Manifeste enn “Duser Total Anver Tu Dimunn”
‘Kontiyn rapel zot . . . pu vinn bann dimunn rezonab, pu manifeste enn duser total anver tu dimunn.’—TIT 3:1, 2.
1. Kifer li pa tuzur fasil pu manifeste laduser?
LAPOT Pol ti ekrir: “Imit mwa, parey kuma mwa, mo imit Kris.” (1 Korintyin 11:1) Tu bann serviter Bondye zordi fer tu seki zot kapav pu obeir sa konsey la. An realite, li pa fasil, parski nu finn erit bann dezir ek bann tandans egois ar nu premye paran. Sa bann dezir la zot pa an armoni avek legzanp ki Zezi Kris inn lese. (Romin 3:23; 7:21-25) Purtan, kan nu bizin manifeste laduser, si nu fer zefor, nu tu nu kapav reysi. Me, nu pa pu reysi si nu kont zis lor nu prop volonte. Ki kitsoz ankor ki neseser?
2. Kuma nu kapav manifeste “enn duser total anver tu dimunn”?
2 Parmi bann frwi lespri sin ena laduser. Sa kalite la reflet laduser ki Bondye manifeste. Plis nu les lespri sin Bondye inflyans nu, plis nu pu manifeste so bann frwi dan nu lavi. Se selman lerla ki nu pu kapav manifeste “enn duser total” anver sak dimunn. (Tit 3:2) Anu gete kuma nu kapav imit legzanp Zezi ek permet bann seki frekant nu pu “gayn sulazman.”—Matye 11:29; Galat 5:22, 23.
Dan Lafami
3. Ki kalite sityasyon eski lespri ki ena dan sa lemond la inn prodir dan lafami?
3 Enn plas kot li byin inportan pu manifeste laduser, se dan lafami. Dapre l’Organisation mondiale de la santé, lasante bann fam plis menase akoz vyolans dan lakaz ki akoz aksidan larut ek malarya tulede ansam. An Angleterre par egzanp, dan Londres, enn kar [25%] bann krim vyolan ki’nn raporte, pase dan lafami. Lapliparditan, lapolis bizin fer fas avek bann dimunn ki “kriye ek zure” pu exprim zot santiman. Pli pir ankor, sertin kup finn les “bann santiman amer” afekte zot relasyon. Tusala se bann rezilta byin tris ki “lespri ki ena dan sa lemond” la, inn prodir. Me, sa kalite manyer la pena so plas dan bann fami Kretyin.—Efezyin 4:31; 1 Korintyin 2:12.
4. Ki lefe eski laduser kapav ena dan enn fami?
4 Nu bizin lespri sin Bondye pu nu kapav anpes sa bann tandans lemond la devlope an nu. “Kot ena lespri Zeova, ena liberte.” (2 Korintyin 3:17) Grasa lamur, labonte, puvwar pu kontrol zotmem ek pasyans, linite ki bann mari ek bann fam Kretyin ena ant zot, vinn pli for. (Efezyin 5:33) Kan bann manb enn fami montre enn karakter dus, sa fer lanbyans dan lakaz vinn pli zwaye. Sa fer enn gran diferans avek seki pase dan buku fami kot bann manb pa montre enn karakter dus ek kot ena dispit ek lager. Enn dimunn kapav ena kitsoz inportan pu dir, me se fason ki li dir sa, ki montre seki li resanti andan. Kan nu koz avek duser lor nu bann problem ek nu bann traka, sa diminye tansyon ki ena dan lafami. Salomon ki ti enn lerwa saz ti ekrir: “Enn repons ki dus kalme koler, me enn parol blesan fer koler monte.”—Proverb 15:1.
