank respe.—Lik 3:8.
Bann Obzervater Ki Asiste Memoryal Avek Respe
6. Pu kisannla Bondye finn rezerv sa privilez pu pran dipin ek divin Memoryal la?
6 Zordi ena buku dimunn ki fer dibyin anver bann frer spirityel Zezi, setadir leres 144,000, ki ankor lor later. Me eski sa bannla usi bizin pran dipin ek divin pandan Repa Diswar Nu Senyer? (Matye 25:31-40; Revelasyon 14:1) Non. Bondye finn rezerv sa privilez la zis pu bann ki Li’nn swazire par so lespri sin. Sa bannla zot bann “zeritye ansam avek Kris.” (Romin 8:14-18; 1 Zan 2:20) Me bann ki ena lespwar pu viv pu tuletan lor later pandan reyn Rwayom Bondye, ki zot fer pandan Memoryal? (Lik 23:43; Revelasyon 21:3, 4) Zot pa bann zeritye ansam avek Kris, ek zot pena lespwar pu al viv dan lesyel. Akoz sa, zot asiste Memoryal avek respe antan ki bann obzervater.—Romin 6:3-5.
7. Kifer eski bann Kretyin dan premye syek ti kone ki zot bizin pran dipin ek divin Memoryal?
7 Bann vre Kretyin dan premye syek ti swazire par lespri sin Bondye. Buku parmi zot ti kapav servi enn uswa plis ki enn don lespri sin. Par egzanp, zot ti kapav koz an lang. Donk, li pa ti difisil pu zot kone ki Bondye ti swazir zot, ek ki zot bizin pran dipin ek divin Memoryal. Me zordi, pu nu kone si enn kikenn li finn swazire par lespri sin, nu bizin baz nu lor sa bann parol ki truv dan Labib la: “Tu bann ki lespri sin dirize, sa bannla zot bann garson Bondye. Parski zot pa finn gayn enn lespri ki rann zot esklav ek ki fer zot gayn lakrint ankor. Me zot finn gayn enn lespri ki adopte zot kuma bann garson, ek ki permet nu kriye: ‘Abba, Papa!’ ”—Romin 8:14, 15.
8. Ki “dible” ek “move lerb” ki mansyone dan Matye sapit 13, reprezante?
8 Pandan bann syek ki finn pase, bann vre Kretyin ki’nn swazire par lespri sin finn grandi kuma “dible” dan enn karo “move lerb,” setadir bann fos Kretyin. (Matye 13:24-30, 36-43) Depi 1870, li finn vinn fasil pu remark sa grup “dible” la byin. Ek anviron 100 an plitar, bann ansyin ki’nn swazire par lespri sin ti gayn sa konsey la: “Bann ansyin bizin poz sa bann kondisyon la ar bann ki rasanble pu Memoryal. Zot bizin bann dimunn (1) ki ena lafwa dan disan [Kris]; ek (2) ki’nn angaz zot dan servis pu Senyer, mem ziska zot lamor. Zot bizin invit tu bann ki ranpli sa bann kondisyon la, pu selebre Lamor nu Senyer.”—Studies in the Scriptures, Series VI, The New Creation, page 473.a
Rod “Bann Lezot Muton”
9. An 1935, kuma eski zot tu finn byin konpran ki ete “gran laful,” ek ki lefe sa finn ena lor sertin ki ti pe pran dipin ek divin Memoryal?