5. Kuma eski laduser kapav ed enn fami kot tu dimunn pa dan mem relizyon?
5 Li sirtu inportan pu ena laduser dan enn lakaz kot pa tu dimunn dan mem relizyon. Kan ena laduser ansam avek bann bon aksyon, sa kapav ed bann dimunn ki byin dispoze pu aksepte servi Zeova. Pyer ti donn bann fam Kretyin sa konsey la: “Zot, bann fam, sumet zot ar zot mari, pu ki, si sertin pa obeir laparol, kapav gayn zot san parol, par kondwit zot fam, parski bannla finn temwin ki zot ena enn bon kondwit ek enn profon respe. Ek pa rod fer zot paret pli zoli andeor par bann seve trese, ek par bann bizu an lor uswa par zot bann linz. Me, seki pu fer zot paret pli zoli, se seki zot ete andan, dan zot leker, setadir zot karakter trankil ek dus ki ena enn gran valer devan lizye Bondye.”—1 Pyer 3:1-4.
6. Kuma eski bann relasyon ant paran ek zanfan vinn pli for, kan manifeste laduser?
6 Dan enn fami, kapav ena buku tansyon dan relasyon ant paran ek zanfan, sirtu kan pena lamur pu Zeova. Me, dan tu bann fami Kretyin, bizin ena laduser. Pol ti donn sa konsey la bann papa: “Pa enerv zot zanfan, me kontiyn elve zot dan disiplinn ek dan bann manyer panse Zeova.” (Efezyin 6:4) Me kan ena laduser dan lakaz, relasyon ant paran ek zanfan vinn pli for. Dean, ki fer parti dan enn fami sink zanfan, rapel kuma so papa ti ete, li dir: “Papa ti ena enn karakter dus. Mo pa rapel ki mo’nn deza gayn enn dispit ar li—mem kan mo ti enn adolesan. Li ti tuzur byin dus, mem kan li ti kontrarye. Parfwa, pu li pini mwa, li ti avoy mwa dan mo lasam, uswa li ti anpes mwa fer bann kitsoz ki mo ti kontan, me zame nu pa ti dispite. Li pa ti zis nu papa. Li ti usi nu kamarad ek nu ti anvi fer tu pu fer li plezir.” Wi, laduser vremem fer bann relasyon ant paran ek zanfan vinn pli for.
Dan Nu Minister
7, 8. Kifer li byin inportan ki nu manifeste laduser dan predikasyon?
7 Enn lot plas kot nu bizin manifeste laduser, se dan predikasyon. Kan nu pres labonn nuvel lor Rwayom Bondye avek lezot, nu zwenn tu sort kalite dimunn ki reazir dan diferan fason. Ena sertin ki ekut avek plezir nu mesaz ki ena enn lesperans. Pu buku rezon, ena lezot, ki reazir enn move fason. Dan sa sityasyon la, li byin inportan pu nu manifeste laduser. Se sa ki pu ed nu pu ranpli nu misyon pu vinn bann temwin dan parti pli lwin lor later.—Akt 1:8; 2 Timote 4:5.
8 Lapot Pyer ti ekrir: “Me dan zot leker, donn Kris laglwar kuma zot Senyer. Zot bizin tuzur pre pu defann zot devan bann dimunn ki demann zot enn lexplikasyon lor zot lesperans, me fer li avek duser ek buku respe.” (1 Pyer 3:15) Parski pu nu, dan nu leker, nu konsider Kris kuma nu legzanp, nu fer byin atansyon lor fason ki nu azir. Nu fer ansort ki nu manifeste tulede, laduser ek respe, kan nu pres avek bann dimunn ki koz brit ar nu. Suvan sa fason ki nu azir la, prodir bann bon rezilta.
9, 10. Rakont enn lexperyans pu montre valer ki laduser ena dan predikasyon.
9 Kan ti tap laport kot li, Keith ti les so madam al uver. Tandiki li, li ti res par deryer. Kan madam Keith ti aprann ki se enn Temwin Zeova ki ti vinn vizit zot, li ti byin ankoler. Parski li ti dir ki bann Temwin Zeova les zot zanfan sufer. Sa frer ki ti vizit li la, ti gard so kalm. Avek duser, li ti dir madam la: “Mo byin sagrin ki u pans kumsa. Silvuple, eski u permet mwa explik u ki bann Temwin Zeova krwar?” Tu sa letan la, Keith ti pe ekute, me la, li ti vinn kot laport pu fer frer la ale.