9 Avek letan, lorganizasyon Zeova finn kumans port so latansyon lor bann lezot dimunn apar bann ki’nn swazire par lespri. Finn ena enn gran sanzman lor sa size la ver 1935. Me avan sa, bann serviter Bondye ti konsider “gran laful” ki mansyone dan Revelasyon 7:9, kuma enn dezyem grup dimunn ki pu al dan lesyel. Zot ti panse ki sa grup la pu asosye avek bann 144,000 resisite dan lesyel, ek zot pu kuma bann konpayn pu lamarye Kris. (Psom 45:14, 15; Revelasyon 7:4; 21:2, 9) Me le 31 Me, 1935, dan enn diskur ki ti fer dan lasanble bann Temwin Zeova dan Washington, U.S.A., zot ti gayn enn lexplikasyon lor Labib konsernan sa “gran laful” la. Sa “gran laful” la se bann “lezot muton” ki pe viv dan lepok lafin. (Zan 10:16) Apre sa lasanble la, sertin ki ti pe pran dipin ek divin Memoryal avan, finn arete. Kifer? Parski zot ti realize ki zot ena lespwar pu viv lor later, pa dan lesyel.
10. Ki lesperans ek ki responsabilite bann “lezot trupo” ena zordi?
10 Se sirtu apartir 1935 ki finn kumans rod bann ki form parti bann “lezot muton.” Sa bann dimunn la ena lafwa dan ranson ek zot finn angaz zot avek Bondye. Zot sutenir usi “ti trupo” ki’nn swazire par lespri sin, dan predikasyon lor Rwayom Bondye. (Lik 12:32) Sa bann lezot muton la ena lespwar pu viv lor later pu tuletan. Me selman, dan tu bann lezot domenn zot resanble bann leres zeritye Rwayom ki ankor vivan zordi. Nu rapel ki dan Izrael lontan, bann etranze ti ador Zeova ek zot ti obeir Lalwa. Azordi usi parey, bann lezot muton aksepte responsabilite ki bann Kretyin ena. Par egzanp, zot pres bon nuvel lor Rwayom Bondye ansam avek bann manb Izrael spirityel. (Galat 6:16) Me, okenn etranze pa ti vinn enn lerwa uswa enn pret dan Izrael. Donk, li parey pu bann lezot muton. Okenn parmi sa bann lezot muton la pa kapav reyne dan Rwayom Bondye, uswa servi kuma bann pret.—Deteronom 17:15.
11. Kifer eski dat ki enn dimunn finn batize, kapav ena enn rapor avek so lesperans?
11 Donk, se ver 1930 ki dusma-dusma li finn vinn kler ki Bondye finn fini swazir sa grup dimunn ki pu al dan lesyel la. Azordi, sa fer apepre 70 an depi ki pe rod bann lezot muton ki ena lespwar pu viv lor later. Me ki arive si enn parmi sa bann Kretyin ki’nn swazire la vinn infidel? Ena pli sans ki se enn parmi bann lezot muton, ki’nn res fidel ek ki’nn servi Bondye pandan buku letan, ki pu gayn lapel pu ranplas sa manb 144,000 la.
Kifer Sertin Krwar ki Zot Ena Lespwar pu Al Viv dan Lesyel
12. Dan ki sirkonstans enn dimunn bizin aret pran dipin ek divin Memoryal, ek kifer?
12 Bann Kretyin ki’nn swazire par lespri sin, zot sir ki zot finn gayn lapel pu al dan lesyel. Me ki pu arive si sertin ki pa finn gayn sa lapel la, pe pran dipin ek divin Memoryal? Aster ki zot kone ki zame zot finn ena sa lespwar la, sirman zot konsyans pu pus zot pu aret pran dipin ek divin pandan Memoryal. Bondye pa pu ni aksepte ni donn so faver, enn dimunn ki pe fer li pas pu enn kikenn ki’nn gayn lapel pu vinn enn lerwa ek enn pret dan So Rwayom. Ek sirtu si sa dimunn la kone ki li pa finn gayn sa lapel la. (Romin 9:16; Revelasyon 20:6) Zeova ti tuy Kora, ki ti enn Levit, parski li ti fer vantar ek li ti rod vinn pret parey kuma Aaron. (Egzod 28:1; Nonm 16:4-11, 31-35) Si enn Kretyin realize ki par erer li finn pran dipin ek divin Memoryal, ki li bizin fer? Li bizin aret pran sa, abes li ek priye Zeova avek tu so leker pu li gayn So pardon.—Psom 19:13.