10 Plitar, sa kup la ti kumans regrete parski zot inn tret sa frer la enn fason dir. Zot ti tuse par duser ki sa frer la ti manifeste. Zot ti byin etone kan frer la ti revinn vizit zot enn semenn plitar. Lerla, Keith ek so madam ti les li explik zot, ki seki li ti krwar sorti dan Labib. Keith ek so madam ti dir plitar: “Pandan de lane swivan, nu ti ekut enn kantite seki bann lezot Temwin ti dir.” Zot ti dakor pu etidye Labib, ek finalman zot ti pran batem pu montre zot langazman ar Zeova. Se enn gran rekonpans pu sa frer ki premye fwa ti vizit Keith ek so madam la! Plizir lane apre, sa frer la ti zwenn Keith ek so madam ek li’nn aprann ki zot inn vinn so frer ek so ser spirityel. Laduser inn reysi prodir enn zoli rezilta.
11. Kuma eski laduser kapav fer enn dimunn aksepte laverite pli fasilman?
11 Lexperyans ki Harold inn fer antan ki solda ti’nn fer li vinn amer ek li ti ena dut lor legzistans Bondye. So problem ti vinn pli grav, kan li ti fer enn aksidan larut. Sa ti arive kan enn sofer ki ti su, ti tap ar li ek li ti paralize pu tut so lavi. Kan bann Temwin Zeova ti pas kot li, Harold ti dir zot aret vinn vizit li. Me enn zur, enn Temwin ki ti apel Bill ti pe al rann vizit enn dimunn interese, ki ti res de lakaz zis apre Harold. Par erer, Bill inn al tap laport Harold. Li ti apiy li lor so de beki pu li vinn uver laport. Deswit kan Bill inn truv li, li’nn demann li exkiz. Li ti explik Harold ki an realite, li ti pe al vizit enn lot lakaz ki pre kot li. Kuma eski Harold ti reazir? Bill pa ti kone ki Harold ti’nn get enn reportaz lor bann Temwin Zeova. Sa reportaz la ti montre kuma bann Temwin ti travay ansam pu mont enn nuvo Lasal DiRwayom dan enn tigit letan. Li ti’nn inpresyone pu truv tu sa kantite dimunn la travay ansam dan linite. Sa ti’nn fer li sanz so latitid anver bann Temwin Zeova. Harold ti tuse par fason ki Bill ti demann li exkiz ek usi duser ki Bill ti manifeste, ti fer li plezir. Sa ti fer Harold deside pu aksepte vizit bann Temwin. Li’nn etidye Labib, li’nn fer progre ek li’nn vinn enn serviter Zeova batize.
Dan Kongregasyon
12. Ki bann manyer ki ena dan lemond, bann manb kongregasyon bizin fer atansyon pu pa devlope?
12 Enn trwazyem plas kot li byin inportan pu ena laduser, se dan kongregasyon. Dan sosyete ki nu pe viv zordi, suvan ena bann dezakor ant bann dimunn. Parmi bann dimunn ki les bann prinsip sa lemond la diriz zot lavi, tuletan ena bann deba ek bann diskisyon. Parfwa, sa bann manyer ki ena dan lemond la, tigit par tigit, rant dan kongregasyon usi. Sa arive kan sertin dan kongregasyon dispite ek lager an parol. Bann frer responsab byin tris kan zot bizin koriz sa bann sityasyon la. Me selman, lamur ki zot ena pu Zeova ek pu zot bann frer, pus zot pu esey regayn sa bann dimunn ki ena sa bann manyer lemond la. Sa bann frer la esey ed zot pu repanti ek pu sanze.—Galat 5:25, 26.
13, 14. Ki rezilta nu kapav gayne si nu “anseyn avek duser bann dimunn ki pa byin dispoze pu ekute”?