13, 14. Kifer eski sertin kapav arive krwar ki zot finn gayn lapel pu al viv dan lesyel?
13 Kifer eski sertin kapav krwar ki zot finn gayn lapel pu al viv dan lesyel? Lamor enn konzwin uswa enn maler, kapav amenn enn kikenn perdi gu pu viv lor later. Uswa kapav enn kikenn ena enn pros kamarad ki dir ki li’nn gayn lapel pu al res dan lesyel. Donk, lerla li usi li anvi gayn sa mem lesperans la. Me, Bondye pa finn demann personn pu al rod bann dimunn ek ankuraz zot pu ena sa lespwar la. Ek Li pa fer zot tann bann lavwa avek bann mesaz pu konfirme ki zot finn swazire pu vinn bann zeritye dan So Rwayom.
14 Bann fos lide relizye usi kapav pus sertin pu panse ki zot finn gayn lapel pu al dan lesyel. Par egzanp ena sa fos krwayans ki dir ki tu bann bon dimunn pu al dan lesyel. Donk, nu bizin fer byin atansyon pu pa les nu inflyanse par sa bann fos lide ki nu ti ena avan la, uswa par bann lezot kitsoz ankor. Par egzanp, sertin kapav demann zotmem: ‘Eski mo pran bann medsinn ki kapav ena enn lefe lor mo bann santiman? Eski mo enn dimunn ki byin sansib ek ki kapav krwar ki mo finn gayn lapel pu al dan lesyel?’
15, 16. Kifer eski sertin kapav arive krwar ki zot form parti bann dimunn ki ena lesperans pu al viv dan lesyel?
15 Sertin kapav demann zot: ‘Eski mo anvi vinn enn gran dimunn? Eski mo anvi gayn enn sertenn lotorite asterla uswa dan lavenir kuma enn zeritye ansam avek Kris?’ Dan premye syek, kan bann Kretyin ti gayn linvitasyon pu vinn bann zeritye Rwayom Bondye, pa tu ki ti ena bann responsabilite dan kongregasyon. Ek bann ki ena sa lespwar la, zot pa rod vinn bann gran dimunn ni zot fer vantar parski zot finn swazire par lespri sin. Okontrer, zot abes zot. Dayer se seki bann ki “ena mem panse ki Kris” bizin fer.—1 Korintyin 2:16.
16 Kitfwa ena sertin ki finn tir konklizyon ki zot finn gayn lapel pu al dan lesyel, parski zot ena enn gran konesans lor Labib. Me kan enn kikenn finn swazire par lespri sin, sa pa vedir ki li finn gayn enn konpreansyon extraordiner. Nu konn sa parski Pol limem li ti bizin anseyn ek konsey sertin sa bann Kretyin la. (1 Korintyin 3:1-3; Ebre 5:11-14) Bondye finn pran dispozisyon pu ki tu so bann serviter gayn nuritir spirityel. (Matye 24:45-47) Donk, fode pa ki enn kikenn panse ki enn manb 144,000 ena enn pli gran sazes ki bann ki ena lespwar pu viv lor later. Se pa par so kapasite pu reponn bann kestyon Biblik, uswa pu prese uswa mem pu fer bann diskur, ki nu rekonet ki enn kikenn finn gayn lapel pu al dan lesyel. Dayer, ena usi sertin Kretyin ki ena lespwar pu viv lor later, ki byin kalifye dan sa bann domenn la.
17. Pu enn kikenn gayn lesperans pu al viv dan lesyel, lor ki kitsoz ek lor kisannla sa depann?
17 Ki kapav fer si enn Kretyin kumans poz bann kestyon lor lapel pu al res dan lesyel? Enn ansyin uswa enn Kretyin ki ena lexperyans kapav diskit sa size la avek li. Me, enn kikenn pa kapav pran desizyon pu enn lot dimunn. Enn kikenn ki vremem finn gayn sa lapel la, pa neseser demann lezot si vremem li ena sa lespwar la. Bann Kretyin ki’nn swazire par lespri “finn gayn enn nuvo nesans, pa par enn semans [ki reprodir] ki kapav mor, me par enn semans ki pa kapav mor, par parol sa Bondye ki vivan la ek ki egziste pu tuletan.” (1 Pyer 1:23) Par so lespri ek par so Parol, Bondye met kumadir sa “semans” la dan sa dimunn la, lerla li vinn “enn nuvo kreasyon.” Sa dimunn la gayn lespwar pu viv dan lesyel. (2 Korintyin 5:17) Ek se Zeova ki fer sa swa la. Sa lesperans la “pa depann ni lor sa kikenn ki ule la, ni lor sa kikenn ki fer zefor la, me lor Bondye.” (Romin 9:16) Donk, kuma eski enn kikenn kapav sir ki li’nn gayn sa lapel la?
Kifer Zot Sir
18. Kuma eski lespri Bondye donn temwaynaz avek lespri bann ki’nn swazire pu al viv dan lesyel?
18 Temwaynaz lespri sin Bondye konvink sa bann Kretyin la ki zot ena lespwar pu al viv dan lesyel. Pol finn ekrir: “Zot finn gayn enn lespri ki adopte zot kuma bann garson ek ki permet nu kriye: ‘Abba, Papa!’ Lespri limem donn temwaynaz avek nu lespri ki nu bann zanfan Bondye. Alor, si nu so bann zanfan, nu usi bann zeritye; wi bann zeritye Bondye, me usi bann zeritye ansam avek Kris. Purvi ki nu sufer ansam avek li pu ki nu kapav gayn laglwar ansam avek li.” (Romin 8:15-17) Lespri sin ena enn linflyans lor lespri ek lor latitid bann ki finn swazire pu al dan lesyel. Ek li pus zot pu aplik ar zotmem seki Labib dir lor bann zanfan spirityel Zeova. (1 Zan 3:2) Lespri sin fer zot resanti ki zot bann garson Bondye. Li fer zot devlop lespwar pu al res dan lesyel. (Galat 4:6, 7) Wi, se vre ki lavi pu tuletan lor later ansam avek zot fami, zot kamarad, se enn kitsoz extraordiner. Me, se pa lesperans ki Bondye finn donn zot. Grasa lespri sin, Bondye finn fer zot devlop enn gran dezir pu al viv dan lesyel. Sa dezir la telman gran, ki zot pre pu sakrifye tu bann latasman ki zot ena lor later, ek tu bann posibilite ki zot ena.—2 Korintyin 5:1-5, 8; 2 Pyer 1:13, 14.
19. Ki rol nuvo lalyans ena dan lavi enn kikenn ki ena lesperans pu al res dan lesyel?
19 Sa bann Kretyin la, zot sir ki zot ena lesperans pu al res dan lesyel. Zot sir ki zot form parti dan nuvo lalyans. Zezi ti koz lor la kan li ti etabli Memoryal, ek li ti dir: “Sa kup la reprezant nuvo lalyans grasa mo disan ki mo pu verse pu zot.” (Lik 22:20) Bondye ek bann 144,000 form parti dan sa nuvo lalyans la. (Zeremi 31:31-34; Ebre 12:22-24) Zezi li intermedyer dan sa lalyans la. Se grasa disan Kris ki sa nuvo lalyans la finn rant an viger. Dan sa nuvo lalyans la pena zis bann Zwif. Me, Bondye finn swazir usi dan tu bann nasyon enn lepep pu so non. Ek Li finn fer zot form parti dan “semans” Abraam. (Galat 3:26-29; Akt 15:14) Sa “lalyans pu tuletan la” permet tu bann Izraelit spirityel resisite ek gayn lavi imortel dan lesyel.—Ebre 13:20.