13 Dan premye syek, Pol ek so konpaynon Timote, ti gayn problem avek sertin dan kongregasyon. Pol ti dir Timote fer atansyon avek sertin ki resanble bann resipyan ki “servi pu bann kitsoz ki pena valer.” Pol ti servi sa rezonnman la, li ti dir: “Enn esklav nu Senyer bizin pa lager, me okontrer li bizin bon anver tu dimunn, ena kapasite pu anseyne, kontrol limem kan lezot fer li ditor. Li bizin anseyn avek duser bann seki pa byin dispoze pu ekute.” Kan nu gard enn karakter dus, mem kan lezot provok nu, suvan bann seki pa dakor, kapav sanze ek reegzaminn zot bann kritik. Lerla, kuma Pol dir, li posib ki Zeova “fer ki zot repanti, seki pu fer zot gayn enn konesans egzak lor laverite.” (2 Timote 2:20, 21, 24, 25) Nu remarke ki Pol asosye bonte ek kapasite pu kontrol nu avek laduser.
14 Pol ti met an pratik seki li ti prese. Kan li ti bizin tret avek bann “siper-zapot” dan kongregasyon Korint, li ti donn sa konsey la bann frer: “Asterla mwa Pol, mo sipliy zot par laduser ek labonte ki Zezi ena, mwa ki, kan mo parmi zot, mo paret mu, alor ki kan mo pa la, mo montre mwa ferm anver zot.” (2 Korintyin 10:1; 11:5) Pol vremem ti imit Kris. Remarke ki li ti sipliy sa bann frer la par “laduser” ki Zezi ena. Kan li ti fer sa, li ti evit pu ena enn latitid vantar, kumadir li pe donn lord. San dut ki so konsey ti tus bann Kretyin ki ti ena enn leker obeisan dan kongregasyon. Li ti kalme bann tansyon ki ti ena ant bann frer ek li ti ede pu retablir lape ek linite dan kongregasyon. Eski se pa enn bon fason pu azir, ki nu tu nu bizin fer zefor pu imite? Bann ansyin sirtu, bizin imit mem fason azir ki Kris ek Pol.
15. Kifer li inportan pu ena laduser kan donn konsey?
15 Se pa zis kan lape ek linite kongregasyon menase ki nu ena responsabilite pu ed lezot. Avan mem ki bann relasyon kumans gate dan kongregasyon, bann frer bizin gayn enn direksyon ranpli ar lamur. Pol ti dir: “Frer, si avan ki li rann li kont, enn kikenn fer enn fot, zot ki ena bann kalifikasyon spirityel, sey redres sa kikenn la.” Me kuma pu fer sa? “Avek duser. Me, an mem tan fer atansyon pangar twa usi to tante.” (Galat 6:1) Pu gard sa “duser” la, li pa tuzur fasil. Sirtu parski tu bann Kretyin, mem bann frer responsab, zot inparfe. Purtan, se duser sa dimunn ki donn konsey la ki pu fer li pli fasil pu sa kikenn ki’nn fer enn fot la, pu fer bann sanzman neseser.
16, 17. Ki kapav ed enn kikenn ki ezite pu swiv enn konsey, pu sanz so latitid?
16 Mo grek ki’nn tradir par “redres,” se enn mo ki servi usi kan remet an plas uswa kan dres bann lezo ki’nn kase. Sa se enn kitsoz ki fer byin dimal. Pu enn dimunn pa trakase, dokter ki remet an plas enn lezo ki’nn kase, rasir li lor bann bon rezilta ki so tretman pu prodir. So manyer kalm konsol sa dimunn la. Sa detrwa mo ki li dir alavans la ed pu kalme pli gran duler ki sa dimunn la pu kapav gayne. Li parey kan bizin redres enn kikenn lor plan spirityel, sa kapav fer li sufer. Me kan fer sa avek duser, sa pu ed li pu aksepte pli fasilman bann konsey. Sa pu permet retabli bon relasyon ek prepar li pu fer bann sanzman neseser. Okumansman, enn kikenn kapav pale ekut konsey ki pe donn li. Me, kan sa dimunn ki pe konsey li la, fer sa avek duser, sa kapav ed li pu sanz so latitid ek swiv bann konsey saz ki sorti dan Labib.—Proverb 25:15.