20. Dan ki lalyans bann manb 144,000 form parti ansam avek Kris?
20 Bann manb 144,000 sir ki zot ena sa lesperans la. Zot form parti usi dan enn lot lalyans, lalyans Rwayom. Konsernan sa Rwayom ki zot pu gayne ansam avek Kris la, Zezi ti dir: “Zot, zot bann ki finn kontiyn res avek mwa dan mo bann leprev, ek mo pe fer enn lalyans avek zot, parey kuma mo Papa ti fer enn lalyans avek mwa pu enn rwayom.” (Lik 22:28-30) Lalyans ant Zezi ek so bann lerwa ki asosye ansam avek li, pu fonksyone pu tuletan.—Revelasyon 22:5.
Lepok Memoryal, enn Lepok kot Nu Gayn Buku Benediksyon
21. Pandan lepok Memoryal, kuma eski nu kapav gayn buku benediksyon?
21 Nu gayn buku benediksyon dan lepok Memoryal. Nu kapav profit lektir Labib ki’nn prevwar pu Memoryal. Se enn bon moman usi pu nu priye, ek pu medit lor lavi Zezi lor later. Se enn bon lokazyon usi pu nu partisip dan predikasyon. (Psom 77:12; Filipyin 4:6, 7) Sa selebrasyon la an limem li rapel nu lamur ki Bondye ek Kris finn ena anver nu, an rapor avek sakrifis ki Zezi finn fer pu nu. (Matye 20:28; Zan 3:16) Sa dispozisyon la donn nu lespwar ek rekonfor. Li bizin usi fer nu vinn pli for pu kontiyn semin ki nu finn pran parey kuma Kris. (Egzod 34:6; Ebre 12:3) Memoryal bizin usi fer nu vinn pli for pu nu kapav gard langazman ki nu finn pran antan ki bann serviter Bondye ek bann fidel disip So garson.
22. Ki pli gran kado Bondye finn donn tu bann dimunn, ek dan ki fason nu kapav montre ki nu apresye sa kado la?
22 Wi, Zeova donn nu bann don extraordiner! (Zak 1:17) Nu gayn direksyon so Parol. Nu gayn led so lespri sin. Ek nu gayn lespwar pu viv pu tuletan. Pli gran don ki Bondye finn fer, se sakrifis so garson. Sa sakrifis la pey pese bann 144,000 ek tu bann lezot dimunn ki ena lafwa an li. (1 Zan 2:1, 2) Donk, ki valer lamor Zezi ena pu u? Eski u pu parmi bann dimunn ki pu montre zot rekonesans kan zot pu rasanble le 16 Avril, 2003 apre kuse soley pu selebre Repa Diswar Nu Senyer?
[Not anba paz]
a Pibliye par bann Temwin Zeova, me asterla li nepli disponib.
Ki U Pu Reponn?
• Kisannla ki bizin pran dipin ek divin Memoryal?
• Kifer eski bann “lezot muton” asiste Repa Diswar Nu Senyer selman antan ki bann obzervater?
• Kuma eski bann manb 144,000 kone ki zot bizin pran dipin ek divin pandan Memoryal lamor Kris?
• Memoryal li enn bon lepok pu fer ki kitsoz?
[Graf/Zimaz lor paz 14]
(Pu truv tablo la net, get piblikasyon)
Lasistans Memoryal
PAR MILYON
15,597,746
15
14
13,147,201
13
12
11
10
9
8
7
6
5
4,925,643
4
3
2
1
878,303
63,146
1935 1955 1975 1995 2002
[Zimaz lor paz 14]
Eski u pu prezan pu Repa Diswar Nu Senyer sa lane la?
[Zimaz lor paz 17]
Lepok Memoryal se enn bon lokazyon pu ogmant nu lektir Labib, ek nu partisipasyon dan predikasyon lor Rwayom