17 Kan nu ed lezot pu fer bann sanzman, ena tuzur enn danze ki zot pran nu konsey pu bann kritik. Enn ekrivin ti dir sa kumsa: “Kan nu koriz lezot, ena enn gran risk ki nu pran enn ler tro siperyer, ek se lerla ki nu pli bizin ena laduser.” Pu ki enn Kretyin ki donn lezot konsey pa tom dan sa pyez la, li bizin devlop laduser grasa so limilite.
“Anver Tu Dimunn”
18, 19. (a) Kifer li posib ki bann Kretyin truv sa difisil pu manifeste laduser kan zot tret avek bann manb guvernman? (b) Ki pu ed bann Kretyin pu manifeste laduser anver bann manb guvernman, ek ki rezilta sa kapav prodir?
18 Ena buku ki truv sa difisil pu manifeste laduser, kan bizin tret avek bann manb guvernman. Li vre ki sertin dimunn ki form parti dan guvernman, azir enn fason brit ek zot pena santiman pu lezot. (Eklezyast 4:1; 8:9) Me, nu lamur pu Zeova pu ed nu rekonet so lotorite siprem. Sa pu ed nu pu sumet ar bann guvernman, me, dan limit ki Labib inn fixe. (Romin 13:1, 4; 1 Timote 2:1, 2) Parfwa sertin dimunn ki ena enn gran pozisyon, esey anpes nu prese. Kan sa arive, se avek plezir ki nu rod bann lezot mwayin posib pu donn Zeova nu sakrifis luanz.—Ebre 13:15.
19 Dan okenn sityasyon, nu pa pu al rod lager avek personn. Nu fer tu pu montre nu rezonab, me an mem tan, zame nu pa pu dezobeir bann prinsip drwat, zis pu fer sertin plezir. Se kumsa ki nu bann frer pe reysi kontiyn zot travay predikasyon dan 234 peyi dan lemond. Nu swiv konsey Pol pu “sumet ek obeir bann guvernman ek bann lotorite parski zot bann dirizan ek [nu] bizin pre pu fer tu bon aksyon. Pa koz an mal lor personn, pa rod lager, vinn bann dimunn rezonab, manifeste enn duser total anver tu dimunn.”—Tit 3:1, 2.
20. Ki rekonpans bann ki manifeste laduser pu gayne?
20 Bann ki manifeste laduser pu gayn bann gran benediksyon. Zezi ti dir: “Ere bann dimunn dus, parski zot pu erit later.” (Matye 5:5) Pu bann disip Zezi ki’nn swazire pu al viv dan lesyel, kan zot kontiyn manifeste laduser, sa gard zot ere ek sa permet zot pu gard zot privilez pu diriz later ki pu anba dominasyon Rwayom Bondye. An seki konsern bann manb “gran laful” “lezot muton,” zot kontiyn manifeste laduser ek zot pe atann avek inpasyans lavi dan Paradi lor later. (Revelasyon 7:9; Zan 10:16; Psom 37:11) Se bann gran privilez ki pe atann nu dan lavenir! Alor, nu bizin zame pa negliz seki Pol ti rapel bann Kretyin ki ti res dan lavil Efez. Li ti dir zot: “Mwa, ki prizonye akoz nu Senyer, mo sipliy zot pu amenn enn lavi diyn ar sa lesperans ki zot inn gayne la avek limilite ek duser konplet.”—Efezyin 4:1, 2.
Revizyon
• Ki benediksyon nu gayne kan nu manifeste laduser
• dan lafami?
• dan predikasyon?
• dan kongregasyon?
• Ki rekonpans inn promet pu bann seki ena laduser?
[Zimaz lor paz 25]
Laduser li sirtu inportan dan enn lakaz kot zot tu pa dan mem relizyon
[Zimaz lor paz 25]
Laduser fer relasyon ki ena dan enn fami vinn pli for
[Zimaz lor paz 26]
Defann zot lafwa avek duser ek buku respe
[Zimaz lor paz 28]
Laduser enn konseye, kapav ed enn kikenn ki’nn fer enn fot